Menu
RSS

„ნებისმიერ კითხვაზე პასუხს თავისუფლად გავცემ“

რატომ გახდა თაკო ჩარკვიანის თანაგუნდელი და როგორ აპირებს სამართლიანობის აღდგენას _ მიხეილ რამიშვილის პოლიტიკური გზა

ფართო საზოგადოებამ ორი წლის წინ ანუ მას შემდეგ გაიცნო, რაც „ციანიდის სკანდალი“ აგორდა, თუმცა პროფესიულ წრეებში ცნობადობა არც მანამდე აკლდა. ყველაფერს თავი რომ დავანებოთ, უსამართლობას ჯერ კიდევ მაშინ დაუპირისპირდა, როცა ბევრი ხმის ამოღებას ვერ ბედავდა _ წამებით მოკლული სანდრო გირგვლიანისა და მისი ოჯახის უფლებებს იცავდა. ამბობს, რომ მისი ცხოვრების მთვარი მიზანი კანონის უზენაესობა და სამართლიანობაა. ამიტომ, გასაკვირიც არ არის, რომ ახალი პარტიის _ კანონი და სამართლის წევრი გახდა. ალბათ, მიხვდით, საუბარია უფლებადამცველ მიხეილ რამიშვილზე, რომელსაც ხალხი სამართლიანობისთვის მებრძოლ ადამიანად იცნობს. 

და მაინც, რატომ გადაწყვიტა პოლიტიკაში წასვლა? _ ამის და კიდევ სხვა საინტერესო თემების შესახებ წინამდებარე ინტერვიუში პარტიის _ „კანონი და სამართალი“ აღმასრულებელი მდივანი, მიხეილ რამიშვილი ისაუბრებს. 

მანამდე კი გეტყვით, რომ პარტია კანონი და სამართალი 10 მარტს დაფუძნდა. მისი თავმჯდომარე პუბლიცისტი თაკო ჩარკვიანია. პარტიის გენერალური მდივანი ირაკლი ღლონტია, პოლიტიკური _ ახალგაზრდა ადვოკატი, გიორგი ცობეხია. 

სხვათა შორის, პარტიის დამფუძნებელ ყრილობას, რომელიც „ექსპოჯორჯიაში“ გაიმართა, ათასამდე ადამიანი ესწრებოდა. პარტია მემარჯვენე-ცენტრისტულია და, როგორც პარტიის თავმჯდომარე, თაკო ჩარკვიანი ამბობს, ყველა პროდასავლურ ძალასთან ითანამშრომლებს. კანონისა და სამართლის ერთი-ერთი მთვარი ღერძი ანტიკორუფციული კანონის შექმნაა, რომლის თნახმადაც, კორუფციული მენტალიტეტი დასჯადი გახდება. პარტიის პროგრამის პრეზენტაცია, „ვერსიის“ ინფრომაციით, უახლოეს დღეებში გაიმართება. 

ახლა კი გთავაზობთ დაპირებულ ინტერვიუს მიხეილ რამიშვილთან.

 

_ ბატონო მიხეილ, როგორც ვიცი, პოლიტიკაში მოსვლას ადრეც აპირებდით, მაგრამ რატომ გადაწყვიტეთ, რომ ეს ნაბიჯი ახლა გადაგედგათ, როცა ქვეყანაში, პრაქტიკულად, პოლიტიკური კრიზისია, თან ახლადდაარსებული პარტიის სახე გამხდარიყავით? 

_ დიახ, პოლიტიკაში მოსვლას დიდი ხანია ვფიქრობდი იმიტომ, რომ 90-იანი წლებიდან მოყოლებული ვაკვირდები, თუ როგორ მდგომარეობაშია ქვეყანა და იმედის მარცვალიც კი ვერ დავინახე ანუ ვერც ერთი პარტია, რომელიც ხელისუფლებაში მოდიოდა, საქართველოსთვის ისეთ ნაბიჯებს არ დგამდა, რომელი ნაბიჯებიც წინ წაგვწევდა და ამდენი ხნის განმავლობაში, განვითარებადი ქვეყნების სიაში არ დავრჩებოდით. 

ამას გარდა, ჩვენს ქვეყანაში არ არსებობს სამართალი, არც _ კანონის უზენაესობა და ყველაფერი შერჩევითია. 

მოგეხსენებათ, ძალიან გახმაურებულ საქმეებში ვიყავი ჩართული და ბრძოლის ერთადერთი არეალი კანონიერების დაბრუნებაა, რადგან ყველა ის განაჩენი, რომელიც წინა ხელისუფლებას და ასევე, დღევანდელ ხელისუფლებაში მყოფ ე.წ. რეფორმირებულებს გამოჰქონდათ და გამოაქვთ, უკანონოა. 

მოკლედ, პოლიტიკაში წამოსვლის გადაწყვეტილება იმიტომ მივიღე, რომ მთელი ჩემი გამოცდილება ჩემს პირად კეთილდღეობასა და კარგად ყოფნას კი არა, არამედ, ევროპასა და ნატოსკენ მთელი ქვეყნის წინსვლას მოვახმარო! 

_ აშკარად კეთილშობიური მიზანია, მაგრამ არჩევანი მაინცდამაინც ახალ პარტიაზე რატომ გააკეთეთ? არ გერჩიათ, რომელიმე იმ პარტიის სახე გამხდარიყავით, რომელსაც პოლიტიკურ არენაზე საკუთარი ადგილი უკვე დამკვიდრებული აქვს? კანონისა და სამართალის წევრი იმიტომ ხომ არ გახდით, რომ ახალ პარტიასთან ერთად, პოლიტიკაში ფეხს უფრო ადვილად მოიკიდებთ? 

_ ჯერ ერთი, ჩემი ცხოვრების პრინციპი კანონი და სამართალია. ამ პარტიასაც სწორედ ასე ჰქვია _ კანონი და სამართალი 

მეორეც, იცით, საქმე რაშია? _ ამ წლების განმავლობაში შანსი ერთხელ კი არა, რამდენჯერმე ჰქონდათ და ხელისუფლებაში ხალხის ნებით ბრუნდებოდნენ, მაგრამ კარგი, აბსულუტურად არავის გაუკეთებია. პირიქით, ყველა სიტუაციას აუარესებდა. 

საქმიანი ურთერთობა შესაძლებელია და პოლიტიკა გარკვეულ ურთერთობას ითვალისწინებს, მაგრამ არ შემეძლო, მათი სახე გავმხდარიყავი, რომელთა ქმედებები, პოლიტიკა თუ მმართველობა ჩემთვის მიუღებელია! ამიტომ, ყოველთვის მინდოდა, რომ მესამე დამოუკიდებელი ძალა ყოფილიყო, რომელიც სამართლიანი, არაამბიციური პატრიოტებით დაკომპლექტდებოდა. 

დარწმუნებული ვარ, რომ თაკო ჩარკვიანი და ის ადამიანები, რომლებიც ამ პარტიაში არიან, საქართველოსთვის, მართლაც, კარგს გააკეთებენ! 

_ ანუ იმაში, რომ ახალი პარტიის სახე გამხდარიყავით, გადამწყვეტი როლი თაკო ჩარკვიანის ფაქტორმა შეასრულა? 

_ დიახ, თაკოს ფაქტორი ერთ-ერთი გადამწყვეტი იყო. 

ასევე, მნიშვნელოვანია გარემოცვა _ იგივე ირაკლი ღლონტი და ახალგაზრდული ფრთა, რომელიც პარტიის საქმიანობაშია ჩართული. 

კონსულტაციები, რა თქმა უნდა, გვქონდა და, სიმართლე გითხრათ, სანამ გარკვეული საკითხები არ შევაჯერე, თაკო ჩარკვიანს გადაწყვეტილი პასუხი არ ვუთხარი. 

_ მაინც, რა საკითხები შეაჯერეთ? ეს დეტალები თქვენს პროფესიულ საქმიანობას ხომ არ უკავშირდებოდა? 

_ არა, ეს საკითხები მხოლოდ ერთ პრინციპს უკავშირდებოდა. 

_ სახელდობრ? 

_ ვიყავით თუ არა დამოუკიდებლები?! 

_ ვიდრე პარტიაში გაწევრიანდებოდით, იმის გარკვევას ცდილობდით, კანონი და სამართალი ფინანსურად დამოუკიდებელია თუ არა? 

_ დამოუკიდებლობაში პოლიტიკურ დამოუკიდებლობას ვგულისხმობ ანუ არ შემიძლია, ისეთ პარტიაში ვყოფილიყავი, რომელიც ვინმეს სატელიტია. 

ჩემი აზრით, როცა საქმეს აკეთებ და რაღაცის მიღწევა გინდა, ყველაფერი ეს დამოუკიდებლად უნდა აკეთო. საქმიდან გამომდინარე, შეიძლება, პოლიტიკური ურთერთობები გქონდეს, მაგრამ პროგრამა დამოუკიდებელი სუბიექტის მიერ უნდა იყოს დაწერილი. დავინახე, რომ კანონი და სამართალი არავის სატელიტს არ წარმოადგენს! 

_ იმას თუ მიაქციეთ ყურადღება, რომ კანონი და სამართალი გაერთიანებულ ოპოზიციასთან აპირებს თანამშრომლობას და, უფრო მეტიც, მასთან ერთად კოალიციურ მთავრობაში მოსვლასაც გეგმავს? 

_ თანამშრომლობა სატელიტობას არ ნიშნავს! ასე რომ, თანამშროლობა, კი ბატონო, მისაღებია. 

_ იმის გამო, რომ უკვე პოლიტიკოსი ხართ, პროფესიულ საქმიანობაში ხელი ხომ არ შეგეშლებათ? 

_ არანაირად! 

_ აი, თუნდაც „ციანდის საქმე“ ავიღოთ, რომელიც ისედაც პოლიტიკურია და ამის შემდეგ უფრო მეტი პოლიტიკური ელფერი ხომ არ მიეცემა? 

_ ასეთ შეფასებას ვერანაირად მივცემ! 

_ დამისაბუთეთ, რატომ? 

_ იმიტომ, რომ ეს აბსოლუტურად დამოუკიდებელი საქმეა, რომელიც ჩემს პროფესიას მხოლოდ და მხოლოდ ერთი ნიშნით ეხება. 

_ ეს რა ნიშანია? 

_ რა და, _ უსამართლობა. ჩემი პოლიტიკური საქმიანობის მთავარი მიზანიც სწორედ ის არის, რომ უსამართლობა აღმოიფხვრას და, საპარლამენტო რესპუბლიკის პირობებში, ის მახინჯი საკანონმდებლო ბაზა შეიცვალოს, რომელიც დღეს არსებობს! 

_ ბატონო მიხეილ, სანამ პოლიტიკაში წასვლის გადაწყვეტილებას საბოლოოდ მიიღებდით, მამა გიორგი მამალაძესთან კონსულტაცია ხომ არ გაიარეთ? 

_ საერთოდ, გადაწყვეტილებას ისე ვიღებ, რომ არავის არაფერს ვუთანხმებ. 

_ შეთანხმება არც მითქვამს, უბრალოდ, დეკანოზი საქმის კურში ხომ არ ჩააყენეთ, რომ ახალი პარტიის სახე ხდებოდით? 

_ არა. გადაწყვეტილება მივიღე და ამის შესახებ პარტიის საჯარო პრეზენტაციის შემდეგ გაიგეს. 

_ თუ იცით, თქვენს პოლიტიკაში გამოჩენას საპატრიარქო, უფრო სწორად, საპატრიარქოს ადმინისტრაცია როგორ შეხვდა? 

_ არ ვიცი. უმჯობესია, ამის შესახებ იქ მყოფ გარკვეულ პირებს ჰკითხოთ. 

ისე, ყველამ კარგად იცით, ჩემდამი მათი დამოკიდებულება როგორი მიზანმიმართულიცაა. 

რაც შეეხებათ სასულიერო პირებს, პირველ რიგში, მამა გიორგის, ვისთანაც კონტაქტი მაქვს, ეს გადაწყვეტილება აბსოლუტურად დადებითად მიიღო! 

_ თქვენი პოლიტიკაში წასვლა „ციანიდის საქმეს“ სხვა კალაპოტში ხომ არ გადაიყვანს? 

_ არა! 

_ ესე იგი, არ უნდა ველოდოთ, რომ პოლიტიკოსი მიხეილ რამიშვილი, ამ საუკუნის საქმის შესახებ უფრო მეტს იტყვის, ვიდრე ადვოკატი მიხეილ რამიშვილი ამბობდა? ბოლოს და ბოლოს, ახლა, როგორც პოლიტიკოსი, ვარაუდებსა თუ ვერსიებშიც უფრო თავისუფალი იქნებით. ვცდები? 

_ მესმის, მაგრამ მინდა, ერთი რამ გაითვალისწინოთ. 

_ რა უნდა გავითვალისწინოთ? 

_ ამ საქმესთან მიმართებაში, ნაკლებ თუ მეტ ლაპარაკს არანაირი სტატუსი არ სჭირდება, გარდა იმისა, რომ საქმეში უშუალოდ იყო ჩართული და იმ ფორმატს, რომელშიც ხარ ჩართული, აბსოლუტურად ფლობდე! 

ისე, ახლა გაჩუმებულები იმიტომ ვართ, რომ მამა გიორგისგან გარკვეული თხოვნაა... რაღაც დადებითის მოლოდინში ვართ და საპატრიარქოს პოზიციას ველოდებით. 

_ რასთან დაკავშირებით? 

_ იმასთან დაკავშირებით, მამა გიორგის შეწყალებაზე პატრიარქი პრეზიდენტს მიმართავს თუ არა. 

_ აქამდე არც თქვენ და არც საზოგადოებას არ ჰქონია მოლოდინი, რომ საპატრიარქო გიორგი მამალაძის შეწყალებას მოითხოვდა და ახლა რატომ გგონიათ, რომ საპატრიაირქოს ადმინისტრაცია ამ ნაბიჯს გადადგამს? გარკვეული პირები დეკანოზის წერილმა ხომ არ შეაშინა, რომლის შინაარსის გასაჯაროვება თავად საპატრიარქომ მოითხოვა? 

_ ზუსტად არ ვიცი, ამ წერილში რა ინფორმაციაა ასახული, თუმცა ის დარღვევები ცნობილია, რაზეც მამა გიორგი მუშაობდა. 

ნათქვამია, თაგვმა თხარა, თხარაო, კატა გამოთხარაო. აი, სწორედ ასე დაემართა მამა გიორგის _ საპატრიარქოში ძალიან ბევრ უკანონობას ჰქონდა ადგილი, კორუფციული გარიგებაც მრავლად იყო. 

ასევე, არსებობენ საერო პირები, რომლებიც საპატრიარქოს არიან ამოფარებულნი და თავიანთ ბიზნესსაქმიანობას უკანონოდ ანხორციელებენ. აქამდე წმინდა სინოდის წევრებიც არ იყვნენ სრულად ინფორმირებულნი, საქმე რა უკანონობასთანაც გვქონდა. ყველა, ვინც კი წმინდა სინოდის წევრებიდან, დიდი ბრძოლის შედეგად, ციხეში შევიდა და მამა გიორგი ნახა, ადეკვატურ განცხადებას აკეთებს, ეს ადამიანი უდანაშაულოაო და შესაბამისად, იმასაც ამბობს, რომ ის შეწყალებული უნდა იყოს. 

სწორედ ამ განცხადებებიდან გამომდინარე, თავს ვიკავებთ და ბევრ სხვა თემაზე საუბარი აღარ გვინდა. ეს შიდა სამზარეულოა. 

_ უკაცრავად, შიდა სამზარეულო რა არის? 

_ ის საკითხები, რომელთა შესახებაც მამა გიორგი დაჟინებით ითხოვს, რომ წმინდა სინოდის წინაშე წარსდგეს და ისაუბროს. 

მოკლედ, იქიდან გამომდინარე, რომ მერე, გარკვეულმა ჯგუფმა არ განაცხადონ, ამა თუ იმ საკითხებზე ადვოკატებმა საჯაროდ ილაპარაკესო, ამ ეტაპზე ლოდინის რეჟიმში ვართ. 

_ კი ბატონო, მაგრამ ეს „ლოდინის რეჟიმი“ ერთგვარი გარიგება ხომ არ არის ანუ მამა გიორგის მხარე, რაღაცებს არ გაახმაურებს, სანაცვლოდ კი, საპატრიარქო პრეზიდენტს დეკანოზის შეწყალების მოთხოვნით მიმართავს? 

_ არა! ამას გარიგებას ვერ დავარქმევ. 

საერთოდ, ილაპარაკებს თუ არა, ეს მისი გადასაწყვეტია, მაგრამ ცნობილია, რომ თვით წმინდა სინოდის წევრები პასუხს ბევრ კითხვაზე ითხოვენ, პირიქით, სავალდებულოც იქნება, რომ მამა გიორგიმ ძალიან ბევრ საკითხზე ილაპარაკოს! 

ხაზს ვუსვამ: ერთადერთი, ვისაც არ უნდა, რომ მამა გიორგიმ ილაპარაკოს, ეს ქორეპისკოპოსი იაკობია, რომელიც ამბობს, რომ ჯერ კიდევ მარგველაშვილის პრეზიდენტობის დროს არ იყო წინააღმდეგი, მარგველაშვილს მამა გიორგი შეეწყალებინა, მაგრამ იმ პირობით, ციხიდან რომ გამოვიდოდა, არაფერზე ილაპარაკებდა. 

_ ისე, ბატონო მიხეილ, შეწყალება ხომ დანაშაულის აღიარებას ნიშნავს? 

_ არა! 

_ ეს როგორ? 

_ შეგიძლია აღიარო დანაშაული, სასჯელს დაეთანხმო და ამის შემდეგ შეგიწყალონ, მაგრამ უდანაშაულო ადამიანი იმ დანაშაულს, რომელიც არ ჩაუდენია და რომელიც ვერ მტკიცდება, ვერ დაიბრალებს. 

ასე რომ, დანაშაულის აღიარება სავალდებულო არაა, მით უმეტეს, შეწყალება პრეზიდენტის დისკრეციული უფლებაა ანუ პირი შესაძლოა, დანაშაულს არ აღიარებდეს და არც სასჯელს ეთანხმებოდეს, მაგრამ პრეზიდენტმა მაინც შეიწყალოს! 

 

_ რამდენიმე წლის წინ, მახსოვს, მითხარით, რომ „ციანიდის საქმის“ გამო გემუქრებდონენ... 

_ კი, ბატონო. 

_ პოლიტიკა თქვენთვის ერთგვარი ჯავშანი ხომ არაა, რომ პროვოკაციებისგან თავი დაიცვათ? 

_ თუ ვინმეს უნდა, რომ ადამიანს პროვოკაცია მოუწყოს და მისი პროვოცირება მოახდინოს, მნიშვნელობა არ აქვს, დეპუტატი ხარ თუ პრეიზდენტი, მაგრამ პოლიტიკას ისე არ ვიყენებ, როგორც იმუნიტეტს, რადგან ის ადამიანი ნამდვილად არ ვარ, რომ პარტია თავის დაცვის მიზნით მჭირდებოდეს! 

წეღანაც გითხარით, პოლიტიკაში იმიტომ წავედი, რომ მინდა, ჩემი გამოცდილება სახელმწიფოს წინსვლას მოვახმარო. 

_ გარანტია გაქვთ, რომ კანონი და სამართალი, კოალიციურ მთავრობასთან ერთად, ხელისუფლებაში მოვა? 

_ საზოგადოება ძალიან კარგად არჩევს, ვის რა მიზანი ამოძრავებს და ვინ რა კადრებით მოდის. 

_ კადრები რა შუაშია? 

_ ნათქვამია, კადრები იგებს და კადრები აგებსო. შეიძლება, ერთი-ორს ნეგატიური პოზიცია აქვს, მაგრამ ჩვენი ჯგუფის მიმართ ხალხის განწყობა დადებითია _ ქუჩაში რომ მივდივარ, ყველა რანგის ადამიანს კეთილგანწყობა და საუბრის სურვილი აქვს. 

დიახ, ჩვენი ჯგუფი პოლიტიკაში საჩვენებელია, რომელსაც ბრალს ვერავინ ვერაფერში დასდებს. მოქალაქეთა კავშირიდან დაწყებული, ხალხი მესამე ძალას ელის. მაშინ მოქკავშირიდან ნაციონალებში გადაბარგდნენ, მერე, „ქართული ოცნება“ რომ მოვიდა, გარკვეული პირები იქ შევიდნენ ანუ გარკვეული პირები ყველა მთავრობაში მსახურობდნენ. ჩვენს გუნდში კი ის ადამიანები ვართ, რომლებიც არც ერთ მთავრობას ვემსახურებოდით, ყოველთვის ხალხის სამსახურში ვიყავით და ვართ! 

_ გასაგებია, რომ პარტიის სახე ხართ, მაგრამ პოლიტიკურ ორგანიზაციაში თქვენი მისია რა არის ანუ პოლიტიკოს მიხეილ რამიშვილს რა იდეები აქვს? 

_ ჩემი იდეა ისაა, რომ კანონი უზენაესი იყოს! 

_ ეს ზოგადია, უფრო კონკრეტულლად? 

_ მაგალითად, პროკურატურასთან მიმართებაში გვაქვს პროგრამა, კერძოდ, ვის მიერ უნდა იყოს არჩეული მთავარი პროკურორი. 

ასევე, გვაქვს ანტიკორუფციული სქემა _ მოგეხსენებათ, დღეს მთელი სახელმწიფო კორუფციაშია ჩაფლული. ისეთი ნორმატიული და საკანონმდებლო ცვლილებები უნდა გატარდეს, რომლითაც კორუფცია აღმოიფხვრება. 

ამასთან, სპეციალისტებთან სასამართლოს, ზოგად განათლებას, კულტურას და, საერთოდ, ყველა სფეროს შევეხებით და მყარ, მტკიცე საკანონმდებლო ბაზას შევქმნით. 

სხვათა შორის, კონსტიტუციაც ისეთი მყარი და მტკიცე უნდა გვქონდეს, რომ ყველა ახალ ხელისუფლებას მასში ცვლილებები აღარ შეჰქონდეს! მაგალითად, აშშ-ს კონსტიტუციაში, რომელიც ამდენი საუკუნეა არსებობს, სულ რამდენიმე ცვლილებაა შეტანილი. ჩვენს კონსტიტუციას კი, ყველა ხელისუფლება, რომელიც მოდის, ისე ცვლის, გეგონება, მისი პირადი დღიურია. 

_ ბატონო მიხეილ, ხალხი დაგიჯერებთ? 

_ დიახ! 

_ მოსახლეობას პირადად თქვენი იმედი იმიტომ ექნება, რომ ცნობადი სახე ხართ? 

_ ცნობადობა რა შუაშია? 

_ აბა, შუაში რა არის? 

_ ძალიან დიდი მნიშვნელობა აქვს, ვინ რას და როგორ ამბობს. ხალხი გულუბრყვილო არაა და ყველაფერს ძალიან კარგად ხედავს. იგივე ციანიდისა თუ სანდრო გირგვლიანის საქმეზე იმის, რასაც ვამბობდი, თავიდან ცოტას სჯეროდა, მაგრამ ახლა ეს დამოკიდებულება რადიკალურადაა შეცვლილი ანუ სიტყვა საქმით დადასტურდა. 

დიახ, სიტყვის საქმით დადასტურება ჩვენს პარტიას საშუალებას მისცემს, რომ საზოგადოების უმაღლესი ნდობა ჰქონდეს! 

_ ზოგი ამბობს, პოლიტიკა ბინძურიაო. ყოველ შემთხვევაში, პოლიტიკაში ბევრი ინტრიგაა. ამისთვის მზად ხართ? 

_ მესმის, მაგრამ მოდით, ერთ რამეზე შევთანხმდეთ. 

_ რაზე? 

_ ყველაგან _ ხელოვნებაში, ადვოკატურასა თუ პოლიტიკაში, თუ იქ, თავიანთი მენტალობით, გაგებითა და ცხოვრების წესით ბინძური ადამიანები იქნებიან, სიბინძურე იქნება. 

_ გარე თვალით თუ შევხედავთ, დღემდე ქართულ პოლიტიკაში სწორედ ასეთი ადამიანების სიჭარბეა. 

_ არიან ადამიანები, რომლებიც არ ჩანან, მაგრამ ძალიან წესიერები, კეთილსინდისიერები და ძალიან დიდი ინტელექტუალები არიან! კანონი და სამართალი ორიენტირს სწორედ ასეთ ადამიანებზე აკეთებს. 

ჩვენ ხალხის სახელით კი არა, ხალხის ნებით ვილაპარაკებთ და ყველა ნაბიჯს ხალხის მოთხოვნით გადავდგამთ! ჩვენი გუნდის წევრები ქუჩაში თავისუფლად დავდივართ და საზოგადოების მხრიდან პოზიტივის მეტს არაფერს ვგრძნობთ! ჩვენს პარტიულ მოღვაწეობას სწორედ ასე გავაგრძელებთ! 

_ კი ბატონო, მაგრამ „ტროლები“ გააქტიურდნენ. „ფეიკნიუსების“ გამავრცელებლებს როგორ გაუმკლავდებით? 

_ იცით, საქმე რაშია? „ტროლები“ ხელოვნურად შექმნილი საზოგადოება, რაღაც ჯგუფია, რომელიც აბსოლუტურად არაადექვატურ კომენტარებს წერს. 

_ დიახ, მესმის, მაგრამ ნათქვამია, ალხანას ჩალხანა არ დაელევაო ანუ ვიღაზეც ამ არაადექვატურმა კომენტარმა შესაძლოა, გავლენა მოახდინოს. 

_ მოდით, შევთანხმდეთ, რომ არის ადამიანების კატეგორია, რომელმაც კარგად იცის, რომ თეთრი თეთრია, მაგრამ უნდა, რომ ეს თეთრი შავად მოეჩვენოს. ასე რომ, „ტროლების“ საქმიანობა სასაცილოა! უბრალოდ, სირცხვილია, რომ ამ „ტროლებს“ მარტო სირცხვილი კი არა, ნამუსიც არ აქვთ, რომ ასეთი არაფრისმთქმელი საქმიანობით არიან დაკავებულნი! 

ისინი, ვინც „ტროლებს“ დაუჯერებენ, „ტროლებისგან“ არაფრით განსხვავდებიან! „ტროლები“ გავლენა მხოლოდ იმ ადამიანებზე ახდენენ, რომლებიც საკუთარ „მე“-შიც კი მერყეობენ და პრინციპები არ აქვთ. 

ვინმესგან ნათქვამი ტყუილის დაჯერებას, ყველას ვურჩევ, მოვიდეს და პირდაპირ მე მკითხოს, მე, თაკო ჩარკვიანი როგორი პიროვნებები ვართ და, საერთოდ, ჩვენი გუნდი როგორი პირონებებით არის დაკომპლექტებული! 

_ გეკითხებით და მიპასუხეთ: როგორი პიროვნება ხართ? 

_ შემიძლია, ჩემი მინუსები გითხრათ. როცა საჭირო ყოფილა, გარკვეული შეცდომების გამო, ბოდიშიც მომიხდია. ასე რომ, ბოდიშის მოხდა არ მაშინებს! პირიქით, ეს ჩემთვის ღირსების ნაწილია იმიტომ, რომ თუ ვალდებული ხარ ბოდიში მოიხადო, უნდა მოიხადო და თუ არ იხდი, მაშინ უღირსი ხარ! 

მოკლედ, თუ ჭორიკნების დონეზე დახვალ, შენც ჭორიკანა გახდები! სჯობს, თუ რამე გაინტერსებს, ადამიანს პირდაპირ კითხო! 

ნებისმიერს ნებისმიერ კითხვაზე პასუხს თავისუფლად გავცემ და თუ ვინმეს ჩემი რამე არ მოსწონს, იმასაც ავუხსნი, ეს რამდენად მისაღები ან მიუღებელია! თუ რამე შეცდომა მომდის, ამ შეცდომის გამოსწორებაც შემიძლია და არასოდეს ვიტყვი, არაფერი შემშლია-მეთქი. 

უშეცდომო ადამიანი არ არსებობს, თუმცა არის შეცდომა, რომლის პატიებაც შეიძლება და არის უპატიებელი შეცდომა! საპატიებელი შეცდომა ბევრი მქონია, მაგრამ დარწმუნებული ვარ, რომ უპატიებელ შეცდომას არასოდეს დავუშვებ! 

_ კვირაზე მეტია, კანონი და სამართალი დაფუძნდა. თქვენ, როგორც პარტიის აღმასრულებელი მდივანი, საზოგადოების წინაშე პირველად რა ინიციატივით წარსდგებით? 

_ ინიციატივა, როგორც გითხარით, მრავალია, თუმცა პირველ რიგში, არსებული საკანონმდებლო ბაზის შეცვლაა. 

ამას გარდა, საზოგადოებასთან მჭიდრო კომუნიკაცია გვექნება. 

საერთოდ, ასეთი პრინციპი მაქვს: როცა ხალხის ნებაზე ხარ დამოკიდებული და ყველა შენი საქმე ხალხმა უნდა შეაფასოს, არ შეიძლება, ადამიანებთან კომუნიკაცია მარტო მაშინ გქონდეს, როცა ხალხი გჭირდება. 

როგორც კი ხალხის მსახურებაში შედიხარ, კარდაკარ, რეგიონ-რეგიონ უნდა იარო და რეალური პრობლემები შეისწავლო! 

_ ბატონო მიხეილ, არ მიწყინოთ და, ეს სიტყვები უფრო სადღეგრძელოს ჰგავს. ამომრჩეველს კი კონკრეტიკა ურჩევნია. 

_ კი ბატონო, კონკრეტულადაც გეტყვით: მაგალითად, რეგიონები უნდა განვითარდეს და ის, რაც ხალხს ეკუთვნის, ხალხს უნდა დაუბრუნდეს! 

ყველაფერს თავი რომ დავანებოთ, გლეხს საშუალება არ აქვს, მოსავალი მოიყვანოს, რადგან ყელაფერი ჩამორთმეული აქვს ანუ იმის თქმა მინდა, რომ საქართველოში საკუთრების უფლება დაცული არ არის. მიწით სარგებლობა ერთეულებს კი არა, ნებისმიერ მოქალაქეს უნდა შეეძლოს! 

ყველაზე მთავარი კი, კორუფციის აღმოფხვასთან ერთად, ისაა, რომ ჩვენი მიწა-წყლის უცხო ქვეყნის მოქალაქეებზე გასხვისება არ უნდა მოხდეს! 

_ კორუფცია მარტო ჩვენი კი არა, მთელი მსოფლიო პრობლემაა. თქვენი პარტიის იდეალისტების გუნდი კორუფციას როგორ ამოშანთავს? 

_ კორუფცია ძალიან მარტივად მარცხდება. 

_ მაინც, როგორ? 

_ წეღან ტყუილად არ გითხარით, კადრები იგებენ და კადრები აგებენ-მეთქი. როცა ხელისუფლებაში კოალიციური მთავრობით მოვალთ, ყველა თანამდებობაზე ისეთი კადრი დაინიშნება, რომელი თანამდებობაც ამ კადრისთვის იქნება შესაფერისი და თუ რომელიმე მათგანი უკანონობას ჩაიდენს, პასუხისმგებელი პირადად მე ვიქნები! 

_ საკმაოდ მძიმე პასუხისმგებლობას იღებთ, რადგან ადამიანების ამოცნობა ძნელია. 

_ არა, ადამიანების ამოცნობა ძნელი არ არის! 

_ დარწმუნებული ხართ? 

_ მახინჯი ყველგან გამოერევა, მაგრამ აქ საუბარი ე.წ. ცნობად ადამიანებზე არ არის. ძალიან ბევრი ცნობადი ადამიანია პირდაპირ კორუფციაშია ჩართული და სხვა ბევრ რამეშიცაა მხილებული. ამიტომ, არის ხალხი, რომელიც უცნობია, მაგრამ გამოცდილება აქვს და არც რამეშია მხილებული. 

დღეს სასამართლო რეფორმა არ არსებობს! უფრო მეტიც, მართლმსაჯულება გარდაცვლილია! უდიპლომო სასიძო გამიგია, მაგრამ უდიპლომო მთავარი პროკურორი აქამდე არ გამიგია! 

ასეთი რაღაცები ერთხელ და სამუდამოდ უნდა დასრულდეს! 

მოსახლეობის ეკონომიკურ-სოციალურ მდგომარეობაზე აღარაფერს ვამბობ _ ისედაც კარგად იცით, ხალხი როგორ მძიმე სიტუაციაშია! 

რაც შეეხება საგარეო პოლიტიკას, რომელიც საშინაო პოლიტიკასთან პირდაპირ შემხებლობაშია, ჩვენ საქართველოს დეოკუპაციას და ერთიანობას უნდა მივაღწიოთ! 

_ ესე იგი, ბატონო მიხეილ, დარწმუნებული ხართ, რომ ამ ქვეყანაში ოდესმე კანონიც იქნება და სამართალიც? 

_ დიახ, დარწმუნებული ვარ, თან ოდესმე კი არა, არამედ, კანონი და სამართალი ძალიან მალე იქნება იმიტომ, რომ უკვე დადგა დრო, როცა ქვეყანაში გარდატეხა ერთხელ და სამუდამოდ უნდა მოხდეს და საქართველო იმ ჭეშმარიტ გზაზე დადგეს, რომელსაც კანონი, სამართალი და თავისუფლება ჰქვია! 

_ ბატონო მიხეილ, წინსვლას და წარმატებებს გისურვებთ!

საბა საბაური

დაბრუნება დასაწყისში