Recent Podcasts

საქართველოს ისტორიაში პირველად კალათბურთში მსოფლიო ჩემპიონატის საგზურის მოპოვებისთვის, მსოფლიოს 16 საუკეთესო ნაკრებს შორის მოხვედრისა და კალათბურთში ევროპის ჩემპიონატზე მეექვსედ ასპარეზობის შესაძლებლობისთვის პრემიერ-მინისტრმა და პარლამენტის თავმჯდომარემ საქართველოს ვაჟ კალათბურთელთა ეროვნული ნაკრების წევრები ღირსების ორდენზე წარადგინეს.
სახელმწიფო ჯილდო გადაეცემა საქართველოს ვაჟ-კალათბურთელთა ეროვნული ნაკრების შემადგენლობას -  მიხეილ ბერიშვილს, დუდა სანაძეს, რატი ანდრონიკაშვილს, გოგა ბითაძეს, ალექსანდრე მამუკელაშვილს, კახაბერ ჯინჭარაძეს, ბექა ბექაურს, ლუკა ლიკლიკაძეს, გიორგი ტურძილაძეს, დავით კაკუშაძეს, ბექა ბურჯანაძეს, გიორგი ცინცაძეს, თადუს მაქფადენს, გიორგი კორსანტიას, ალექსანდრე ფევაძეს, ლუკა მაზიაშვილს, მათე ხატიაშვილს, კამარ ბოლდუინს, გიორგი ოჩხიკიძეს, ოთარ ფხაკაძეს, ნიკოლოზ გაფრინდაშვილს, რევაზ როგავას, ჯოზეფ თომასონს;
ღირსების ორდენზე ასევე წარდგენილია საქართველოს ვაჟ-კალათბურთელთა ეროვნული ნაკრების სამწვრთნელო შტაბი - ილიას ზუროსი, ალექსანდარ ჯიკიჩი, მანუჩარ მარკოიშვილი, ანატოლი ბოისა, გეორგიოს ლიმნიატისი, დავიდ დუფორი, ფილიპ მიჰაილოვიჩი, მარკო ესპოსიტო, ირაკლი შიოშვილი, ნიკოლოზ ცინცაძე;
საქართველოს კალათბურთის ფედერაციის ხელმძღვანელობა - ფედერაციის პრეზიდენტი - ვიქტორ სანიკიძე; ფედერაციის გენერალური მდივანი - ლაშა გამყრელიძე; ფედერაციის პირველი ვიცე-პრეზიდენტი - დავით საყვარელიძე და ფედერაციის ვიცე-პრეზიდენტები - ნიკოლოზ ცქიტიშვილი და ვლადიმერ ბოისა.
სპორტის დარგში გამორჩეული მიღწევისა და გაწეული ღვაწლისთვის სახელმწიფო ჯილდოზე -  ბრწყინვალების ორდენზე წარდგენილნი არიან საქართველოს ვაჟ-კალათბურთელთა ეროვნული ნაკრების ყველაზე ტიტულოვანი წევრები: ორგზის ევროლიგის გამარჯვებული და ორგზის ესპანეთის ჩემპიონატის სეზონის საუკეთესო მოთამაშე - გიორგი შერმადინი; 2019-2020 წლების კალათბურთში ესპანეთის ჩემპიონატის გამარჯვებული - თორნიკე შენგელია.
პრემიერ-მინისტრმა და პარლამენტის თავმჯდომარემ ღირსეული სამსახურისთვის ღირსების მედლით დაჯილდოების მიზნით პრეზიდენტს წარუდგინეს საქართველოს ვაჟ-კალათბურთელთა ეროვნული ნაკრების პერსონალი.
ირაკლი კობახიძისა და შალვა პაპუაშვილის ერთობლივი წარდგინება საქართველოს პრეზიდენტ მიხეილ ყაველაშვილს გაეგზავნა.

თბილისი არენაზე ევრობასკეტი 2025-ის საკვალიფიკაციო ეტაპის მეხუთე ტურის მატჩში საქართველოს საკალათბურთო ნაკრებმა დანია 62:60 დააამარცხა. გამარჯვების შედეგად საქართველომ ეროვნული გუნდი ევროპის ჩემპიონატის ფინალური ეტაპის საგზურს მოიპოვა.

შეგახსენებთ, რომ საქართველოს საკალათბურთო ნაკრებმა FIBA ევრობასკეტის საგზური ზედიზედ მეექვსედ მოიპოვა.

მერაბ დვალიშვილი თბილისშია და მედიისთვის პრესკონფერენცია გამართა. UFC-ს ქვემსუბუქი წონის მოქმედმა ჩემპიონმა გულშემატკივრებს ემოციური დახვედრისთვის მადლობა გადაუხადა და სამომავლო ბრძოლებთან დაკავშირებით კითხვებს უპასუხა.

„ჩემთვის მთავარი იყო, რომ ერთხელ მაინც მომეგო ქამარი. ბევრი კარგი მებრძოლია, ვინც ეს ვერ შეძლო. მინდა, ყველაფერი გავაკეთო და ის არავის დავუთმო.

რაც შეეხება დარბაზის აშენებას, სახელმწიფოსგან მიღებული მილიონი ლარის ამ კუთხით დახარჯვა მსურს და ამ საკითხზე ვმუშაობ. სამწუხაროდ, ჩამოსვლისას ცოტა დრო მქონდა, ხომ ხვდებით, ეს საკითხი იოლად ვერ მოგვარდება. თუმცა შევეცდები, საქართველოში ამ სახეობის განვითარებაში ჩემი წვლილი შევიტანო“, – განაცხადა მერაბ დვალიშვილმა.

მერაბ დვალიშვილმა შერეულ ორთაბრძოლებში გამართული 23 შეხვედრიდან 19 მოიგო და 4 დათმო. უმარ ნურმაგომედოვთან მოპოვებული გამარჯვება მისთვის ზედიზედ მე-12 იყო.