Menu
RSS

გია ვოლსკი: „სტრუქტურული ცვლილებები ახალი პრემიერ-მინისტრისა და საპარლამენტო უმრავლესობის ერთობლივი მუშაობის შედეგია!“

26 ივნისს პრემიერ-მინისტრმა, მამუკა ბახტაძემ სამთავრობო რეფორმა წარადგინა, რომლის მიხედვითაც საქართველოს აღმასრულებელი ხელისუფლება 13-ის ნაცვლად, 10 სამინისტროსგან შედგება. პრემიერის განმარტებით, სამინისტროების გაერთიანება შედეგზე ორინტირებული გათვლაა, რაც მნიშვნელოვნად შეამცირებს სახელმწიფოს დანახარჯებს და მეტად ეფექტურს გახდის სამინისტროთა მუშაობას. მიმდინარე სტრუქტურული ცვლილებების ფონზე ოპოზიცია და თავად ,,ქართული ოცნების'' დეპუტატებიც აცხადებენ, რომ ხელისუფლებაში კრიზისია და გამოსავალი ვადამდელი საპარლამენტო არჩევნებია. ,,ვერსია'' დაინტერესდა, მოვლენების როგორ განვითარებას უნდა ველოდოთ მიმდინარე სტრუქტურული ცვლილებების ფონზე და დგას თუ არა დღეს, საქართველოში, ვადამდელი საპარლამენტო არჩევნების ჩატარების აუცილებლობა? ,,ვერსია'' პარლამენტის ვიცე-სპიკერს გია ვოლსკის ესაუბრა.

_ ბატონო გია, როგორ აფასებთ იმ სამთავრობო ცვლი¬ლებათა პაკეტს, რომელიც პრემიერ-მინისტრმა პარლა¬მენტს წარუდგინა და რომელსაც უკვე მოჰყვა კრიტიკა, თუნდაც კულტურისა და განათლების სამინისტროების გაერთიანებასთან დაკავშირებით? 

_ ვფიქრობ, რაციონალური გადაწყვეტილებებია მიღებული, მაგრამ თავიდანვე უნდა ვთქვათ, რომ ეს არ არის ახალი პრემიერ-მინისტრის მიერ გამოგონილი. ეს საკმაოდ ვრცელი და ინტენსიური მოლაპარაკებების პროდუქტია. კულტურისა და განათლების სამინისტროების შერწყმის საკითხზე კრიტიკას ვერ გავიზიარებ, რადგან აქ არ არის ლაპარაკი მექანიკურ შერწყმაზე და იმაზე, რომ მხოლოდ მმართველობის სისტემა უნდა გაერთიანდეს, ეს არის კონცეპტუალური მიდგომა იმ საკითხებთან დაკავშირებით, რასაც ვფიქრობ, სერიოზულად ისაკლისებს ქართული საზოგადოება. პრემიერ-მინისტრმა შემოგვთავაზა კონცეფცია, რომლის მიხედვითაც ადამიანის განათლების პროცესს დაწყებული საბავშვო ბაღიდან, დამთავრებული უმაღლეს განათლებამდე და მეცნიერების დონემდე, მუდმივად თან უნდა ახლდეს ჩვენი კულტურული სიმდიდრის გაზიარება. სამწუხაროდ, განათლების სისტემა ძალიან მოსცილდა კულტურის სისტემას და მე თუ მკითხავთ, კულტურის სფერო უპირატესია და მისი დაკავშირება განათლების სისტემასთან მოიტანს იმ შედეგს, რასაც ჰქვია ადამიანური ხარისხიანი კაპიტალის ჩამოყალიბება სამომავლოდ. საქართველოს საუკეთესო ტრადიციები და კულტრული მემკვიდრეობა, რასაკვირველია, უნდა იყოს შერწყმული იმ პროცესთან, რომელშიც ახალგაზრდები ბავშვობიდან არიან ჩართულნი. 

_ ბიძინა ივანიშვილის პოლიტიკაში დაბრუნების შემდეგ, ხელისუფლებაში ძირეული ცვლილებები ანონსდებოდა. პრემიერ-მინისტრის შეცვლითა და მინისტრთა კაბინეტის ფორმირებით დასრულდება ეს პროცესი, თუ კიდევ სხვა მნიშვნელოვან ცვლილებებს უნდა ველოდოთ? 

_ ბიძინა ივანიშვილის საუბრის მთავარი თემა მხოლოდ ცვლილებები არ ყოფილა. მეორეც, პირდაპირ ბიძინა ივანიშვილთან დაკავშირება ამ კონკრეტული შედეგის, არ არის მართებული, ვინაიდან ცვლილებების საჭიროებაზე, კონცეფციასა და ხედვაზე, რასაკვირველია, ვისაუბრეთ, ბიძინა ივანიშვილის ჩართულობაც არის ინტენსიური, მაგრამ ამ სისტემის ჩამოყალიბება ახალი პრემიერ-მინისტრისა და საპარლამენტო უმრავლესობის ერთობლივი მუშაობის პროდუქტია. 

რაც შეეხება, შემდგომ ცვლილებებს, მგონია, რომ ამ ეტაპზე საგანგებო მნიშვნელობა აქვს არა მარტო მართვის რაციონალიზაციას, არამედ სტაბილურობის შენარჩუნებას. სტაბილურობა საკმაოდ მძიმე მუშაობისა და გადაუდებელი აუცილებლობიდან გამომდინარე მუშაობის შედეგია. ასე რომ, ამ ეტაპზე მიმდინარე ცვლილებები შეესაბამება მოცემულ პერიოდს, გეგმებს, დაგეგმილ ეკონომიკურ ზრდას და ვფიქრობ, საკმაოდ მასშტაბურია იმისათვის, რომ უახლოეს პერიოდში კიდევ უფრო მეტ ცვლილებაზე ვისაუბროთ. 

_ როგორ ხსნით იმ ფაქტს, რომ თქვენი გუნდის წევრი, დავით ჭიჭინაძე კრიზისსა და ვადამდელი არჩევნების ჩატარებაზე მიუთითებს. ეს ნიშნავს, რომ აზრთა მკვეთრი სხვადასხვაობაა ხელისუფლებაში? საინტერესოა თქვენი პოზიცია ვადამდელი არჩევნების საჭიროებასთან დაკავშირებითაც... 

_ მიმაჩნია, რომ დავით ჭიჭინაძის კომენტარებს სერიოზული ინტერპრეტაცია გაუკეთეს, თუმცა არის საკითხები, რაშიც არ ვეთანხმები. რაც შეეხება ინტერპრეტაციას, მან თქვა, რომ თუკი ეს ცვლილებები და ხელისუფლება შედეგს ვერ აჩვენებს, რისთვის საკმაო დრო გააჩნია, შეიძლება დადგეს ვადამდელი არჩევნების საკითხიო. სიტყვები ,,თუკი'', ,,შეიძლება'' მისი კომენტარებიდან შეგნებულად თუ შეუგნებლად ამოღებულია. საკითხები, რაშიც არ ვეთანხმები ისაა, რომ ახლა, საკმაოდ კარგი მაჩვენებლების ფონზე, არ არსებობს იმის აუცილებლობა, ნაბიჯი უკან გადავდგათ და ახალი სტრესული სიტუაცია შევქმნათ სახელმწიფოში. აქვე უნდა ვთქვა, რომ არის სფეროები, განსაკუთრებით სოციალური სფერო, სადაც გაუმჯობესების ზრდის ტემპი იმდენად სწრაფი არ არის, რომ სიღარიბის საკითხი დღის წესრიგში აღარ იდგეს. ძალიან შეუმჩნეველი და ნელი ტემპით მიმდინარეობს პროგრესი. 

არის საკითხები, რომელიც ეხება მართვის სისტემის დახვეწის აუცილებლობას, რასაც უნდა ჰქონდეს ასევე ფინანსური გამოხატულება. ამ საკითხებთან დაკავშირებით კრიზისული მდგომარეობა ნამდვილად არ გვაქვს. კრიზისული მდგომარეობის შექმნისაკენ მთელი ძალისხმევა ნაციონალურ მოძრაობას და ,,ევროპულ საქართველოს'' აქვს მიმართული, რომ ვითარება იყოს დამძიმებული... 

_ ბატონო გია, როდესაც რამდენიმე კვირის წინ, რუსთაველზე, მრავალათასიანი აქციები იმართებოდა, ხელისუფლების წევრები აცხადებდნენ, რომ ამ პროცესს კულუარებიდან სწორედ ნაციონალური მოძრაობა მართავდა. საუბრობენ, რომ ზაზა სარალიძის და მალხაზ მაჩალიკაშვილის მხარდამჭერი აქციები გაგრძელდება და იმ შემთხვევაში, თუ ისევ ეცდება ოპოზიცია, ეს პროტესტი საკუთარი ინტერესებისთვის გამოიყენოს, ხელისუფლებას როგორი პოზიცია ექნება? 

_ თქვენ რამდენჯერმე ახსენეთ სიტყვა ,,მრავალათასიანი''. ჯერ ერთი ასე არაა, მაგრამ ვინც ამ საკითხზე იწყებს კამათს, ყოველთვის წაგებულია. მე რომ გითხრათ, ვთქვათ, 4500 კაცი იყო-მეთქი, ეს ისე აღიქმება, თითქოს ჩვენ ხალხის რაოდენობით ვეჯიბრებით ერთმანეთს. აქ რამდენიმე თემაა. არ მგონია, ნაციონალურ მოძრაობას და ,,ახალ ნაციონალურ მოძრაობას'' ჰქონდეთ ის რესურსი, რომ ქვეყანაში დესტაბილიზაცია შექმნან. 

რაც შეეხება სამართლიანი გამოძიების საკითხს, ეს იქნება უზრუნველყოფილი და აუცილებლად დადგება რეალური შედეგი. თუნდაც, იმ საგამოძიებო კომისიის შექმნა, რომელიც დღეს პარლამენტში მუშაობას, იმის დამადასტურებელია, რომ სახელმწიფო მმართველობა სწორედ ამისკენ არის მიმართული, განსხვავებით იმ პოზიციისგან, რის დემონსტრირებასაც ჩვენი ოპონენტები ახდენენ. საზოგადოებას კარგად ესმის ეს სხვაობა პოლიტიკოსთა შორის, ამიტომ არ მოველი, რომ სახელმწიფოს მიმართ დარჩება პრეტენიზიის ის დონე და სამართილიანობის მიმართ დამოკიდებულება, რაც ხალხს ამ მიზეზით ქუჩაში გამოიყვანს. 

ძალიან დიდი უზნეობაა, როდესაც ადამიანის, კონკრეტული ოჯახის უბედურებას იყენებ საკუთარი პოლიტიკური მიზნის მისაღწევად. რასაკვირველია, საყვედურს დაზარალებული ოჯახის მიმართ ვერ იტყვი, არც უნდა თქვა და არცაა მორალურად გამართლებული, მაგრამ მცდელობა ოპოზიციური პარტიებიდან ნამდვილად იყო და ეს რომ არ აღნიშნო, არასწორი და თავისმოტყუება იქნება. 

_ ხორავას ქუჩაზე მომხდარი მკვლელობის საქმეზე პარლამენტის საგამოძიებო კომისიის მუშაობას როგორ აფასებთ? როგორ ფიქრობთ, დადებს ნაყოფიერ შედეგს ეს კომისია საქმეზე, სადაც არაერთი კითხვა პასუხგაუცემელია? 

_ არსებობს გარკვეული ჩარჩოები, რომლის მიხედვითაც ეს კომისია მუშაობს. ეს ყველაფერი გაწერილია კანონმდებლობაში. ასე რომ, ამას ვერც კომისია და ვერც ნებისმიერი გამოძიება გვერდს ვერ აუვლის. კომისია სწორედ იმიტომაა შექმნილი, რომ გარკვეულ საკითხებზე, სადაც კითხვის ნიშნები რჩება, მივიღოთ პასუხები. მაგრამ არა პოლიტიკურად ანგაჟირებული წამოძახილების საპასუხოდ, არამედ ისეთი პასუხები, რომელიც უნდა ახასიათებდეს დემოკრატიულ, სამართლიან სახელმწიფოს. ასე რომ, დაველოდოთ შედეგებს, ვფიქრობ, კითხვის ნიშნები აღარ დარჩება. 

 

_ ბატონო გია, მიმდინარე სტრუქტურული ცვლილებების ფონზე მოვლენათა როგორ განვითარებას უნდა ველოდოთ? 

_ ჯერ ერთი, დევნილებისთვის საკმაოდ შემსუბუქდება სერვისის მიღების პროცესი ჯანდაცვისა და სოციალური დაცვის სამინისტროსგან. იგივე შეიძლება ითქვას მშენებლობის საკითხებზე დევნილებისათვის - საკმაოდ მნიშვნელოვანია და ეკონომიკური ეფექტის მქონე იქნება მშენებლობის საკითხების გადაცემა ინფრასტრუქტურის სამინისტროზე. აქ იქნება მშნებელობის სერიოზული განხრა, რომელიც არ დაუშვებს არც ტენდერების გადადებას, ჩაშლა-გაუქმებას, რაც არაპროფილური სამინისტროსთვის ძალაუნებურად უფრო რთული მისაღწევი ამოცანა იყო. ასევე საბიუჯეტო თანხების ათვისების საკითხიც საკმაოდ მნიშვნელოვანი პრობლემაა, რომელიც ყველა მთავრობისთვის კრიტიკას იმსახურებდა. ვფიქრობ, იქნება ამ სფეროს წინსვლაც. ვფიქრობ, ჩვენი თაობა განათლების პროცესში უნდა იყოს ინტეგრირებული კულტურულ სფეროსთან. 

_ თუმცა, კრიტიკა ჩნდება იმიტომ, რომ განათლების სისტემაში ისედაც ბევრი პრობლემა იყო და გაერთიანების მაგივრად, მისკენ ძალების მეტი მიმართვა იყო საჭირო. არ მეთანხმებით? 

_ ყველა დარგს, გაერთიანებული იქნება ეს თუ _ ცალკე მდგომი, ეყოლება საკუთარი ხელმძღვანელი, ვინც პასუხისმგებელი იქნება ვთქვათ, კულტურაზე, მეორე _ განათლებაზე და ა.შ. ხოლო მინისტრი იქნება პასუხისმგებელი იმაზე, რომ ეს ორი დარგი პარალელურად ვითარდებოდეს. უყურადღებოდ არც ერთი დარგი არ რჩება.

თათია გოჩაძე

დაბრუნება დასაწყისში