Menu
RSS

„ევროპულ საქართველოში ჩერგოვშინაა“

რატომ განაციონალდა, რა აკავშირებდა კოტე იოსელიანს გივი თარგამაძესთან და „მიჰა ჰამოვა“ თუ არა


ნაციონალური მოძრაობის არათუ ახალი სახეა, არამედ, ყოფილი მმართველი პარტიის წევრი მაშინ გახდა, როცა მიხეილ სააკაშვილს საქართველო უკვე დატოვებული ჰქონდა. რატომ განაციონალდა, რას ნიშნავს „ჩერგოვშინა“ და რატომ თვლის, რომ პატიმარი მიშა ცივილიზებული სამყარის ძალიან სერიოზული თავისტკივილი იქნება? _ „ვერსია“ ნაციონალური მოძრაობის ფეისისა და თბილისის საკრებულოს წევრის, კოტე იოსელიანის არაჩვეულებრივ ინტერვიუს წარმოგიდგენთ, რომლის წაკითხვაც მხოლოდ ნაცებისთვის კი არა, „ქოცებისა“ და „ევროქოცებისთვისაც“ რეკომენდებულია.


_ კოტე, ნაციონალებზე ამბობენ, ქართველობასა და ეროვნულობას ებრძვიანო. ჰოდა, გამიკვირდა, შტაბში, კედელზე ვაჟა-ფშაველას ფოტოები რომ გაქვს...
_ ნაციონალურ მოძრაობაზე იმის თქმა, ეროვნულობას ებრძვისო, სამწუხაროდ, რუსული პროპაგანდის ნაწილია. ეროვნულობა წარმატება, შენი თავის საერთაშორისო ასპარეზზე გატანა და საკუთარი ქვეყნის პოზიტივის ექსპორტია, რასაც ყოველთვის ვაკეთებდით და ვაკეთებთ, მაგრამ მტერს წარმატებული საქართველო არ სჭირდება!
დღეს ჩვენ ერთადერთი დეკლარირებული მტერი გვყავს. იგივე 2008 წლის ომი რუსეთმა იმიტომ კი არ დაიწყო, რომ მართლა აფხაზეთის საზღვაო მონაკვეთი უნდოდა, არამედ ამ საქართველოს განვითარების ძალიან სწრაფი ტემპი შეაჩერა. ნატოსგან მივიღეთ დაპირება, რომ ევროატლანტიკური წევრები გავხდებით, რაც იმას ნიშნავს, რომ ჩვენს სახელმწიფოს უსაფრთხოების გარანტია და ქოლგა ექნება...
_ უსაფრთხოება და დაპირება კარგია, მაგრამ ხომ ხედავ, რომ ეს ნატო არ გვიღებს?..
_ ნატო-ს არავინ ეკითხება, ახალ წევრს მიიღებს თუ არა.
_ აბა, ვის ეკითხება?
_ ნატო ჩრდილოატლანტიკური ორგანიზაციაა, რომელიც ხელშეკრულების საფუძველზე დაფუძნდა. ეს ხელშეკრულება 12 მუხლისგან შედგება, აქედან ყველაზე ცნობილი მე-5 მუხლია, სადაც საუბარი კოლექტიურ თავდაცვაზეა ანუ ნატო-ს ერთ წევრზე თავდასხმა მთელ ალიანსზე თავდასხმად აღიქმება. ასევე მთავარია მე-10 მუხლი, რომელშიც წერია, ყველა ევროპულ დემოკრატიას აქვს უფლება, ალიანსის წევრი გახდესო.
_ მაშასადამე, იმ ცხრა წლის განმავლობაში, როცა სათავეში ნაციონალები იყავით, საქართველო დემოკრატიული ქვეყანა არ იყო და ნატო-ს წევრი ამიტომ ვერ გავხდით, არა?
_ დიახ, პრობლემები გვქონდა...
_ მართალია, მაშინ ნაცების სახე არ იყავი, მაგრამ გარედან რომ უყურებდი, მთავარ პრობლემად რას მიიჩნევდი?
_ ვანო, სხვა მიმართულებით წავედით და იმას დავასრულებ, რისი თქმაც მინდოდა.
_ სათქმელს დაგასრულებინებ, მაგრამ ნატო-ს წესდებას ვიცნობ და გეხვეწები, ალიანსის რაობას ნუღარ განმიმარტავ!
_ შვედეთმა, ან ფინეთმა რომ თქვას, ნატო-ს წევრობა მინდაო, მაშინვე მიიღებენ, მაგრამ ნატო-ში ისრაელსა და ავსტრალიას ვერ მიიღებენ, რადგან ევროპა არც ერთია და არც _ მეორე. მოკლედ, თუ ევროპა და დემოკრატიული სახელმწიფო ხარ, ნატო-ში წინ ვერავინ დაგიდგება!
_ ევროპა კი ვართ, მაგრამ დემოკრატია არ გვაქვს და ნატო-შიც ამიტომ არ გვიღებენ. სწორად გავიგე?
_ 2008 წელს ნატო-სგან მივიღეთ პირობა, რომ ალიანსის წევრები გავხდებით. მაპ-ი ძალიან პოლიტიზირებული გავხადეთ, თორემ სინამდვილეში მაპ-ი ისაა, რომ ორი ქვეყნის თავდაცვის სტანდარტები ერთმანეთის თავსებადი გახდეს.
_ კოტე, დემოკრატიაზე გკითხე და სიტყვას ბანზე ნუ მიგდებ. ჰოდა, პირდაპირ მითხარი: ნაცების დროს დემოკრატია რატომ არ ყვაოდა, ან სასამართლოში პრობლემები რატომ გვქონდა?
_ ნაციონალურმა მოძრაობამ შევარდნაძისგან ჩამოშლილი ქვეყანა გადაიბარა!
_ ეს უტრირებული ნათქვამია... კოტე, რამდენი წლის ხარ?
_ 36-ის.
_ ჰოდა, წესით, უნდა გახსოვდეს, რომ ისინი, ვინც შევარდნაძის მთავრობაში იყვნენ, მერე ნაციონალები გახდნენ. ყველაფერს თავი რომ დავანებოთ, 1999-ში ცხონებულმა ედუარდმა მიშაზე ვაკელებს უთხრა, ეს თქვენი მომავალი პრეზიდენტიაო...
_ კი ბატონო, მაგრამ ეს ადამიანები ოპოზიციაში წავიდნენ და რევოლუცია მოაწყვეს. ისე, თავის დროზე, მიშამაც თქვა კალაძეზე, შეიძლება პრეზიდენტი გახდესო და კალაძეს პრეზიდენტობის ამბიცია რომ გაუჩნდეს, მიშას უნდა დაბრალდეს?.. ისე, „ვარდების რევოლუცია“ გაყალბებულმა არჩევნებმა გამოიწვია.
_ 2003 წლის საპრეზიდენტო არჩევნებში მიშა პირველ კი არა, მეორე ადგილს ითხოვდა, თუმცა ამაზე ლაპარაკი შორს წაგვიყვანს...
_ მნიშვნელობა არ აქვს, მიშა რას ითხოვდა. საერთოდ, ლიდერებისგან დისტანცირება უნდა მოვახდინოთ და საზოგადოების ინტერესებიდან გამომდინარე, უნდა ვისაუბროთ, რადგან ყველაფერი ისე მთავრდება, როგორც ხალხს უნდა. ჩვენ თეოლოგიური სახელმწიფო არ ვართ, სადაც აიათოლასავით ვიღაც გამოვა და დაგვაშოშმინებს. არც ბედუინური პრინციპი გვაქვს...
_ სამაგიეროდ, ჩვენში კლანური მმართველობაა ფესვგამდგარი...
_ შევარდნაძის კლანმა ბიზნესის მსუყე ნაწილი წაიღო...
_ კოტე, 25 წელია, ჟურნალისტიკაში ვარ. ჰოდა, ვალდებული ვარ, შეგახსენო: კლანური მმართველობა სააკაშვილის დროსაც იყო. მაგალითისთვის დავით კეზერაშვილის გახსენებაც საკმარისია, რომელიც დღეს მიშას გვერდით აღარაა...
_ კეზერაშვილი რომელ კლანს მიეკუთვნებოდა?
_ „კეზერა“ მიშას კლანი არ იყო?
_ მიშას კლანი ჰქონდა ჩამოყალიბებული?
_ აბა, არ ჰქონდა? _ ყველა ბიზნესს „ნაცები“ აკონტროლებდნენ.
_ ყველა ბიზნესს როგორ აკონტროლებდნენ? მაგალითად, „მაგთის“ აკონტროლებდნენ?
_ ხელისუფლებაში მოვიდნენ თუ არა, „ვარდოსნებმა“ ჯოხთაბერიძე დაიჭირეს და ამაზე მეტი კონტროლი რაღა გინდა?
_ შეიძლება დაიჭირეს, მაგრამ რაც ბიუჯეტიდან მოპარული ჰქონდა, გადაიხადა და გამოუშვეს.
_ ესე იგი უარყოფ, რომ იმ ყბადაღებული 9 წლის განმავლობაში ქონება არავისთვის წაურთმევიათ?
_ ქონების წართმევები, როგორც ვიცი, სახელმწიფოსთვის მოპარული ფულის ანაზღაურების რაღაც ფორმაში „იჯდა“. არ გამიგია, რომ ვიღაც მივიდა და კეზერაშვილს თავისი ქონება გადაუფორმა!
_ შენ თუ არ გაგიგია, მე გეტყვი _ ბიზნესმენს იჭერდნენ და ის იძლებული ხდებოდა, საკნიდან ქონება სახელმწიფოსთვის ეჩუქებინა...
_ ხომ შეუძლიათ, ახლა იჩივლონ და ეს ქონება დაიბრუნონ?
_ ჩივიან, მაგრამ ვერ იბრუნებენ...
_ რადგან ვერ იბრუნებენ, ესე იგო, რაღაც სამართლებრივი ლაფსუსია...
_ არ ვამბობ, რომ დღეს ყველაფერი იდეალურადაა, მაგრამ წეღან გკითხე და არ მიპასუხე: ნაციონალებმა დემოკრატიული სასამართლო რატომ ვერ თუ არ შექმნეს?
_ „ვარდების რევოლუციის“ დროს ხალხის დაკვეთა ელემენტარული ინფრასტრუქტურული პრობლემების მოგვარება იყო...
_ მერე, ასფალტი გვეჭამა?
_ ახლა ხომ გამოჩნდა, რომ ეკონომიკის განვითარებისთვის ასფლატი თურმე საჭიროა!
_ კი ბატონო, მაგრამ 2003-დან 2012 წლამდე მოსამართლეებს გამამართლებელი განაჩენები, პრაქტიკულად, არ გამოჰქონდათ...
_ ეს სისხლის სამართალში...
_ „ყველანი ციხეში!“ -ესეც მიშას სიტყვებია. ჰოდა, მართალია, მაშინ ნაცმოძრაობის წევრი არ იყავი, მაგრამ ყველაფერ ამაზე პროტესტი არ გქონდა?
_ ვანო, გეტყვი, როდის ჩავთვალე, რომ საქმე სწორ ადამიანებთან მქონდა... 2006 წლის დასაწყისში საქართველოდან წავედი. მანამდე ჩემს მეგობარს ასეთი ამბავი შეემთხვა: სადარბაზოსთან ნაცნობი შეხვდა და სთხოვა -დამარეკინეო. ჩემმა მეგობარმა ტელეფონი მისცა და ნაცნობი გაიქცა, გაეკიდა, მაგრამ ვერ დაიჭირა. ყველაფერ ამას ჩხუბი მოჰყვა. ასეთი რაღაცები მაშინ ჩვეულებრივი მოვლენა იყო... საქართველოში ერთი წლის მერე დავბრუნდი, მეგობრებთან ერთად, კლუბში წავედი. რაღაც მომენტში მაგიდასთან მარტო დავრჩი და ვხედავ, მაგიდაზე საფულე, ტელეფონი და მანქანის გასაღები ანუ პირადი ნივთები იდო. მოკლედ, სახელმწიფომ ადამიანს უსაფრთხოების გარანტიები შეუქმნა. აი, სწორედ მაშინ მივხვდი, რომ სწორ ადამიანებთან ვიყავი.
_ ეს მესმის, მაგრამ ისევ გეკითხები: ნაციონალებმა სასამართლო რატომ ვერ თუ არ გააადამიანურეს?
_ სასამართლო რაღაც დოზით გააადამიანურდა. „ვარდების რევოლუციამდე“ ექვსი თვით ადრე, მრგვალ ბაღთან, დღისით, მზისით, მამაჩემი მოკლეს.
_ რატომ?
_ ამაზე სხვა დროს ვისაუბროთ... მამაჩემის მკვლელი ციხიდან, პრაქტიკულად, ექვს თვეში გამოვიდა, რადგან ფული გადაიხადა.
_ ციხიდან გირგვლიანის მკვლელებიც მალე გამოვიდნენ...
_ მოკლედ, სასამართლო სისტემა, პრაქტიკულად, ჩამოშლილი იყო, „ვარდების რევოლუციის“ შემდეგ, რაღაც დოზით განვითარდა და ბოლო ინიციატივა ის იყო, რომ აბსოლუტურად მიუკერძოებელი უცხოელი მოსამართლეები უნდა ჩამოეყვანათ, რომლებიც ქვედა ინსტანციაში მიღებული გადაწყვეტილების კანონიერებას ყოველგვარი სუბიექტურობის გარეშე შეაფასებდნენ და ეს სასამართლო სისტემას გაწმენდდა.
_ შეიძლება, მაგრამ არ მგონია, ეს გამოსავალი ყოფილიყო, რამეთუ იგივე გირგვლიანის საქმეზე ევროსასამართლომ პირდაპირ თქვა, საქმის ფალსიფიკაციაში ხელისუფლების ყველა შტო იყო ჩართულიო, მაგრამ „ნაცებმა“ სტრასბურგის ამ განცხადებას ყურიც არ ათხოვეს. მაშასადამე, მიშას ხალხს ცა ქუდად არ მიაჩნდა და დედამიწა _ ქალამნად?
_ არა, არა... ვანო, რასაც ამბობ, ძალიან კარგად მესმის, მაგრამ არ შეიძლება, კონკრეტული ქეისებით ვიმსჯელოთ.
_ დიახ, სწორედ კონკრეტული ქეისებით უნდა ვიმსჯელოთ, რამეთუ ნაცმოძრაობის დასასრულის დასაწყისად სწორედ გირგვლიანის საქმე ითვლება...
_ მხოლოდ გირგვლიანი კი არა, ბევრი სხვა რამეც იყო... ნაციონალური მოძრაობის დაღმასვლა მაშინ დაიწყო, როცა ხალხი ამბობდა, ნაცმოძრაობა მასზე დაკისრებულ მოვალეობებს თავს ვერ ართმევს და მოსახლეობის ინტერსებს არ ატარებსო. ვანო, ალბათ, ისიც გაგიგია, რომ ამბობენ ხოლმე, აი, ომამდე კარგად მიდიოდნენ და მერე გაფუჭდნენო.
_ ეს არა, მაგრამ ის კი მსმენია, ჟვანიას გაურკვეველ ვითარებაში გარდაცვალების მერე „აუშვესო“...
_ ომამდე ყველაფერი კარგად იყო, მერე კი უკან წავიდა, მათ შორის, ადამიანის უფლებების თვალსაზრისით... ომი იმიტომ დაიწყო, რომ ჩვენ ძალიან წარმატებულ რელსებზე გადავედით! ეს ხუთდღიანი ომი დასრულდა თუ არა, იმ წუთას ამუშავდა უზარმაზარი რუსული პროპაგანდისტული მანქანა და სწორედ მაშინ დაიწყო, რომ თურმე ვიღაცეები ორგანოებით ვაჭრობენ, ვიღაცამ ვიღაც მოკლა, ვიღაცამ რაღაც გააფუჭა. დღეს მთელი ევროპა რუსული პროპაგანდის წინააღმდეგ იბრძვის და ჩვენ მარტო, შიშველი ხელებით რა უნდა გაგვეკეთებინა? _ ნაციონალური მოძრაობის წინააღმდეგ ნეგატიური საზოგადოებრივი აზრი შეიქმნა, თუმცა გარკვეული საბაბი პარტიის მხრიდანაც იყო მიცემული.
_ ისე, გახსოვს, 2005 წელს, პრეზიდენტი რომ გახდა, სააკაშვილი პირველი ვიზიტით რუსეთს ეწვია ანუ მაშინ პუტინი კარგი „ტიპი“ იყო და მერე გაფუჭდა? იქნებ, სააკაშვილს პოლიტიკურმა ალღომ უღალატა ან, სულაც „ვარდების რევოლუცია“, რომლის დღეებშიც თბილისს ივანოვი ესტუმრა, მართლაც, რუსული პროექტი იყო?
_ მიშას ეს ვიზიტი ერთგვარი მესიჯი იყო, რომ საქართველო რუსეთის მტერი კი არა, ის სახელმწიფოა, რომელიც საკუთარ მომავალსა და განვითარებაზე ზრუნავს.
_ ეს გასაგებია, მაგრამ ამ ვიზტის დროს მიშამ არ იცოდა, რომ რუსეთმა საქართველო ორი საუკუნის წინ დაიპყრო?
_ ძალიან კარგად იცოდა, მაგრამ ჩვენი ქვეყნის ისტორიაში ახალი ეპოქა დაიწყო.
_ კოტე, მოდი შევთანხმდეთ, რომ საქართველოს ისტორია „ვარდების რევოლუციით“ არ დაწყებულა!
_ 2003 წლის ნოემბერში რაღაც ეტაპი დამთვრდა და ახალი დაიწყო. ასე მოხდა 2012 წელსაც.
_ კოტე, ნაცმოძრაობის წევრი, როგორც ვიცი, 2014-ში გახდი და ძველ ცოდვებზე პასუხს, ცხადია, ვერ მოგთხოვ, მაგრამ, მაგალითად, გივი თარგამაძესთან, სანამ „გაევროქოცდებოდა“, პარტიული საქმიანობა მაინც მოგიწია...
_ გივი თარგამაძე ჩემი ძალიან ახლო მეგობარი იყო _ ერთმანეთი „ვარდების რევოლუციამდე“ გავიცანით.
_ თუკი მეგობარი იყო, ალბათ, ყურმოკრული გექნება, 2008-ში გივი რუს გენერალს ფულს რომ სთავაზობდა, გინდა თუ არა, გორი დაბომბეო... მოკლედ, ნაცებს მოარული ხმების იგნორირების პოლიტიკა რომ არ აერჩიათ და ყველა ჭორ-მართალზე განმარტება გაეკეთებინათ, ეგებ ის შედეგი არ დამდგარიყო, რაც 2012 წლის არჩევნებზე დადგა?
_ რუსულ აგრესიას ვერ ავიცილებდით!
_ ეს მესმის, მაგრამ სხვა რამე გკითხე ანუ ნაცმოძრაობა ჭორების გაბათილებას რატომ არ ცდილობდა?
_ ვანო, რაც გითხარი, ზუსტად იმას იმეორებ.
_ რა მითხარი, კოტე?
_ 2008 წლის აგვისტოს ომის მერე, ნაციონალური მოძრაობის წინააღმდეგ რუსული პროპაგანდისტული მანქანა ჩაირთო, რომელსაც დღეს მთელი მსოფლიო აღიარებს. სხვათაშორის, არ ვიცით, ტრამპის არჩევნებში რუსეთი ჩაერია თუ არა, მაგრამ ეს რუსული ნარატივი ტრამპის დღის წესრიგზე სერიოზულ გავლენას ახდენს. არადა, ტრამპს რუსული პროპაგანდის წინააღმდეგ დიდი გამოცდილება აქვს. ჩვენ კი არც გამოცდილება გვქონდა და არც ვინმე გვეხმარებოდა. დიახ, რუსეთმა პროპაგანდისტული ომის მოდელირება საქართველოში გაიარა!
_ ესე იგი, საუბარი იქით მიგყავს, რომ მითხრა, ე.წ. ციხის კადრები რუსული პროპაგანდის ნაყოფიაო?
_ „ციხის კადრებიც“ რუსული პროპაგანდა იყო და ის, რასაც თარგამაძეზე მეუბნები, არადა მე პირიქით ვიცი -გენერალ ბორისოვს უთხრეს, არ დაბომბოო. მოკლედ, ვანო, ახლა ჭორებზე ვსაუბრობთ, რაც საბოლოოდ, მოსახლეობის შეხედულებას აყალიბებს და იმას აღარავინ უყურებს, სინამდვილეში რა და როგორ იყო.
_ ჩემი სეხნია ანუ მერაბიშვილი, რბილად რომ ვთქვათ, ძლიერი მენეჯერი იყო...
_ ვანოს ხერხემალს და, რა ვიცი, რას არ ეძახდნენ...
_ ისე, სანამ ნაცებს გაემიჯნებოდა, სააკაშვილი, მახსოვს, ბურჯანაძეს ყველაზე გამძლე ფოლადის ქალს ეძახდა...
_ ამას ხომ არ ავყვებით?
_ ეს ჭორი კი არა, მიშას ნათქვამია!
_ მერე რა მოხდა? თქვა და თქვა! ადამიანები, რომლებიც აზრს არ იცვლიან, ვერაფერს ცვლიან. თუ რამის შეცვლა გინდა, აზროვნებაც უნდა შეიცვალო!
_ შეიძლება ადამიანმა შეხედულებები შეიცვალოს, მაგრამ აზროვნების შეცვლა, არ მგონია, კარგი იყოს!
_ მუდმივი არაფერია...
_ ცხადია, მაგრამ კონკრეტულად მიპასუხე: 2014-ში, ნაცმოძრაობის წევრი რომ ხდებოდი, შინაგანი შფოთვა არ გქონდა, ვაიმე, ხალხი რას იტყვისო?
_ ვანო, 2006 წლიდან საგარეო საქმეთა სამინისტროში ვმუშაობდი და ვხედავდი, ჩვენი საგარეო პოლიტიკა როგორი იყო. არ ვიცი, ვინ რას აკეთებდა, მაგრამ ქართველი დიპლომატები დღედაღამ ვმუშაობდით, რომ ბევრი ტურისტი შემოსულიყო და მეტი ღვინო გაგვეყიდა. 2012 წელს კი, როგორც კი „ქართული ოცნება“ მოვიდა, განსხვავება მაშინვე ვიგრძენი _ სხვა თუ არაფერი, უკრაინის გამო რუსეთის წინააღმდეგ დაწესებულ სანქციებს არ ვუერთდებით, ამიტომაც ჩემთვის ნათელი გახდა, რომ „ქართული ოცნება“ რუსულ პროპაგანდაზე აღმოცენებული იდეოლოგიური ერთობაა...
_ კარგი, ახლა, სააკაშვილივით ნუ მელაპარაკები!.. ისე, განაციონალება ხეირად გექცა _ ოჯახი შექმენი...
_ თინა ბოკუჩავასთან ოჯახის შექმნას მანამდეც ვაპირებდი... ნაციონალური მოძრაობა ერთადერთი ძალაა, რომელმაც თავის რიგებში ქვეყანაში არსებული ინტელექტუალური და საკადრო რეზერვის მობილიზება მოახერხა.
_ კეთილი, მაგრამ იმის გამო, რომ ნაციონალი ხდებოდი, კომპლექსი არ გქონდა?
_ არა, რადგან ვიცოდი, რომ ციხის კადრები დადგმული იყო! გაერო-ს ყველაფრის მიმართ ჰუმანური მიდგომა გააჩნია, გარდა ერთისა _ ადამიანის წამებაში მხილებულის შეწყალება გამორიცხულია! ბედუკაძე, რომელიც ადამიანებს თავისი ხელით აწამებდა, რუსებმა ჟურნალისტიკაში შეტანილი წვლილისთვის დააჯილდოვეს, დაცვით დადის და, პრაქტიკულად, ისეთი სახე გახდა, რომელსაც „ქართული ოცნება“ ემადლიერებოდა.
_ ჩვენში დარჩეს და, თქვენი მურუსიძეც „ოცნების“ სახე გახდა...
_ ეს კიდევ სხვა რაღაცაა.
_ სხვა რაღაც რატომაა?
_ ეს ადამიანები სისტემის სამსახურში იყვნენ...
_ ვაიმე, მურუსიძეს ამართლებ?
_ არ ვამართლებ, მაგრამ მოვა დრო, ნაციონალური მოძრაობა ხელისუფლებაში დაბრუნდება და მურუსიძე ყველაფერს იზამს, რომ ისევ ამ რეჟიმზე დაიწყოს მუშაობა! მოკლედ, კომპლექსი კი არ მქონდა, მჯეროდა და მჯერა, რომ სწორ ნაბიჯს ვდგამდი...
_ ისე, კოტე, ცოტა მეოცნებე ხომ არ ხარ?
_ არა!
_ რა ვიცი, ორი წუთის წინ მითხარი, ნაცმოძრაობა ხელისუფლებაში დაბრუნდებაო და ეს ხომ ოცნებაა? დამისაბუთე, ამას რის საფუძველზე ამბობ?
_ ეს ოცნება არაა. პოლიტიკური მეცნიერება ამბობს, რომ თუკი პარტია არ მოკვდება, ხელისუფლებაში აუცილებლად მოვაო. ნაციონალური მოძრაობა არათუ კვდება, იზრდება.
_ კარგი რა, სულ სამი ,,ლიდერიღა'' ხართ და ესაა გაზრდა?
_ რას მეუბნები?
_ შენს გარდა, ნაცმოძრაობის სახე, აბა კიდევ ვინ არის?
_ მე, გია ბარამიძე, ზალიკო უდუმაშვილი...
_ ზალიკო ახლახანს განაციონალდა...
_ იცი, კიდევ რამდენი განაციონალდება?
_ ჩათვალე, რომ მართლმორწმუნე „ქოცი“ ვარ. ჰოდა, როგორ უნდა გამანაციონალო?
_ ეს ქვეყანა ხომ გიყვარს?
_ ცხადია, მიყვარს.
_ ისიც ხომ გინდა, რომ ადამიანზე მორგებული და ორიენტირებული იყოს?
_ რასაკვირველია, მინდა...
_ ეს ხელისუფლება იმას გაძლევს, რისი ინტერესიც გაქვს?
_ ეჰ, ჩემო კოტე, საწყალი ხალხისთვის არც ის ხელისუფლება იყო და არც _ ესაა.
_ დღევანდლამდე რომ მოვედით, ეს სწორედ ნაცმოძრაობის დამსახურებაა!
_ კოტე, ნაცებს საპრეზიდენტო არჩევნებში კანდიდატი გეყოლებათ?
_ რა თქმა უნდა.
_ ჰოდა, დამარწმუნე, რომ ხმა მას მივცე და არა _ სხვას.
_ ჩვენი სახელმწიფოს მუდმივი პრობლემა ისაა, რომ ადამიანები არჩევანს ცივი და გააზრებული გადაწყვეტილების საფუძველზე არ აკეთებენ. ხმას ყოველთვის ემოციურ დონეზე ვაძლევთ. ემოციური არჩევანი დამღუპველია!
_ ესე იგი, 2004 წლის იანვარში, როცა სააკაშვილი პრეზიდენტად რევოლუციის ემოციით ავირჩიეთ, დაგვღუპა არა?
_ კი ბატონო, ემოციური არჩევანი იყო, მაგრამ ამან დაგვღუპა თუ არა, სხვა საკითხია. ბალანსი ყოველთვის და ყველაფერში კარგია. როცა ცენტრალური ხელისუფლება ერთი პარტიისაა, აუცილებლად უნდა არსებობდეს ძალა, რომელიც ამას დააბალანსებს.
_ ქვეყანაში არაერთი ოპოზიციური პარტიაა და ეს დაბალანსებას არ ნიშნავს?
_ არა.
_ რატომ?
_ რატომ და, ოპოზიციას ქმედითი ნაბიჯების გადადგმის მექანიზმი უნდა ჰქონდეს. ეს უფლება კი მხოლოდ პრეზიდენტს აქვს ანუ პრეზიდენტი სერიოზული დამბალანსებელი ფაქტორია. როცა ცენტრალური და ადგილობრივი ხელისუფლება „ქართული ოცნებისაა“, სიმძიმის მესამე ცენტრი გვჭირდება, რომელიც ყველაფერ ამას დააბალანსებს. ბალანსი ერთადერთი სწორი გამოსავალია. ვანო, შეიძლება, „ოცნების“ ორთოდოქსი მხარდამჭერი ხარ და საამისოდ სერიოზული მიზეზებიც გაქვს, მაგრამ თუკი არჩევნებზე ემოციებისგან დაიცლები და გაიაზრებ, რომ განვითარებისთვის ბალანსი აუცილებელია, მხარს სწორედ პრეზიდენტობის ოპოზიციონერ კანდიდატს დაუჭერ!
_ საპრეზიდენტო არჩევნებში ხმა ევროქოცების კანდიდატს რომ მივცე, მოღალატე ვიქნები?
_ ხმა ისეთ კანდიდატს უნდა მისცე, რომელსაც გამარჯვების რეალური შანსი აქვს.
_ მაგალითად, დავით ბაქრაძეს გამარჯვების შანსი რატომ არ აქვს?
_ ბაქრაძე გაცვეთილი პოლიტიკოსია!
_ რას ამბობ, მიშა ხომ გაუცვეთელი პოლიტიკოსია!
_ მიშა გაცვეთილი პოლიტიკოსი როგორაა?
_ რახან 19 იანვარს, ნათლისღებას განიბანა, გაცვეთილი ამიტომ აღარაა?
_ სააკაშვილი აღმოსავლეთ ევროპაში ყველაზე დინამიური, აქტიური და ცნობადი პოლიტიკოსია, რომელიც პოსტსაბჭოთა სივრცეში ყველაზე მნიშვნელოვანი სახელმწიფოების ლიდერთა _ პუტინის, პოროშენკოსა და ივანიშვილის დღის წესრიგს განსაზღვრავს!
სხვათა შორის, მიშა ცივ წყალში წელს პირველად არ ჩასულა.
_ 19 იანვარს შენც რატომ არ განიბანე?
_ ძალიან დიდი ხანი ფინეთში ვცხოვრობდი, სადაც 6-7 თვე ტემპერატურა მინუს 10-15 გრადუსია. ფინეთში 80 ათასამდე ტბაა და თითქმის ყველა ტბისპირას საუნაა. ჰოდა, ტრადიცია გვქონდა _ ყოველ კვირას საუნაში მივდიოდით, მერე ყინულს ვამტვრევდით და ცივ წყალში ვბანაობდით
_ ისე, ბაქრაძე წლების განმავლობაში ნაცების სახე იყო...
_ ვანო, დავიჯერო, ისეთი ბავშვობის მეგობარი არ გყავს, რომელთანაც დღეს ურთიერთობა აღარ გაქვს?
_ ყველასთან ისეთი ურთიერთობა მაქვს, როგორიც ადრე მქონდა...
_ დროსთან ერთად ადამიანებიც იცვლებიან და ეს ჩვეულებრივი ამბავია. დღეს ბაქრაძე იმას აკეთებს, რაც მისი ინტერესია.
_ ბაქრაძის ინტერესი „ოცნების“ ინტერესთან თანხვედრაშია?
_ სამწუხაროდ, ევროპული საქართველო ივანიშვილის პროექტია.
_ ხომ იცი, ამ განცხადების მერე ის ქალბატონი გამოვა და შენზე რაღაცეებს დაიწყებს.
_ ის ქალბატონი დიდი ხანია, ჩემზე საუბრობს...
_ შენც „გიჟ-თამარას“ ეძახი?
_ არა, ასეთ პატივს არ დავდებ, თუმცა ყველამ იცის, რომ ევროპულ საქართველოში „ჩერგოვშინაა“.
_ ...კოტე, როგორც ნაციონალური მოძრაობის წევრი, თავს დაცულად გრძნობ ანუ შინიდან რომ გამოდიხარ, იმის განცდა ხომ არ გაქვს, რომ ვინმე გამწარებული დაგესხმება?
_ მე ასეთი რაღაც არ მიგრძვნია. მაგალითად, გვახსოვს ვითომ პოლიტპატიმრების აქცია ეროვნულ ბიბლიოთეკასთან, რომელიც მართული იყო...
_ ჩიორას გატეხილი ცხვირიც გვახსოვს...
_ დიახ... კორცხელიც მართული იყო და ჭიაბერაშვილის გალახვაც.
_ მელიამ პრემიერს ბრალდებები რომ წაუყენა, ეგეც ხომ მართული იყო?
_ „ქართული ოცნების“ დეპუტატებმა გადაწყვიტეს, რომ ეს ისე გაეყიდათ, როგორც პროვოკაცია, მაგრამ პროვოკაციაა, როცა პრემიერს მუხთარლისა თუ ჩატაევზე კითხვებს უსვამ? იცი, პრემიერი რაზე გაფუჭდა? -როცა სიმართლე ვუთხარით, შენს გვერდით ბატონი გახარია ზის, რომელსაც პრემიერად ამზადებენო...
_ ჰოდა, სწორედ ეს იყო პროვოკაცია...
_ ამაზე ყველა ლაპარაკობს და პროვოკაცია რატომ იყო?
_ ისე, არ გამიბრაზდე და, შენ და მთელი ნაციონალები მელიას კეთილები ხართ და გინება „შეიწერეთ“?
_ (იღიმის) არ ვიცი, პრემიერი კონკრეტულად ვის გულისხმობდა, მაგრამ შემიძლია, ქუჩაში გაგიშვათ და ნახავთ, ხალხი ხელისუფლებას როგორც აგინებს _ უფრო ახლობლებზეცაა საუბარი, ვიდრე კეთილებია და პოლემიკაში ნუ შევალთ. ისიც საზოგადოებამ გადაწყვიტოს, პრემიერის ასეთი საქციელი „ოცნების“ პრობლემაა თუ ნაციონალური მოძრაობის!
_ მოკლედ, „მიჰა ჰამოვა“?
_ მიშა სააკაშვილი ახალგაზრდა პოლიტიკოსია და ათი წლის მერეც, ისეთვე ენერგიული იქნება, როგორიც დღესაა!
_ შეიძლება, მაგრამ ჩამოვა?
_ დამერწმუნე, მისი აქტიურობა არ მოიკლებს, პირიქით მოიმატებს!
_ ვამბობთ ნაცმოძრაობას, ვგულისხმობთ სააკაშვილს და პირიქით?
_ ნაცმოძრაობა იდეოლოგიაზე დაფუძნებული პარტიაა.
_ კოტე, საუბარი გაგვიგრძელდა. ჰოდა, ბოლო კითხვა დამისვი და თავს დაგანებებ...
_ კითხვა მე დაგისვა?
_ კი, პრობლემაა?
_ სხვა თემაზე აღარ გადავალ და გკითხავ _ ურთიერთობაში ბალანსი საჭიროა თუ არა?
_ ცხადია, საჭიროა _ ბოლოს და ბოლოს, ბალანსი მზესა და მთვარეს შორისაც არსებობს!
ვანო პავლიაშვილი

მსგავსი

დაბრუნება დასაწყისში