Menu
RSS

გედევან ფოფხაძე: „ვაფრთხილებდი მოსახლეობას და პასუხისმგებლობა სხვას რატომ უნდა დაეკისროს?“

ადგილობრივი თვითმმართველობის არჩევნების შემდეგ საქართველოს რამდენიმე მუნიციპალიტეტში ხელისუფლებამ, შეიძლება, ითქვას, პოზიციები დათმო. ბორჯომის მუნიციპალიტეტის საკრებულოში ოპოზიციამ უმრავლესობა მოიპოვა და საკრებულოს თავმჯდომარედ ,,პატრიოტთა ალიანსის'' წარმომადგენელი ზაზა ჩაჩანიძე აირჩია. ჩაჩანიძე წინა მოწვევის საკრებულოს თავმჯდომარეც გახლდათ, ოღონდ მაშინ სახელისუფლებლო გუნდს წარმოადგენდა, თუმცა არჩევნებამდე რამდენიმე დღით ადრე ,,ოცნებიდან'' ოპოზიციურ პარტიაში ,,გადაპორტირდა''. ბორჯომის მუნიციპალიტეტის საკრებულოს პირველი სხდომა ხმაურიანი იყო და შეხლა-შემოხლის ფონზე ჩაიარა. მუნიციპალიტეტის მერი და ,,ოცნების'' დეპუტატები საკრებულოს ახალ შემადგენლობას ლეგიტიმურად არ მიიჩნევენ. ბორჯომში შექმნილი ვითარების შესახებ ,,ვერსია'' მაჟორიტარ დეპუტატს, გედევან ფოფხაძეს ესაუბრა:
_ ბატონო გედევან, რატომ ვერ მოიპოვა ,,ოცნებამ'' ბორჯომის საკრებულოში უმრავლესობა?
_ დემოკრატიაა ქვეყანაში. ადამიანები იმას ირჩევენ, ვინც უნდათ. არ მგონია, რომ გადამწყვეტი მხოლოდ ,,ოცნების'' მიმართ საზოგადოების სიმპათია-ანტიპათია იყო, რადგან ,,პატრიოტთა ალიანსის'' კანდიდატი ერთი თვით ადრე ,,ოცნების'' საკრებულოს თავმჯდომარე გახლდათ. ვერ ვიტყვი, რომ ბორჯომში ,,ოცნებას'' მხარს არ უჭერენ, თუმცა წინასაარჩევნოდ საზოგადოებას გარკვეული საკითხები აინტერესებდა და კითხვებიც ჰქონდა...
_ კონკრეტულად რა კითხვები ჰქონდა მოსახლეობას?
_ არის გარკვეული საკითხები, რომლებზეც პრინციპულად არ ვსაუბრობ.
_ არჩევნების შედეგზე ზაფხულში მომხდარმა ხანძარმა გავლენა იქონია?
_ ვფიქრობ, არა. პრემიერი და მთავრობა მუშაობდა, რომ პრობლემა გადაეჭრათ. სტიქიური უბედურება ყველა ქვეყანაში ხდება. ხელისუფლებამ შეიძლება მყისიერი რეაგირება ვერ მოახდინა, მაგრამ მთავარია დამოკიდებულება. ხანძრის დროს რაღაცები მეც არ მომეწონა. გამგებელს პრემია არ უნდა აეღო, ეს მარაზმია. არასწორია, თითქოს ,,ოცნება'' არ იყო მობილიზებული. სხვა მხრივ, მუნიციპალიტეტის მიმართ პრეტენზიები თავის დროზე მეც მქონდა. პრობლემა იქნება ახლაც, როცა მერი ,,ოცნების'' წარმომადგენელია, საკრებულოში კი ოპოზიციური განწყობაა. ასეთი გაერთიანებების არ მჯერა. ნაცმოძრაობა, ,,ევროპული საქართველო'', ლეიბორისტები და ,,პატრიოტთა ალიანსი'' ღირებულებებით, იდეოლოგიითა და ელექტორატით ერთი არაა. საკრებულოში რაღაც კონიუნქტურის გამო შეიკრიბნენ, კომისიები გადაინაწილეს, რომლებშიც ,,ოცნების'' დეპუტატები არ შეიყვანეს. კომისიის ხელმძღვანელობა და ბიურო მთლიანად ოპოზიციამ დააკომპლექტა, ამიტომ ურთიერთობა გართულდება. ეს რომ ბორჯომის განვითარებას შეუშლიდა ხელს, წინასაარჩევნოდ ვეუბნებოდი ამომრჩეველს. ამას ჯობდა, მერიც ,,პატრიოტთა ალიანსის'' წევრი გამხდარიყო. ცენტრალურ ხელისუფლებასთან შეიძლება რთული ურთიერთობა ჰქონოდათ, მაგრამ მუნიციპალიტეტი მაინც იქნებოდა ერთიანი.
_ ეს დაპირისპირება მუნიციპალიტეტის პრობლემებზე როგორ აისახება?
_ დაპირისპირება პრობლემების გადაწყვეტის საკითხში დადებით როლს არ ითამაშებს. ეს ისედაც ხდებოდა ბორჯომში ბოლო ორი-სამი წელი. გამგებელს და საკრებულოს თავმჯდომარეს ერთმანეთთან კონფლიქტი ჰქონდათ და ამ ფონზე უამრავი საკითხი ვერ წყდებოდა. არჩევნების ამოცანაა, ავირჩიოთ გადაწყვეტილების მიმღები ძალა, რომელიც პასუხისმგებლობას აიღებს ადამიანების პრობლემების მოგვარებაზე. ამ შემთხვევაში გამოდის, რომ პასუხისმგებლობა აღარავისზეა, საკრებულოს და მერს შეუძლია ერთმანეთს გადააბრალონ პასუხისმგებლობა და პრობლემები დარჩეს პრობლემებად. არადა, ბორჯომს ბიუჯეტი, ბოლო 4 წელში 7-8 მლნ ლარით გაეზარდა. მთავარია, ეს თანხა რაციონალურად დაიხარჯოს.
_ როცა ხალხის პრობლემები მმართველი რგოლების დაპირისპირების გამო არ გვარდება, პასუხისმგებლობა ცენტრალურმა ხელისუფლებამ არ უნდა აიღოს? თქვენ, როგორც დეპუტატმა, რა როლი უნდა ითამაშოთ ამ საკითხში?
_ ჩემი როლი წინასაარჩევნოდ ვითამაშე, როცა ამომრჩევლებს ამ პრობლემებს ვუხსნიდი. მათ კი მაინც ეს გადაწყვეტილება მიიღეს და პასუხისმგებლობა სხვას რატომ უნდა დაეკისროს? პოლიტიკური პროცესი დემოკრატიულ საფუძველზე ხალხის გარეშე შეუძლებელია. თუ რომელიმე მუნიციპალიტეტში ოპოზიციურ პარტიას აირჩევენ და ის ბაკქანალიას მოაწყობს, ცენტრალური ხელისუფლება დამნაშავე არაფერშია. ბორჯომში ოპოზიციაში 9 წელი ვიყავი, საკრებულოს წევრები ვიყავით მე და ჩემი ძმა და ჩვენი ფუნქცია გვესმოდა _ ვასაბუთებდით, რას არ აკეთებდა სწორად ხელისუფლება. ხელისუფლების ხელში აღებაზე კი პრეტენზია არასდროს გვქონია, სააკაშვილის დროს გამგებლად ან საკრებულოს თავმჯდომარედ მოსვლაზე არასდროს მიფიქრია, რადგან მიმაჩნდა, რომ ეს არც მუნიციპალიტეტს წაადგებოდა. ,,კავკასიური ცარცის წრის'' პრინციპია _ თუ გიყვარს ვიღაც, სჯობს ხელი გაუშვა, თუ ძალიან დაქაჩავ, დაზარალდება. ბორჯომი ზარალდება, რადგან ვიღაცებმა ჩათვალეს, სხვა ცუდად მართავს და მე უკეთ შემიძლიაო. ამ მოცემულობაში ბორჯომისთვის უკეთესი იყო, მოსულიყო ,,ოცნება'' უმრავლესობით და ოპოზიციას მისცემოდა საკუთარი ფუნქციების შესრულების შესაძლებლობა.
_ საკრებულოს თავმჯდომარე რომ ,,ოცნებიდან'' ოპოზიციაში არჩევნებამდე რამდენიმე დღით ადრე გადავიდა და ,,ოცნების'' დეპუტატები ახალი საკრებულოს შემადგენლობას არ აღიარებენ, ეს ნიშნავს, რომ ბორჯომში მმართველ ძალას კრიზისი აქვს?
_ წინასაარჩევნო პერიოდში ჩაჩანიძეს არ უსაუბრია რატომ გადავიდა ,,პატრიოტთა ალიანსში''. ის საკრებულოს თავმჯდომარედ ,,ოცნებამ'' გაიყვანა და ახლაც იგივე პოზიციაზეა, ოღონდ ,,პატრიოტთა ალიანსის'' მხრიდან.
_ ანუ, ოპოზიციაში იმიტომ გადავიდა, რომ ისევ თავმჯდომარე ყოფილიყო?
_ პოლიტსაბჭოზე რომ ეთქვა, ამ თანამდებობაზე დარჩენა მსურსო, არ გამოვრიცხავ, სტატუსი შეენარჩუნებინა. მეორე მხრივ, თუ ადამიანს გუნდში ყოფნა მხოლოდ სტატუსისთვის უნდა, არასწორია. მგონია, რომ ცენტრალური ხელისუფლების, შესაბამისად ,,ოცნების'' გარეშე ბორჯომისთვის სიკეთის გაკეთება ყველას გაუჭირდება. ახლა დროა, პარტიული ინტერესები გადავდოთ და ვთქვათ, რომ ბორჯომში ისეთმა ადამიანებმა უნდა აიღონ ინიციატივა, ვისაც ეს შეუძლია. თუ მარტო პარტიული სტანდარტით მივუდგებით ბორჯომელების პრობლემების გადაწყვეტას, იქნება დაპირისპირება და ნაკლებად იფიქრებენ ადამიანების დახმარებაზე.
_ მართალია, რომ თქვენ და თქვენს ძმას, ბესიკ ფოფხაძეს, რომელიც ბორჯომის არაერთი მოწვევის საკრებულოს წევრი იყო ბორჯომში დიდი გავლენა გაქვთ?
_ ვერ ვხვდები, ამას რატომ ამბობენ. ბორჯომში სახლი არ მაქვს და ჩემს ძმასთან ვცხოვრობ, ნულოვანი ქონებრივი დეკლარაცია მაქვს. დააკონკრეტონ, რას გულისხმობენ? ბიზნესი საერთოდ არ მაქვს, ახალდაბის სკოლაში საათები მაქვს, მოსწავლეებს გაკვეთილებს ვუტარებ. ვერც ჩაჩანიძე იტყვის, რომ მისი საკრებულოს თავმჯდომარეობის დროს დამირეკავს, რამე მითხოვია ან დამივალებია, ვერც _ გამგებელი. ჩემი ძმა საკრებულოში იურიდიული კომისიის თავმჯდომარე იყო და იმხელა გამოცდილება აქვს თვითმმართველობაში, ეს პოზიცია მისთვის დასამადლებელი არაა. ბესომ ამ არჩევნებშიც იყარა კენჭი მაჟორიტარად, მაგრამ ვერ გაიმარჯვა, სიაში არ იყო და საკრებულოში ამიტომ ვერ შევიდა, ესეც დემოკრატიის სტანდარტია. ალბათ ვიღაც იტყვის, რადგან არ აირჩიეს, ე.ი. დეპუტატმა ძმამ არ ივარგაო, არადა ესაა დემოკრატია.
_ ბორჯომის საკრებულოს უმრავლესობაში ოპოზიციაა, ქუთაისის მერს 18%-იანს ეძახიან, თიანეთის მერი დამოუკიდებელი კანდიდატი გახდა. გამოდის, ოპოზიცია მმართველი ძალის შესუსტებას ადგილობრივი მმართველობის დონეზე ცდილობს?
_ მგონია, რომ ამ მუნიციპალიტეტებში ,,ოცნება'' თავის გასაკეთებელს გააკეთებს და ეს დროებითი რეციდივები გამოსწორდება. ასეც რომ არ მომხდარიყო, იტყოდნენ, ,,ოცნება'' ნაცმოძრაობის გზით მიდისო. ჩვენი ამოცანა ძლიერი ქართული სახელმწიფოს შექმნაა. საზოგადოება უნდა დავარწმუნოთ, რომ ერთიანი გუნდი იყოს პოლიტიკაში, მაგრამ თუ ასეთი რეციდივები მოხდება, ტრაგედია არაა, ამით ცენტრალური ხელისუფლება არ ზარალდება.
_ საზოგადოებას პასუხისმგებლობას იმაზე აკისრებთ, რომ არჩევნებში ოპოზიციურ პარტიას დაუჭირეს მხარი? ამის გამო უნდა დაისაჯონ და მათი პრობლემები აღარ მოგვარდეს?!
_ ლოგიკა არის მაგაში. შენი არჩევანია, თუ ირჩევ ცუდ ხელისუფლებას, ან ისეთს, რომელიც არ არის გადაწყვეტილებისუნარიანი. ამ საქმეში ჩემი პასუხისმგებლობა ნაკლებია, რადგან ამ ყველაფერზე არჩვენების წინ საზოგადოებასთან ვსაუბრობდი.
_ აპირებთ ბორჯომში ჩასვლას და საკრებულოს წევრებთან, მერთან შეხვედრას?
_ ადგილობრივი თვითმმართველობის არჩევნებზე ორი თვე კარდაკარ ვიარე. ახლა ამ საკრებულოსთან შეხვედრას აზრი არ ექნება _ ჩხუბი და ყვირილი გაგრძელდება. ლეიბორისტების პარტიიდან საკრებულოს წევრი (გიორგი გიუაშვილი) ,,ოცნების'' ხელისუფლების გამგებლის მოადგილე იყო და რომ გადააყენეს ლეიბორისტებში გადავიდა. ვინც თანამდებობას მისცემს, მის მხარესაა და მას უნდა ავუხსნა რამე?
_ გიუაშვილს თქვენს ძმასთანაც ჰქონდა დაპირისპირება, არა?
_ კი, ჩემს ძმას ფიზიკური შეურაცხყოფაც მიაყენა. როცა ბესო მუნიციპალიტეტის მერი იყო, ეგ მასთან იურისტად მუშაობდა. თუ ვინმეს პირადი ამბიციების გამო შეუძლია ზღვარს გადავიდეს, ახსნა დავუწყო, რომ ბორჯომისთვის უკეთესია, ერთად ვიყოთ? ეს რომ გავაკეთო, უფრო მაღალი, პატრიარქის დონის ავტორიტეტი უნდა ვიყო. მე ამ სიტუაციაში მხარე, ,,ოცნების'' წარმომადგენელი ვარ...
_ და არჩეული მაჟორიტარი დეპუტატიც ხართ!
_ თუ ვიგრძნობ, რომ გამოვდგები მომრიგებლად, უკან არ დავიხევ, მაგრამ ეს განწყობა მხარეებისგან უნდა მოდიოდეს. რა რიტორიკაც ისმოდა ჩემ მიმართ, თუ ესაა ბორჯომში ოპოზიციის საერთო განწყობა, ჩემი კომუნიკაცია მათთვის არაფრისმთქმელი იქნება. ჩაჩანიძე წინა მოწვევის საკრებულოს პერიოდშიც არ მელაპარაკებოდა. მეც მიმაჩნია, რომ აქტიური და უხეში ჩარევა მაჟორიტარის მხრიდან, არასწორია. მათ საკუთარი ხედვა ჰქონდათ, ჩემგან დასახელებული კანდიდატები არ ყოფილან, რადგან მაშინ ,,თავისუფალ დემოკრატებში'' ვიყავი და ,,ოცნების'' გადაწყვეტილებებში არ ვმონაწილეობდი.
_ ამბობთ, რომ ბორჯომში ბევრი რამ არც თქვენ მოგწონდათ. მუნიციპალიტეტის მმართველობასთან რა კითხვები გქონდათ?
_ ბოლო 4 წლის მუშაობა არასწორ მენეჯმენტს ეფუძნებოდა. როცა საკრებულოს თავმჯდომარე და გამგებელი დაუპირისპირდნენ ერთმანეთს, ვუთხარი, რომ უნდა შერიგებულიყვნენ და ერთი საქმე ეკეთებინათ.
_ ბორჯომის მმართველი რგოლების ასეთ დაპირისპირებაზე ღიად საუბრობდით?
_ ასეთი საკითხების ღიად განხილვა კონფლიქტს ამძიმებს.
_ თუ ამ დაპირისპირების გამო ხალხის პრობლემები არ გვარდებოდა, აუცილებელი არ იყო ამაზე საჯაროდ გესაუბრათ?
_ მომეჩვენა, რომ მათ უფლებები და გავლენა ვერ გადაინაწილეს და ამაში არ ვერეოდი. საკრებულოს და გამგებლის ფუნქციებში არასდროს ჩავრეულვარ. ყველამ თავისი საქმე უნდა აკეთოს.
_ ოპოზიციის აზრით, შესაძლოა, ,,ოცნებამ'' ბორჯომის საკრებულოში უმრავლესობის მოსაპოვებლად ოპოზიციონერი დეპუტატების გადაბირება სცადოს. ასეა?
_ ალბათ მეკითხებით, გარკვეულ მორიგებაზე ხომ არ წავალთ. თუ ჩიხურ ვითარებაში ცდილობ ვიღაცებს პერსონალურად უთხრა, რომ ეს მოცემულობა აზარალებს ბორჯომს და ამ ვითარებაში ჩვენ გვერდით დადგომა უკეთესია, მაშინ გადაბირების მორალური ნეგატივი არ არსებობს. საკრებულოში თუ გავერთიანდებით არა პარტიული ნიშნით, არამედ ბორჯომის ინტერესებიდან გამომდინარე, გადავალთ კონსტრუქციულ ურთიერთობათა ჭრილზე და ამას გაიზიარებს 15 დეპუტატიდან რომელიმე, ამაში დასაძრახს ვერაფერს ვხედავ.
თათია გოჩაძე

დაბრუნება დასაწყისში