Menu
RSS

„2020 წლის საპარლამენტო არჩევნებზე ივანიშვილი 300 მილიონის დახარჯვას გეგმავს!“

დაიშლება თუ არა გაერთიანებული ოპოზიცია და როგორ აპირებს გიორგი ვაშაძე ადამიანების „კორუფციის ბაცილისგან“ განკურნებას

 

2020 წლის საპარლამენტო არჩევნები მოახლოვდა და პოლიტიკური პროცესები აქტიურ ფაზაში გადადის. „ოცნების“ გადაწყვეტილებით, არჩევნები პროპორციული სისტემით და ბუნებრივი ბარიერით ჩატარდება ანუ პარლამენტში შესვლის შანსი ბევრ პარტიას ეძლევა. „ვერსია“ დაინტერესდა, როგორ აპირებს 12 სუბიექტისგან შემდგარი გაერთიანებული ოპოზიცია არჩევნებში მონაწილეობას მაშინ, როცა დაგეგმილი საკონსტიტუციო ცვლილებებით, პოლიტიკური ბლოკებისა თუ კოალიციების შექმნა იკრძალება. ამ და სხვა საკითხებზე „ვერსია“ გაერთიანებული ოპოზიციის ერთ-ერთ ლიდერს, გიორგი ვაშაძეს ესაუბრა.

_ ბატონო გიორგი, საუბრის დაწყებას პოლიტიკური ამბებით ვაპირებდი, მაგრამ წვიმის გამო, თქვენამდე ძლივს მოვაღწიე. წვიმის დროს თბილისში, საცობებისგან სრული კოლაფსი იქმნება. თბილისის მერი რომ იყოთ, ამ პრობლემას როგორ მოაგვარებდით? 

_ ამ საკითხზე კომპლექსური მიდგომები გვქონდა. საზოგადოებრივი ტრანსპორტი მოწყობილი არაა და ყველა მოქალაქეს აქვს მცდელობა, იყიდოს მანქანა, რადგან ძველია ინფრასტრუქტურა, არ გვყოფნის საზოგადოებრივი ტრანსპორტი. ამასთან, ტემპი სამუშაოების, რომელიც იწვევს გზების გადაკეტვას, კატასტროფულია. საერთოდ, ვფიქრობ, რომ ქალაქი სტრატეგიულად გადასაგეგმია. უნდა ჩამოიყვანო მძლავრი კომპანიები და დაგეგმო. თუ, მაგალითად, ლონდონის ცენტრში, ვიწრო ქუჩებზე შესაძლებელია, რომ სწრაფი განმავლობა უზრუნველყო, რატომ არ შეიძლება, ეს თბილისში გაკეთდეს? არც ერთი დიდი ქალაქი აღარ მიდის ესტაკადების მშენებლობისკენ და ცდილობენ, მოქალაქეებს მაქსიმალური მოტივაცია მისცენ, რომ გადავიდნენ საზოგადოებრივ ტრანსპორტზე. საზოგადოებრივი ტრანსპორტი კომპლექსურად უნდა მუშაობდეს, ჩვენთან კი ასე არაა. 

რაც შეეხება სამარშრუტო ტაქსებს, ეს პროცესი ერთხელ და სამუდამოდ უნდა დავასრულოთ, მაგრამ როცა თბილისის მერის მთავარი ამოცანა ისაა, რომ რაც შეიძლება, მეტი ფული იშოვოს და თავი პროექტებით მოიწონოს, ასეთი პრობლემებიც ამიტომ გვაქვს. 

_ თუ ხელისუფლებაში მოხვალთ, ამ პრობლემების მოგვარებას შეძლებთ და, საერთოდ, 2020 წლის არჩევნების მოახლოვების პარალელურად, მიმდინარე პოლიტიკურ პროცესებს როგორ აფასებთ? 

_ „ქართულმა ოცნებამ“, გახარიას დანიშვნით, პრაქტიკულად, არჩევნებისთვის მზადება დაიწყო და უნდა, რომ ეს არჩევნებიც საპრეზიდენტო არჩევნების მეორე ტურის მსგავსად ჩაატაროს _ ბევრი ფული, ადმინისტრაციული რესურსი, დაშინება, ნეგატიური კამპანია, სიძულვილის ენა გამოიყენოს და ოპოზიცია ისე წარმოაჩინოს, როგორც ნეგატიური მხარე. ამით ადამიანებს მიეცეს არჩევანი ცუდსა და უარესს შორის. ასევე, მნიშვნელოვანი კომპონენტიაა, რომ დასავლეთის ნდობა, პრაქტიკულად, დაკარგა ბიძინა ივანიშვილმა და შესაბამისად, საგარეო თვალსაზრისით, საყრდენს ეძებს ჩრდილოეთში, უფრო მეტად, რუსეთში. ამაზე ექსპერტები საუბრობენ და სიმპტომური იყო „დოიჩ ველლე“-ს ჰედლაინი _ „მოსკოვის კაცი პრემიერად“, რაც მე, როგორც საქართველოს მოქალაქეს, ძალიან არ მესიამოვნა, რადგან აქ შეიძლება, ბევრი ვაკრიტიკოთ ერთმანეთი, მაგრამ მინდა, ევროპასა და აშშ-ში ჩემს სამშობლოზე ნაკლები ნეგატივი წავიდეს. როგორც ვიცი, ივანიშვილს დაგეგმილი აქვს 300 მილიონი დოლარის დახარჯვა ამ არჩევნებზე, აქედან ნახევარს, ჩემი ინფორმაციით, ამოიღებენ ბიზნეს-სექტორიდან, ამიტომაც გააძლიერეს წნეხი ბიზნეს-სექტორზე. მეორე 150 მილიონს, ალბათ, თვითონ დადებს, რომ ხმები იყიდოს და ყველა მექანიზმი გამოყენოს, რადგან ჩვენ ვცხოვრობთ ქვეყანაში, სადაც კანონი არ არსებობს. 

_ ამ ფონზე ოპოზიცია ერთიანია? _ პარლამენტში ვერ თანხმდებიან ოპოზიციური ფრაქციები, კერძოდ, თქვენი პარტნიორი ნაციონალური მოძრაობა და ევროპული საქართველო. ყველაფერი ეს პოლიტიკურ პროცესზე როგორ აისახება? 

_ ჯერ კიდევ მარგველაშვილის პრეზიდენტობის პერიოდიდან, ოპოზიცია მნიშვნელოვან, პრინციპულ საკითხებზე აბსოლუტურად ერთიანია. ესაა საკონსტიტუციო და საარჩევნო ცვლილებები, ასევე, სასამართლო რეფორმა. არ შეიძლება, ოპოზიციას მოვთხოვოთ, რომ ყველა ტაქტიკური სვლა იყოს ერთმანეთთან შეთანხმებული, ასე ვერ იქნება. დღეს ქართული ოპოზიცია ყველა პრინციპულ საკითხზე ერთიან პოზიციას აყალიბებს. მაგალითად, ვიღაცას შეიძლება, არ მოსწონდა ბუნებრივი ბარიერი, მაგრამ კონსენსუსის არდარღვევიდან გამომდინარე, ამაზეც წავედით. 

_ ანუ, მოგწონთ, რომ მომავალი არჩევნები ბუნებრივი ბარიერის პირობებში ჩატარდება? 

_ საფრთხეს ვხედავ, რომ პატარა, მარტივად მოწყვლადი ჯგუფები შევიდნენ პარლამენტში, თუმცა თუ საპირწონედ დავდებთ აქამდე არსებულ სისტემასთან, ცა და დედამიწასავით განსხვავდება. 

_ რომ შევიდნენ პარლამენტში პატარა ჯგუფები, ამაში ცუდს რას ხედავთ? 

_ ივანიშვილი შეეცდება, რომ მათთან ფინანსურ გარიგებებში შევიდეს, თუმცა არ მიმაჩნია, რომ ამით ქვეყანა დაიქცევა, რადგან ყველაფერი ჩვენს მუშაობასა და ხალხის განწყობებზეა დამოკიდებული. 

_ ახალი საკონსტიტუციო ცვლილების მიხედვით, საარჩევნო კოალიციების შექმნა იკრძალება. გაერთიანებული ოპოზიცია როგორ აპირებს არჩევნებში მონაწილეობას, როგორც ერთი სუბიექტი? 

_ რამდენიმე ცვლილებაა, რომლითაც „ოცნება“ გაერთიანებული ოპოზიციის დაშლას ცდილობდა, რადგან საპრეზიდენტო არჩევნებმაც აჩვენა, რომ ჩვენ ვართ მთავარი ოპონენტი ხელისუფლებისთვის. ამიტომ აკრძალეს კოალიციები, გაზარდეს საბიუჯეტო დაფინანსება პარლამენტში დამოუკიდებლად შესული პარტიებისთვის და საარჩევნო მიზნებისთვის სხვა სახელის გამოყენების უფლებაც არ გაქვს, მაგრამ ტყუილად შრომობენ, რადგან გაერთიანებული ოპოზიცია ერთიანობას ინარჩუნებს! არ ვამბობთ როგორ, რადგან როგორც კი რაღაცას ვიტყვით, მყისიერად იწერება საკანონმდებლო ცვლილება, რომ ეს არ განხორციელდეს. 

_ შეიძლება, რომ ნაციონალური მოძრაობის „ქოლგის“ ქვეშ მოექცეთ? 

_ გაერთიანებული ოპოზიცია _ „ძალა ერთობაშია“-ს სახელით მიიღებს არჩევნებში მონაწილეობას, მეტ დეტალს მაშინ გეტყვით, როცა საბოლოო ცვლილებები დამტკიცდება. 

_ ცხელ პოლიტიკურ პროცესს ისიც ემატება, რომ თებერვალში, ვანო მერაბიშვილი ციხიდან გამოდის. ვრცელდება ინფორმაცია, რომ აქტიურ პოლიტიკაში ჩართვას აპირებს. მას თქვენ ხომ არ მოიწვევთ? 

_ ვანო მერაბიშვილი მნიშვნელოვანი ფიგურაა ქართულ პოლიტიკაში. რას გადაწყვეტს, ჯერ მისი აზრი უნდა მოვისმინოთ. გაერთიანებული ოპოზიცია ფართო კონგლომერატია, რომელიც 12 სუბიექტისგან შედგება და შეიძლება, კიდევ გაფართოვდეს, ჩვენ არ ვკეტავთ კარს გაერთიანების თვალსაზრისით, რადგან ჩვენი მთავარი ამოცანა „ქართული ოცნების“ ხელისუფლების შეცვლაა, იმ მთავარი მავნებლის, რომელმაც ამ მძიმე სიტუაციამდე მიგვიყვანა. დღეს ნამდვილად არ ვარ მზად, ვისაუბრო, რა იქნება ვანო მერაბიშვილთან დაკავშირებით, როგორც კი მიიღებს გადაწყვეტილებას, ჩვენც დავფიქრდებით. 

ზოგადად, ვანო მერაბიშვილის პიროვნება იმ რეფორმებში, რაც თავის დროზე განხორციელდა, იყო ძალიან მნიშვნელოვანი. მან, პოლიციის რეფორმიდან დაწყებული, ძალიან მნიშვნელოვანი როლი ითამაშა, რაც მთლიანად ჩვენი რეგიონისთვის მაგალითია. 

_ მას პოლიტიკური ტვირთიც ძალიან დიდი აქვს... 

_ გეთანხმებით. ყველას, ვინც 2012 წლამდე პოლიტიკური ლიდერი იყო, რა თქმა უნდა, აქვს პოლიტიკური ტვირთი. ამასთან, ეს ადამიანი 7 წელია, ციხეშია, არსებობს სტრასბურგის სასამართლოს გადაწყვეტილება, რომელსაც არ ასრულებს ხელისუფლება ანუ მისი უფლებებიც დარღვეულია. 

_ რადგანაც ნაციონალურ მოძრაობასთან თანამშრომლობთ, გკითხავთ: პატრიოტთა ალიანსმა მეორედ შეიტანა პარლამენტში წინა ხელისუფლების რეჟიმად გამოცხადების კანონპროექტი, პირველ მცდელობაზე 16 ხმა დააკლდა და ახლა არის შანსი, რომ ეს კანონპროექტი დამტკიცდეს. თუ არსებობს გუნდში გეგმა, რას აკეთებთ ასეთ შემთხვევაში? 

_ პატრიოტთა ალიანსი ამას მიზანმიმართულად აკეთებს, რადგან ელექტორალური ბაზისი უნდა შეინარჩუნოს და ყოველთვის უგდებს ხოლმე ბურთს „ქართულ ოცნებას“, რომელიც მერე, ამაზე აგებს კრიტიკას. არ მგონია, ამ დონემდე მივიდნენ, რომ აკრძალონ პოლიტიკური პარტია, რადგან ეს დემოკრატიული განვითარების თვალსაზრისით, შუა საუკუნეებში გადაგვაგდებს, მაგრამ თუ ეს მოხდა, ამის ალტერნატივას სწრაფად მოვიფიქრებთ, პრობლემა არაა. 

სიმართლე გითხრათ, პირველად მოვისმინე, რომ ამ კანონპროექტის მიღების საფრთხე არსებობს. ისე, რომ დავუკვირდეთ, „ქართული ოცნება“ იმდენად მძიმე დღეშია, რომ ყველაფერზე წამსვლელია და შეიძლება, მიიღოს კიდეც, მაგრამ ეს ვერ შეგვაშინებს და ვერ შეგვაჩერებს. 

_ უცხოეთში იმყოფებიან ზურაბ ადეიშვილი და მიხეილ სააკაშვილი. საინტერესოა, რა ფორმით აპირებენ ისინი 2020 წლის არჩევნებში ჩართვას, მით უმეტეს, რომ სააკაშვილს გარკვეულ ამომრჩეველში რეიტინგი აქვს... 

_ ღიად გეტყვით: სერიოზულად ვემზადებით 2020 არჩევნებისთვის, ბევრი საინტერესო ინიციატივა გვექნება, რასაც უახლოეს მომავალში ნახავთ, მაგრამ ყველა გადაწყვეტილება საარჩევნო სტრატეგიასთან დაკავშირებით, მიიღება საქართველოში. შეიძლება ბევრის აზრი, გამოცდილება გავითვალისწინოთ, მაგრამ გადაწყვეტილებას გაერთიანებული ოპოზიციის 12-კაცისგან შემდგარი საბჭო იღებს. რეკომენდაციებს მარტო მათგან კი არა, ნებისმიერისგან მივიღებთ. ნაციონალური მოძრაობის თავმჯდომარე გრიგოლ ვაშაძეა, რომელიც წარმოადგენს ნაციონალური მოძრაობის პოზიციას კოალიციაში. 

_ ისე, კულუარებში ამბობენ, რომ ნაციონალურ მოძრაობასა და გაერთიანებულ ოპოზიოციაში დიდი ბრძოლა მიდის გავლენებისთვის, ასეა? 

_ შიდა კონკურენცია აბსოლუტურად ჯანსაღ პროცესად მიმაჩნია. ეს ნიშნავს, რომ ორგანიზმი ცოცხალია, არსებობს სხვადასხვა მოსაზრება და ეს წარმატების მთავარი საფუძველია. რა თქმა უნდა, შიდა დისკუსიები არის, მაგრამ არც ერთი ეს დისკუსია იქამდე არ მიდის, რომ დავიშალოთ. 

_ ბატონო გიორგი, თქვენს ინოვაციურ იდეებზეც მოგვიყევით, ამჯერად რომელ ქვეყანაში ახორციელებთ რეფომას? 

_ უკრაინაში, პრეზიდენტმა ზელენსკიმ ჩემი უკრაინული გუნდის მიერ დამუშავებული კანონი მიიღო. ეს არის მოწმეთა დაცვის ინსტიტუტი. ამერიკულ პრაქტიკაზე დაყრდნობით, შევიმუშავეთ პროექტი, რომ თუ ადამიანი მისცემს ინფორმაციას საგამოძიებო ორგანოებს კორუფციულ სქემასთან დაკავშირებით, თანხიდან, რომელიც ბრუნდება ბიუჯეტში, 10% მას გადაეცემა, რაც ვფიქრობ, რევოლუციური ნაბიჯი იქნება კორუფციის წინააღმდეგ ბრძოლაში. ეს მოდელი ძალიან გამოგვადგება საქართველოშიც. მაგალითად, კალაძე რომ ბევრ ფულს აკეთებს, ვინმეს თუ ჩაუვარდა ხელში გარკვეული დოკუმენტაცია და მიიტანს ამას პროკურატურაში, კალაძეს მოუწევს კორუფციული ფულის დაბრუნება ბიუჯეტში და აქედან 10%-ის მიიღებს ინფორმაციის მიმტანი. 

_ გაქვთ მტკიცებულებები, რომ კალაძე ფულს აკეთებს? 

_ მაგალითად, „არქი ჯგუფს“ ყველა მშენებლობაზე მწვანე აქვს ანთებული, ბევრ სხვა სამშენებლო კომპანიას კი პრობლემა აქვს. ამასთან, როგორ იხარჯება საბიუჯეტო თანხები და როგორ ცხადდება ტენდერები, ამაზე სულ ვრცელდება ინფორმაცია. საერთოდ, მთავარი შემფასებელი ისაა, საქმე წინ მიდის თუ არა, თუ საქმე წინ არ მიდის და ბევრი საცობია, ეს იმიტომ ხდება, რომ გადაწყვეტილების მიმღები ადამიანების ტვინში კორუფციის ბაცილაა, რაც არ აძლევს საქმის კეთების შესაძლებლობას. მხოლოდ კალაძე არაა, მაგალითად, სამტრედია-გრიგოლეთის გზა ავიღოთ, ეს არის, ალბათ, საუკუნის თაღლითობა, რომელიც საქართველოში განხორციელდა _ 70 მილიონი დოლარი გადაურიცხეს უკრაინულ კომპანიას და ეს თანხა დაიკარგა. როცა იქნება მოწმეთა დაცვის ინსტიტუტი, რასაც უკრაინაში ვაკეთებთ, ბუღალტერი, ვინც ეს გადარიცხვა შეასრულა, მოიტანს ერთ ფურცელს, 10 %-ს ანუ 7 მილიონ დოლარს მას მივცემთ, მადლობას გადავუხდით და ბიუჯეტი დაიბრუნებს 70 მილიონ დოლარს, საურავებთან ერთად. 

_ ისე, ხელისუფლებამ რომ შეგმოგთავაზოთ თანამშრომლობა, მსგავსი რეფორმის განხორციელებაზე დასთანხმდებით? 

_ ყველა რეფორმის კონცეფცია, რასაც ვაკეთებთ, არის ღია კოდით ანუ არაფერია საავტორო უფლებებით დაცული. გააკეთონ, პრობლემა არაა, კითხვა აქვთ?_ მზად ვარ, ვუპასუხო, მაგრამ ვითანამშრომლო ადამიანებთან, რომლებისაც არ მჯერა, რომ მათი მიზანი ამ ქვეყნის ფეხზე დაყენებაა, ჩემთვის ძალიან რთულია.

თათია გოჩაძე

მსგავსი

დაბრუნება დასაწყისში