Menu
RSS

შს მინისტრმა დაცვის პოლიციის დეპარტამენტის ახალი ხელმძღვანელი წარადგინა

შინაგან საქმეთა სამინისტროს დაცვის პოლიციის დეპარტამენტს ახალი ხელმძღვანელი ჰყავს. ამ თანამდებობაზე გიორგი ბაგრატიონი დაინიშნა. შინაგან საქმეთა მინისტრმა, ვახტანგ გომელაურმა, დაცვის პოლიციის დეპარტამენტის თანამშრომლებს, ახალი ხელმძღვანელი პირადად წარუდგინა. 

,,დაცვის პოლიციის დეპარტამენტის ახალი ხელმძღვანელი, გიორგი ბაგრატიონი პრინციპული ადამიანი, პროფესიონალი და კარგი მენეჯერია. ვფიქრობ, ის კარგად გაართმევს თავს ამ სამსახურს. ბევრი კარგი რამ გაკეთდა, ბევრი წინგადადგმული ნაბიჯია და ეს აუცილებლად გაგრძელდება'', _ განაცხადა ვახტანგ გომელაურმა დაცვის პოლიციის დეპარტამენტის თანამშრომლებთან შეხვედრაზე. 

მინისტრმა ხაზგასმით აღნიშნა, რომ თანამშრომელთა სოციალური უზრუნველყოფის გაუმჯობესება, საპოლიციო ინფრასტრუქტურის განვითარება და შესაბამისი სამუშაო პირობების შექმნა, კვლავ შინაგან საქმეთა სამინისტროს ერთ-ერთი, მთავარი პრიორიტეტი იქნება. 

ვახტანგ გომელაურმა მადლობა გადაუხადა დეპარტამენტის ყოფილ თავმჯდომარეს, გიგა ნიკოლეიშვილს, რომელიც ორი წლის განმავლობაში ხელმძღვანელობდა დაცვის პოლიციას. 

შეხვედრის შემდეგ, შინაგან საქმეთა მინისტრი და დაცვის პოლიციის ახალი თავმჯდომარე, დეპარტამენტში განხორციელებულ სიახლეებს გაეცნენ. 

,,სახელმწიფო სტრუქტურაში, ხუთი წლის განმავლობაში ვიმუშავე, კერძოდ, ქალაქ თბილისის მერიაში და მინდა, მადლობა გადავუხადო ქალაქის მერს, მთავრობას, საკრებულოს გამოცხადებული ნდობისთვის. დაცვის პოლიციის დეპარტამენტი ჩემთვის ახალი გამოწვევაა. ამ დეპარტამენტში მომუშავე 12 ათასი ადამიანი, საქართველოს მასშტაბით, ყველაზე მნიშვნელოვან ობიექტებს იცავს. დიდი მადლობა მინდა გადავუხადო ბატონ მინისტრს ამ ნდობის გამოცხადებისთვის და დღეიდან მზად ვარ, რომ განვახორციელო და განვაგრძო ის მიმართულებები და ცვლილებები, რაც ბოლო ორი წლის განმავლობაში, ამ დეპარტამენტში განხორციელდა“, _ განაცხადა გიორგი ბაგრატიონმა. 

ამ დრომდე, გიორგი ბაგრატიონი, ქალაქ თბილისის მუნიციპალური ინსპექციის საქალაქო სამსახურის უფროსი იყო. 2016-2017 წლებში, ის სამგორის რაიონის გამგებლის პოზიციაზე მუშაობდა, ხოლო 2015-2016 წლებში, თბილისის მუნიციპალიტეტის ზედამხედველობის საქალაქო სამსახურის უფროსი იყო. 2014-2015 წლებში, გიორგი ბაგრატიონს შპს „თბილსერვის ჯგუფის“ დირექტორის თანამდებობა ეკავა. 2004 წლიდან 2014 წლამდე, კერძო სექტორში, სხვადასხვა კომერციული ორგანიზაციაში, ხელმძღვანელ პოზიციებზე მუშაობდა; 2003-2005 წლებში _ საქართველოს ფინანსთა სამინისტროს დანაყოფებში საქმიანობდა. 

გიორგი ბაგრატიონი პროფესიით ეკონომისტია. 1998-2005 წლებში, დაამთავრა საქართველოს ტექნიკური უნივერსიტეტის საერთაშორისო ეკონომიკის ფაკულტეტის ბაკალავრიატი, შემდეგ მაგისტრატურა. 2012 წელს, დაამთავრა ამავე უნივერსიტეტის ბიზნეს-ინჟინერიის ფაკულტეტის დოქტორანტურა.

მსგავსი

დაბრუნება დასაწყისში