საზოგადოება - ვერსია - ვერსია http://versia.ge Sun, 05 Apr 2020 10:27:40 +0400 Joomla! - Open Source Content Management en-gb ლიბერთის 500 000 ლარიანი მხარდაჭერა ბავშვთა მცირე საოჯახო სახლებს http://versia.ge/2013-07-31-11-23-15/item/6638-ლიბერთის-500-000-ლარიანი-მხარდაჭერა-ბავშვთა-მცირე-საოჯახო-სახლებს.html http://versia.ge/2013-07-31-11-23-15/item/6638-ლიბერთის-500-000-ლარიანი-მხარდაჭერა-ბავშვთა-მცირე-საოჯახო-სახლებს.html

სსიპ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოსა და სს „ლიბერთი ბანკს“ შორის გაფორმებული მემორანდუმის ფარგლებში ლიბერთი კვლავაც რჩება სახელმწიფო უწყების გამორჩეულ პარტნიორად და აგრძელებს სოციალური პასუხისმგებლობის პროგრამის ფარგლებში წლების წინ დაწყებულ საქმეს - ქვეყნის მასშტაბით არსებული მცირე საოჯახო ტიპის სახლებისა და მიუსაფარ ბავშვთა სადღეღამისო თავშესაფრების კომუნალური ხარჯების ანაზღაურებას მთელი წლის განმავლობაში.

ლიბერთი სახელმწიფო ზრუნვაში მყოფი მცირე საოჯახო სახლებისა და მიუსაფარ ბავშვთა სადღეღამისო თავშესაფრების (სულ 52 ობიექტი) მიერ მოხმარებული ელექტროენერგიისა და ბუნებრივი აირის საფასურს სრულად აფინანსებს, რაც მთელი წლის განმავლობაში 500 000 ლარამდე შეადგენს. ამას გარდა, შექმნილ ვითარებაში, COVID_19-ის წინააღმდეგ ბრძოლაში ბანკი მხარდაჭერას უცხადებს სახელმწიფოს და 52-ვე ობიექტს პირველადი საჭიროების მედიკამენტსა და უსაფრთხოებისთვის აუცილებელ ინვენტარს უსასყიდლოდ გადასცემს.

„მნიშვნელოვანია კერძო სექტორისა და სახელმწიფო უწყების პარტნიორული თანამშრომლობა და სოციალური პასუხისმგებლობა სახელმწიფო მზრუნველობაში მყოფი ბავშვებისა და მოხუცების მიმართ, მითუმეტეს, როცა ინიციატივა კერძო სექტორიდან მოდის და მხარდაჭერა წლების განმავლობაში უწყვეტად გრძელდება. ბანკმა კიდევ ერთხელ დაამტკიცა ბიზნესის კეთილი ნება, რომ აქტიურად მონაწილეობს საზოგადოების განვითარების პროცესში. დიდი მადლობა ლიბერთის გვერდში დგომისთვის,“- განაცხადა სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს დირექტორმა, მერი მაღლაფერიძემ.

„ჩვენი მხარდაჭერა, მცირე საოჯახო სახლებისა და მიუსაფარ ბავშვთა სადღეღამისო თავშესაფრებისთვის მხოლოდ კომუნალური ხარჯების ანაზღაურებით არ შემოიფარგლება და პრიორიტეტს ამ სახლების ბინადრებზე ზრუნვა და მათი უსაფრთხოება წარმოადგენს. მოხარული ვართ, რომ გვაქვს შესაძლებლობა ვიზრუნოთ მათზე, ვისაც დღეს ყველაზე მეტად სჭირდება ყურადღება და თანადგომა,“ - აღნიშნა ლიბერთი ბანკის გენერალური დირექტორის მოადგილემ, ლევან თხელიძემ. 2020 წლის თებერვლის მდგომარეობით, მცირე საოჯახო ტიპის სახლებში სახელმწიფო მზრუნველობაში მყოფი 322 ბავშვი ცხოვრობს, მათ შორის 57 შშმ პირი. მიუსაფარ ბავშვთა თავშესაფრისა და დღის ცენტრებში ყოველდღიურ მომსახურებას ქუჩაში მცხოვრები და მომუშავე 168 ბავშვი იღებს.

 

]]>
versiaprinti@yahoo.com (super admin) საზოგადოება Sat, 04 Apr 2020 16:31:28 +0400
იკრძალება თუ არა საყოველთაო კარანტინის დროს სასოფლო-სამეურნეო სამუშაოები http://versia.ge/2013-07-31-11-23-15/item/6635-იკრძალება-თუ-არა-საყოველთაო-კარანტინის-დროს-სასოფლო-სამეურნეო-სამუშაოები.html http://versia.ge/2013-07-31-11-23-15/item/6635-იკრძალება-თუ-არა-საყოველთაო-კარანტინის-დროს-სასოფლო-სამეურნეო-სამუშაოები.html

საგანგებო რეკომენდაციები ფერმერებსა და გლეხებს

30 მარტს, პრემიერ-მინისტრმა, გიორგი გახარიამ საქართველოს მთელ ტერიტორიაზე საყოველთაო კარანტინი გამოაცხადა. მარნეულის, ბოლნისისა და სამეგრელოს მუნიციპალიტეტების შემდეგ, ახლა უკვე ქვეყნის მასშტაბით, საყოველთაო კარანტინი 31 მარტს, 08.00 საათიდან დაიწყო, 21.00 საათიდან კი მოქალაქეებს ქუჩაში გადაადგილება აეკრძალათ. გახარიას განცხადებით, საყოველთაო კარანტინის ფარგლებში, ნებისმიერი ტიპის საზოგადოებრივი ტრანსპორტით, მათ შორის, მეტროთი გადადგილება იკრძალება. ,,ვერსია’‘ დაინტერესდა, განსაკუთრებული შეზღუდვების პირობებში, აქვთ თუ არა ფერმერებს სასოფლო-სამეურნეო სამუშაოების უფლება, მით უმეტეს, რომ მიწას რამდენიმე გლეხი ერთად ამუშავებს (საყოველთაო კარანტინის პირობებში, სამზე მეტი პირის შეკრება დაუშვებელია), ან რა ბედი ელით იმ ფერმერებს, რომლებიც სასოფლო-სამეურნეო კოოპერატივებში, მაგალითად, მსხვილფეხა რქოსანი პირუტყვის ფერმებში, რძის, ხორცის და ზოგადად, ნებისმიერი პროდუქტის გადამამუშავებელ საწარმოებში მუშაობენ.

 

საქართველოს პრემიერ-მინისტრის მრჩეველმა სოფლის მეურნეობის საკითხებში, დავით კირვალიძემ ,,ვერსიას’‘ განუმარტა, რომ საყოველთაო კარანტინის პირობებში, ამ კითხვებზე სისტემური პასუხი არ არსებობს. მისი თქმით, კონკრეტული საქმიანობები სიტუაციურად იზღუდება, იმის მიხედვით, თუ რამდენად აღწევს ან ვერ აღწევს პირი იზოლაციას. 

ქვეყანაში სიტუაცია, მართლაც, ყოველდღიურად იცვლება. მართალია, საკარანტინე ზონაში სასოფლო-სამეურნეო სამუშაოები არ აკრძალულა, მაგრამ საინტერესოა, რა წესები უნდა დაიცვან ფერმერებმა და როგორ უნდა შეასრულონ ეს სამუშაოები? სიტუაციაში უკეთ გარკვევის მიზნით, დავით კირვალიძემ ,,ვერსიას’‘ იტალიაში, ჩინეთსა და აშშ-ში, სწორედ ამ მიმართულებით მიღებული გადაწყვეტილებები გააცნო: 

,,იტალიის პრემიერის განკარგულების ტექსტი გამოქვეყნებულია მთავრობის ვებსაიტზე, სადაც COVID-19-გან ქვეყნის მასშტაბით მოქმედი ეპიდემიოლოგიური გადაუდებელი შემთხვევების შეკავებასა და მართვასთან დაკავშირებული დამატებითი ზომებია აღწერილი. პრემიერის 11 მარტის დადგენილებას ემატება დასაშვები აქტივობების ჩამონათვალი. ნებადართულ საქმიანობებს შორისაა სასოფლო-სამეურნეო კულტურების დამუშავება, მესაქონლეობა, მესამე მხარისათვის ჩატარებული აგრო-მექანიკური პროცესების განხორციელება, სასოფლო-სამეურნეო და ზოოტექნიკური ღირებულებათა ჯაჭვების უწყვეტობის უზრუნველსაყოფად ფუნქციური მოქმედებების განხორციელება. ამასთან, დასაშვებია სოფლის მეურნეობისა და კვების პროდუქტების წარმოება, ტრანსპორტირება, მარკეტინგი და მიწოდება. ასევე, დაშვებულია ნებისმიერი საქმიანობა, რომელიც აუცილებელია საგანგებო სიტუაციასთან გასამკლავებლად. 

შეჩერებული სასოფლო-სამეურნეო აქტივობებია: აგროტურიზმი, ღვინის წარმოება, საგანმანათლებლო მეურნეობების საქმიანობა, მწვანე ტერიტორიების, პარკებისა და ბაღების მოვლა-პატრონობა’‘. 

საქართველოს მთავრობის გადაწყვეტილებით, საკარანტინე ზონაში მხოლოდ კრიტიკული ინფრასტრუქტურის ობიექტები _ საავადმყოფო, სახანძრო/სამაშველო სამსახური, სასწრაფო სამედიცინო ცენტრები, ბენზინგასამართი სადგურები, ელექტროენერგიისა და წყლის მიმწოდებელი ობიექტები, ბანკომატები მუშაობენ. ,,ვერსიის’‘ კითხვაზე, განიხილებიან თუ არა სოფლის მეურნეობის სექტორში დასაქმებული ფერმერები აუცილებელი და კრიტიკულად საჭირო ინფრასტრუქტურის თანამშრომლებად, დავით კირვალიძემ ამერიკის შეერთებული შტატებისა და ჩინეთის მაგალითებზე დაყრდნობით გვიპასუხა: 

,,დიახ, განიხილებიან! სოფლის მეურნეობა სასიცოცხლო მნიშვნელობისაა და COVID-19-ზე რეაგირების დროს მნიშვნელოვან როლს ასრულებს. სინამდვილეში, აშშ-ს უსაფრთხოების სამსახურები სურსათსა და სოფლის მეურნეობაში დასაქმებულ ადამიანებს განიხილავენ აუცილებელ და კრიტიკულად საჭირო ინფრასტრუქტურის მუშაკთა შორის, COVID-19-ზე რეაგირებისთვის. ასევე, სოფლის მეურნეობას, აშშ 16 სხვა მნიშვნელოვან ინფრასტრუქტურულ სექტორს შორის მოიაზრებს. 

მაგალითად, ჩინეთი სოფლის მეურნეობის პროდუქციის მიწოდებას გააძლიერებს, რათა გაუმკლავდეს ვირუსის გავრცელებისგან გამოწვეულ დეფიციტს, _ აღნიშნულია სახელმწიფო საბჭოს განცხადებაში. ადგილობრივი ხელისუფლება პასუხისმგებელია ბოსტნეულის, ხორცის, კვერცხისა და რძის, მარცვლეულისა და სხვა პირველადი პროდუქციის წარმოების, ტრანსპორტირებისა და ხარისხის კონტროლის განმტკიცებაზე.

ხდება კოორდინაცია კოოპერატივებთან და მსხვილ ბიზნესებთან, რათა შრომითი დეფიციტი არ შეიქმნას და წარმოება გაიზარდოს. ამავდროულად, ქვეყანა უზრუნველყოფს ფერმერული პროდუქციის შეუფერხებელ ტრანსპორტირებას ეპიდემიური კონტროლის მომარაგებისთვის დადგენილი ,,მწვანე არხებით’‘. მანქანები პრიორიტეტულია და თავისუფლდება მაგისტრალური გადასახადისგან’‘. 

დავით კირვალიძის განმარტებითვე, ჩინეთის რძის გიგანტი Inner Mongolia Yili Industrial Group Co Ltd აცხადებს, რომ უზრუნველყოფს რძის პროდუქტების მიწოდებას. გაზაფხულის ფესტივალის დღიდან, ქვეყნის მასშტაბით არსებულ ქარხნებში, 10 000-ზე მეტი თანამშრომელი მუშაობს. ჩინეთის რძის გიგანტურმა ჯგუფმა ეპიდემიის პრევენციისა და კონტროლისთვის საჭირო საშუალებები წარადგინა: შემოწმდება თანამშრომლების ჯანმრთელობა და ჩატარდება სემინარები, რათა პროდუქციის ხარისხი და თანამშრომელთა უსაფრთხოება დაცული იყოს: 

,,ქალაქ ერგუნის სოფლის მეურნეობისა და მეცხოველეობის განყოფილებამ ჩაატარა ძროხების ვაქცინაცია, ფერმებს დაურიგდათ სადეზინფექციო მარაგი, რათა ყოველდღიური დეზინფექცია შეუფერხებლად ჩატარდეს. ჩინეთში შეუფერხებლად მუშაობს თვითმომსახურების ბოსტნეულის მაღაზია, რომლითაც ერთნაირად სარგებლობენ, როგორც მომხმარებლები, ასევე ფერმერები. ჩონგკინგის მუნიციპალიტეტის მცხოვრებლებს, ახალი ბოსტნეულის შეძენა სახლთან ახლოს გახსნილ თვითმომსახურების ბოსტნეულის მაღაზიაში შეუძლიათ. ბოსტნეულს მაღაზიაში ადგილობრივი ფერმერები აგზავნიან, ხოლო ვიზიტორებს ამავე მაღაზიაში, ორი მოხალისე მართავს. სასურველი ბოსტნეულის არჩევის შემდეგ, მყიდველები იხდიან ტელეფონის საშუალებით _ QR კოდის სკანირებით. ეს ბევრად უფრო მოსახერხებელია და ამცირებს სუპერმარკეტში კორონავირუსით ინფიცირების შანსს. აღნიშნული ინიციატივა დიდი შვებაა ადგილობრივი ფერმერებისთვის, რომელთა პროდუქცია, სხვა შემთხვევაში, მინდორში გაფუჭდებოდა. მაღაზია ფერმერებს არ ახდევინებს გადასახადს და სრულად ურიცხავს მიღებულ შემოსავალს’‘. 

დავუბრუნდეთ საქართველოს, როგორც აღვნიშნეთ, ქვეყნის მთელ ტერიტორიაზე საგანგებო მდგომარეობა გა-მოცხადდა. არადა, სწორედ გაზაფხულზე სრულდება სასოფლო-სამეურნეო სამუშაოები. ისიც უნდა გავითვალისწინოთ, რომ კორონავირუსის საფრთხის ფონზე, როდესაც მთელი ქვეყანა კი არა, სრულიად დედამიწაა დაპაუზებული, სოფლის მეურნეობის პროდუქციას განსაკუთრებული მნიშვნელობა ენიჭება. მართალია, სურსათისა და კვების პროდუქტების იმპორტი არ იკრძალება, მაგრამ ვინაიდან გლობალური საფრთხე ახალ შესაძლებლობებს ქმნის, რაზეც ,,ვერსიაში’‘ დეტალურად უკვე ვწერდით, უპრიანი იქნება, ადგილობრივ წარმოებას ხელი შევუწყოთ. 

სხვათა შორის, პრემიერ-მინისტრმა, გიორგი გახარიამ ღიად განაცხადა, რომ გვერდში დაუდგება თითოეულ ბიზნესმენს, რომელიც ადგილობრივ წარმოებას შექმნის: 

,,ყველა ბიზნესმენს, ვისაც შეუძლია შექმნას ადგილობრივი წარმოება, რომელიც შეძლებს, ჩაანაცვლოს იმპორტი ყველა მიმართულებით, იქნება ეს სასურსათო პროგრამები, თუ ინდუსტრიული წარმოებები, თითოეულ მათგანს მე, პირადად და მთავრობა დაუდგება გვერდში’‘. 

საინტერესოა, როგორ მუშაობენ მარნეულელი და ბოლნისელი ფერმერები სოფლად? იმისთვის, რომ მარნეულსა და ბოლნისში სასოფლო-სამეურნეო სამუშაოები არ შეფერხდეს, ფერმერები სასოფლო-სამეურნეო დანიშნულების მიწებზე სოციალური დისტანცირების დაცვით იმუშავებენ. ამასთან დაკავშირებით, საქართველოს პრემიერ-მინისტრის მრჩეველმა რეგიონული ინფრასქტრუქტურის საკითხებში, სოზარ სუბარმა განაცხადა: 

,,ახლა, სასოფლო-სამეურნეო სამუშაოებისთვის ყველაზე დაძაბული პერიოდია. ყველაფერს ვაკეთებთ, რათა მოსახლეობას საფრთხე არ შეექმნას და სასოფლო-სამეურნეო სამუშაოები არ ჩავარდეს. მათ საშუალება ექნებათ, წავიდნენ მინდორში, ოღონდ უნდა წავიდნენ სოციალური დისტანცირების დაცვით _ მარტო წავა და მარტო მოვა, იმუშავებს და ამაში ადამიანს ხელი არ შეეშლება. ვინაიდან ეს არის რეგიონი, რომლის შემოსავლის მთავარი წყარო სასოფლო-სამეურნეო პროდუქციის წარმოება და გაყიდვაა, თანაც ეს მნიშვნელოვანია სხვა რეგიონებისთვის, მათ შორის, დედაქალაქისთვისაც, ისე გავაკეთებთ, რომ იქიდან პროდუქციის უსაფრთხო წამოღება უზრუნველვყოთ’‘.

მაია მიშელაძე

 

]]>
versiaprinti@yahoo.com (super admin) საზოგადოება Wed, 01 Apr 2020 01:09:18 +0400
,,აფხაზეთის მოსახლეობა საფრთხეშია!’‘ _ როგორი ეპიდვითარებაა რუსეთისგან ოკუპირებულ რეგიონებში http://versia.ge/2013-07-31-11-23-15/item/6630-,,აფხაზეთის-მოსახლეობა-საფრთხეშია-’‘-_-როგორი-ეპიდვითარებაა-რუსეთისგან-ოკუპირებულ-რეგიონებში.html http://versia.ge/2013-07-31-11-23-15/item/6630-,,აფხაზეთის-მოსახლეობა-საფრთხეშია-’‘-_-როგორი-ეპიდვითარებაა-რუსეთისგან-ოკუპირებულ-რეგიონებში.html

საქართველო კავკასიაში ერთადერთი ქვეყანაა, რომელიც კორონაკრიზისს ყველაზე უკეთ მართავს!"

დედამიწაზე კორონავირუსის პანდემია მძვინვარებს. მსოფლიოში ინფექციით ნახევარ მილიონამდე ადამიანია დაინფიცირებული, რამდენიმე ათეული გარდაცვლილი და 100 000-ზე მეტი გამოჯანმრთელებული. ინფექციის გავრცელების მხრივ, ლიდერობენ ჩინეთი, იტალია და აშშ. ასევე, ვრცელდება ინფორმაცია, რომ რუსეთში, კორონავირუსით დაინფიცირებული გაცილებით მეტია, ვიდრე ოფიციალურად ქვეყნდება. ასე, მაგალითად, ვრცელდება ინფორმაციაც, რომ კრასნოდარის მხარეში, კორონავირუსის გავრცელების მხრივ, უმძიმესი ვითარებაა და ძალიან ბევრი ადამიანი აფხაზეთისკენ დაიძრა. ამბობენ იმასაც, რომ რუსეთის მოქალაქეები ოკუპირებულ აფხაზეთში სასტუმროებს ჯავშნიან. ერთ-ერთი ვერსიით, სწორედ ეს გახდა იმის მიზეზი, რომ მთელ ქვეყანაში კომენდანტის საათის შემოღებამდე, საქართველოს ხელისუფლებამ სამეგრელო-ზემო სვანეთში, საგანგებო მდგომარეობა გაამკაცრა. 

„ვერსია“ შეეცადა, გაერკვია, რა მდგომარეობაა ოკუპირებულ აფხაზეთში, რუსეთსა და საერთოდ, მთელ კავკასიაში კორონავირუსის გავრცელების კუთხით, ხომ არაა საჭირო ენგურის ხიდზე ე.წ. საზღვრის გაკონტროლება საქართველოს ხელისუფლების მიერ, რადგან აფხაზეთიდან ვირუსი არ შემოვიდეს; რა მდგომარეობაა გალში, სადაც რამდენიმე ათასი ქართველი ცხოვრობს და სჭირდებათ თუ არა მათ საქართველოს ხელისუფლების დახმარება? _ ამ საკითხებზე, კონფლიქტოლოგ მამუკა არეშიძესა და ევროპელი დემოკრატების ლიდერ პაატა დავითაიას ვესაუბრეთ.

მამუკა არეშიძე აცხადებს, რომ რამდენიმე დღის წინ, სოჭში, კორონავირუსის 5 შემთხვევა დაფიქსირდა. 

„აფხაზეთში იმის ინფრასტრუქტურა და საშუალება არ არსებობს, რომ ადგილზე გაუმკლავდნენ კორონავირუსს და ამაზე თავად აფხაზებიც წერენ. სხვათა შორის, ჯანმოსგან (ჯანმრთელობის დაცვის მსოფლიო ორგანიზაცია, _ავტ.) დახმარება მიიღეს, ოსებმა კი ამაზე უარი განაცხადეს. დახმარება ეხება პირბადეების, სადეზინფექციო ხსნარების მიღებას, მაგრამ ხომ უნდა იცოდე, როგორ გამოიყენო ეს საშუალებები? შამბამ მუშტები აბრახუნა, ამას და იმას ვიზამთო, მაგრამ თუ გამოცდილება, ცოდნა და სტრუქტურა არ გაქვს, ძალიან რთულია, ეპიდემიას გაუმკლავდე. ასე რომ, აფხაზეთი ისევე, როგორც ცხინვალი, მაღალი დონის ხიფათის პოტენციური მატარებელია. 

ენგურის ხიდი აფხაზებს თავად აქვთ ჩაკეტილი, ჩვენ შეგვიძლია, ფორმალურად, საკარანტინო რგოლი დავაყენოთ, მაგრამ ამ კორდონის დაყენების საჭიროება ამ წუთში არ არსებობს. უბრალოდ, იქ დამკვირვებლები უნდა იყვნენ, რომ უკონტროლო გადმოსვლა არ დაფიქსირდეს არა ხიდიდან, რომელიც ისედაც ჩაკეტილია, არამედ, სხვა ადგილებიდან იმ შემთხვევაში, თუ ინფექციამ უცებ იფეთქა. 

რაც შეეხება კრასნოდარიდან აფხაზეთში გამგზავრების მსურველებს, დიახ, ასეა, რადგან ყველა სხვა ზონა დაკეტილია. ამ სიტუაციაში, კარგი იქნება, საქართველოში არსებობდეს ისეთი სტრუქტურა, რომელიც რუსეთში, ასეთი ტიპის დინამიკის განვითარებას თვალ-ყურს მიადევნებს. რუსეთს დაეკეტა თურქეთი და ყველა სხვა დასვენების ზონა, დარჩა მხოლოდ ყირიმი და აფხაზეთი. რუსეთში, საბჭოთა დროიდან მოყოლებული, ტურისტული ნაკადები ყველა სეზონზეა. რასაკვირველია, ახლაც მოდის ხალხი აფხაზეთში, რაც თავისთავად, მეტი ხიფათის შემცველია“, _ განმარტავს მამუკა არეშიძე. 

პაატა დავითაია აცხადებს, რომ აფხაზეთის ე.წ. მთავრობის მიერ გავრცელებული ინფორმაცია, თითქოს კორონავირუსი იქ ნაკლებადაა გავრცელებული, სიცრუეა. 

„აფხაზეთთან საზღვარი რუსეთმა ჩაკეტა და უთხრა, თქვენს თავს თავად მიხედეთო, რასაც რუსეთის სათათბიროში მძიმე რეაქცია მოჰყვა და ისიც თქვეს, რომ გარკვეული თანხა აფხაზეთისთვის უნდა გამოეყოთ. საზღვრის ჩაკეტვა იმას ნიშნავს, რომ აფხაზეთიდან არავის უშვებენ, აფხაზეთში კი ის შედის, ვინც იქ ცხოვრობს. რუსეთის მოქალაქე, რომელიც შევა აფხაზეთში, უკან ვეღარ გავა. 

რამდენიმე დღის წინ, სოხუმის ხელმძღვანელობამ გააკეთა განცხადება, ყველა სახლში დარჩესო. ძალიან მნიშვნელოვანი იყო გულრიფშის საავადმყოფოს მთავარი ექიმის მიმართვაც, რომელმაც თქვა, აფხაზეთში უმძიმესი ვითარება შეიქმნებაო. 

ვფიქრობ, 10 დღის შემდეგ, აფხაზეთში უმძიმეს სურათს მივიღებთ. საქართველოსთან ე.წ. საზღვარი ისედაც გაკონტროლებულია რუსების მიერ, ენგურის ხიდზე კონტროლი მარტივი განსახორციელებელია, მაგრამ მერე რა იქნება, რთული სათქმელია. არ დაგვავიწყდეს, რომ გალის ტერიტორიაზე, დაახლოებით, 40 ათასი ქართველია და 10 ათასი მიგრირებს. ყოველნაირად უნდა შევუწყოთ ხელი ქართველებს, მაგრამ მეორე თემაა აფხაზები, რომლებიც, მოგვწონს თუ არა, ჩვენი მოქალაქეები არიან. ამიტომ საქართველომ, ალბათ, რაღაც ღონისძიებები უნდა შესთავაზოს, თუმცა სიმართლე გითხრათ, ეჭვი მეპარება, ე.წ. მთავრობა ამას დასთანხმდეს. ამ მძიმე მდგომარეობის მიუხედავად, ის ისევ რუსეთისკენ გაიხედავს, მაგრამ მოსახლეობამ თუ დაინახა, რომ აქ უფრო შვებას იგრძნობს, სამკურნალოდ ჩვენსკენ წამოვა. ყველაფერ ამას კონტროლი უნდა, რაც მარტივი განსახორციელებელია, რადგან ყველა სხვა გასასვლელი დაკეტილი და დანაღმულია. მოკლედ, გალის მოსახლეობას საფრთხეები უნდა მოეხსნას და დავეხმაროთ. 

ცხინვალის მიმართულებით, საფრთხე დიდი არაა, რადგან დღეს, ცხინვალის რეგიონში 8 000 ადამიანი ცხოვრობს, აფხაზეთში კი სხვა ვითარებაა, იქ დაახლოებით, 150-180 ათასი ადამიანია და აქედან 40 ათასი _ ქართველია“, _ ამბობს პაატა დავითაია. 

რაც შეეხება კორონავირუსის გავრცელებას კავკასიასა და რუსეთში, ამ საკითხზე მამუკა არეშიძე აცხადებს, რომ რუსეთი სამხედრო სახელმწიფოა და იქ მოქალაქეების მობილიზება და კონტროლი ბევრად მარტივია, ვიდრე თავისუფალი დემოკრატიის ქვეყნებში. 

„რუსეთი, პუტინის ბრძანებით, ნელ-ნელა გადავიდა ნახევრად სამხედრო მდგომარეობაზე და პირველი სახელმწიფო იყო, რომელმაც არმიის ბაქტერიოლოგიური სამსახურები გამოიყენა. რუსეთში ძალიან დიდი სამხედრო მობილიზაცია მიდის, მაგრამ ეს საქმე იმდენად დიდია და იმდენად მიტოვებული იყო, რომ აფეთქება, რასაკვირველია, უფრო მაღალი დონისაა, თუმცა ბევრად უფრო კონტროლირებადია სიტუაცია, ვიდრე, მაგალითად, უკრაინაში. 

აი, უკრაინაში, მართლაც ძალიან მძიმე მდგომარეობაა, განსაკუთრებით, დასავლეთ ნაწილში, სადაც მილიონნახევარი გასტერბაიტერი (იაფი მუშა-ხელი, ძირითადად, სხვა ქვეყანაში სამუშაოს მაძიებელი, _ავტ.) დაბრუნდა, რომელიც მუშაობდა ევროპაში და იქ რა ამბავია და როგორი უკონტროლობაა, ვერ წარმოიდგენთ. რუსეთში შედარებით უფრო დისციპლინაა ამ მხრივ, თუ არ ჩავთვლით შორეულ აღმოსავლეთს. ამიტომ, ცენტრალურ რუსეთში განსაკუთრებული პანიკა არ არის და ეჭვი მეპარება, იქ რეალურ მონაცემებს მალავდნენ. მიჩვეულები არიან და შეიძლება, რეალური რიცხვის 1/3 თქვან, მაგრამ ისეთი კატასტროფული მდგომარეობა, როგორიც უკრაინაშია, არ არის. 

რაც შეეხება ჩრდილოეთ კავკასიას, იქ მდგომარეობა მარტივი არ გახლავთ და ამას ისიც ადასტურებს, რომ სტავროპოლის მხარის მთავარი ინფექციონისტი, თავად დაავადდა კორონავირუსით, რომელსაც უცხოეთში ვიზიტები ჰქონდა, მაგრამ ეს არ გათქვა და 15 ადამიანს გადასდო. ასევე, ვიცი დაღესტნის სიტუაცია _ იქ რთული მდგომარეობაა, დაღესტნელი ექიმები ძალიან შეწუხებულნი არიან, რომ ცენტრალური რუსეთისგან განსხვავებით, იქ სათანადო კონტროლი ვერ მოქმედებს. 

რაც შეეხება აზერბაიჯანს, ყველა რიტუალური ღონისძიება აკრძალულია, მაგრამ ამის მიუხედავად, სოფლებში მაინც ატარებენ ასეთ ღონისძიებებს. აზერბაიჯანში წესი აქვთ, დანარჩენმა მსოფლიომ ნაკლებად უნდა იცოდეს, რა ხდება მათ ქვეყანაში, ამიტომ არ გამოვრიცხავ, რომ იქ უფრო მაღალი დონის პრობლემებია, ვიდრე ამბობენ. 

სომხეთში, მიუხედავად იმისა, რომ პირველივე დღიდან შემოიღეს საგანგებო მდგომარეობა, ამ წესებს, პრაქტიკულად, არავინ იცავდა. იყო აბსოლუტური განუკითხაობა, თუმცა ახლა გონს მოეგნენ და ცდილობენ, მაქსიმალურად შეაკავონ ვირუსის გავრცელება. სომხეთში სხვა ტიპის პრობლემებიცაა, მაგალითად, დაშორებული ოჯახები ანუ სომხეთი ვერ ახერხებს ისეთ მობილურ ურთიერთობას, როგორსაც საქართველო. მაგალითად, 60 სომეხი, რომელიც რუსეთის მოქალაქეა, ვერ მიდის სომხეთში, რადგან საქართველო არ ატარებს. უამრავი ირანელი სომეხი მიაწყდა სომხეთს. სომხეთს კომუნიკაციის სერიოზული პრობლემები აქვს. ვერ ვიტყვით, რომ ექიმები არ ჰყავთ, მაგრამ საქმე ისაა, რომ სახელმწიფო სტრუქტრურებმა თავიდანვე არ მიიღეს საჭირო ზომები, რათა საკარანტინო ვითარება მაღალ დონაზე ყოფილიყო და სიტუაცია ძალიან მიუშვეს. 

საქართველოში კი აბსოლუტურად წარმოუდგენელი რამ მოხდა _ პირველივე დღიდან, ძალიან სწორად მიუდგა საქართველოს ხელისუფლება და სამედიცინო პერსონალიც სიტუაციას. ვიღაცამ შეიძლება თქვას, რომ ეს პოლიტიკური კონიუნქტურის გამო მოხდა და ვიღაცამ თავის გამოჩენა გადაწყვიტა, მაგრამ ამას მნიშვნელობა არ აქვს, რადგან მთავარი შედეგია. ჩვენ ბედმა გაგვიღიმა, რომ მაღალი დონის ინფექციონისტები გვყავს, ასევე, გვაქვს ლუგარის ლაბორატორია, ამასთან ერთად, ხელისუფლებაში ადამიანების ჯგუფი აღმოჩნდა, რომელმაც უცებ შექმნა კრიზისის მართვის სწორი მენეჯმენტი, ამას უდიდესი მნიშვნელობა აქვს. 

კავკასიაში, საქართველო ერთადერთი ქვეყანაა, რომელიც ყველაზე უკეთ მართავს არსებულ კრიზისულ სიტუაციას. მიუხედავად იმისა, რომ ინფრასტრუქტურული თვალსაზრისით, ვიღაც უფრო მაღალ დონეზეა, მაგალითად, შეიძლება, ბევრად უფრო მაღალი დონის საავადმყოფო იყოს აზერბაიჯანში, მაგრამ ქართველი სამედიცინო პერსონალი, ტრადიციულად, ყველაზე ძლიერია კავკასიაში და ამასთან, კრიზისის მართვის აბსოლუტურად სწორი მენეჯმენტი განხორციელდა საქართველოს ხელისუფლებაში. მაქვს ინფორმაცია, რომ ამ კუთხით, საქართველოსა და სომხეთის ხელისუფლებებს შორის, გამოცდილების გაცვლა ხდება“, _ აცხადებს მამუკა არეშიძე.

თათია გოჩაძე

 

]]>
versiaprinti@yahoo.com (super admin) საზოგადოება Wed, 01 Apr 2020 01:08:56 +0400
რა მსგავსებაა ბელორუსულ ფეხბურთსა და პორნოგრაფიას შორის http://versia.ge/2013-07-31-11-23-15/item/6628-რა-მსგავსებაა-ბელორუსულ-ფეხბურთსა-და-პორნოგრაფიას-შორის.html http://versia.ge/2013-07-31-11-23-15/item/6628-რა-მსგავსებაა-ბელორუსულ-ფეხბურთსა-და-პორნოგრაფიას-შორის.html

კორონავირუსით გაღარიბებული ცნობილი სპორტსმენები და დაპაუზებული სორტული სამყარო

 

მსოფლიოში მიმდინარე მოვლენების ფონზე, სპორტული სამყარო, უბრალოდ, დაპაუზებულია. არსად არაფერი ხდება, გარდა ერთი ქვეყნისა, რომელზეც ქვემოთ გიამბობთ. მანამდე კი ის ვთქვათ, რას აკეთებენ ცნობილი თუ უცნობი სპორტსმენები იმის გარდა, რომ შინაურ პირობებში ვარჯიშობენ და შემდეგ, გადაღებულ ვიდეოებს პირად გვერდებზე ტვირთავენ. 

სხვათა შორის, კორონავირუსით დაავადებული წევრების შესახებ, არაერთმა კლუბმა ღიად განაცხადა, კლუბების უმრავლესობა კი ანონიმურობას იცავს და მხოლოდ ციფრებს ასახელებს. როგორც გვიხსნიან, ეს თავად სპორტსმენების გადაწყვეტილებაა, ვიღაცას სურს აფიშირება, ვიღაცას _ არა.

ვინაიდან, ვირუსი ტელეფონით არ გადადის, ეს საუკეთესო დროა აგენტებისთვის. ისინი საკუთარ კლიენტებს ახალ კლუბებს სთავაზობენ, მერე კლუბების მფლობელებთან აწარმოებენ მოლაპარაკებებს და საფუძვლიანი ვარაუდი არსებობს, რომ სწორედ ამ პაუზის გამო, მომავალ სატრანსფერო სეზონში დიდი მიდი-მოდი იქნება. 

უკვე ღიად საუბრობენ იმაზეც, რომ მომავალი წლიდან, კატალონიურ „ბარსელონას“ ახალ თავკაცს დაუნიშნავენ და ის ახალი, „ბარსასა“ და მსოფლიო ფეხბურთის ლეგენდა, ხავი ერნანდესი იქნება. 

ხავი, დღეის მდგომარეობით, არაბულ „ალ საადს“ წვრთნის, მაგრამ ყველამ იცის, რომ პირველივე დაძახებისთანავე, ის არაბებს დატოვებს და მშობლიურ კლუბს ჩაიბარებს. სხვათა შორის, ხავი არ მალავს, რომ ამის სურვილი აქვს. 

 

„ჩემს დანიშვნაზე ადრეც იყო საუბარი, მაგრამ მაშინ რომ შემოეთავაზებინათ „ბარსელონას“ გაძღოლა, უარს ვიტყოდი. ახლა შესაბამისი გამოცდილება მივიღე და მზად ვარ, გუნდი ჩავიბარო, თუმცა მხოლოდ ერთი პირობით _ მე სრული დამოუკიდებლობა უნდა მქონდეს. მე უნდა გადავწყვიტო, ვინ წავა და ვინ დარჩება გუნდში. სხვა შემთხვევაში, აღნიშნულ თანამდებობას არ დავიკავებ“, _ განაცხადა ხავიმ. 

სპეციალისტთა აზრით, ის ასე იმიტომ იქცევა, რომ კარგად იცის, გუნდში გადაწყვეტილებებს მწვრთნელი ან პრეზიდენტი კი არა, ლიონელ მესი იღებს და სწორედ მესის ჰეგემონიის დამხობა სურს ხავისაც, რაც ძალიან რთული გასაკეთებელი იქნება. 

* * * 

რადგან „ბარსელონაზე“ ვსაუბრობთ, გუნდის მეკარეზე, მარკ-ანდრე ტერ შტეგენზეც ვთქვათ. ის თვითიზოლაციაში იმყოფება _ სახლიდან არ გამოდის და შესაბამისად, ტელეფონით ჟურნალისტებთან სასაუბროდ ბევრი დრო აქვს. ჰოდა, მსოფლიოს ერთ-ერთი უძლიერესი გუნდის ძირითადმა მეკარემ განაცხადა, ფეხბურთში საერთოდ ვერ ვერკვევი, მხოლოდ ბურთის დაჭერა ვიცი და ვერც ცნობილ ფეხბურთელებს ვცნობ სახეზეო. 

მეკარეობის გარდა, ტერ შტეგენი არქიტექტურითაა გატაცებული და თავისუფალ დროს მთლიანად ამ სფეროს უთმობს. 

* * * 

რამდენიმე თვის წინ, ვინ იფიქრებდა, რომ მარტის მიწურულს ანუ მაშინ, როცა ყველა სპორტული ღონისძიება გადამწყვეტ ფაზაში შევიდოდა, ოლიმპიადისთვის მზადება კი დასასრულისკენ წავიდოდა, მინიმუმ, ევროპის მასშტაბით, მთავარი სპორტული მოვლენა ბელორუსის პრეზიდენტის, ალექსანდრე ლუკაშენკოს ქმედება გახდებოდა, თუმცა სანამ ლუკაშენკოს საოცარ გადაწყვეტილებებს გაგაცნობთ, იმას გიამბობთ, რა უთხრა მას ვლადიმერ ჟირინოვსკიმ. 

ჟირინოვსკი ის კაცია, ვისაც ჭკუა არ მოეკითხება, მაგრამ ლუკაშენკოს ქმედებებმა ისიც კი გააოცა. 

„ლუკაშენკო მთელ პლანეტას დასცინის. ყველგან მკაცრი ზომები მიიღეს, სპორტული ღონისძიებები გააუქმეს, ყველა ქვეყანაში ცდილობენ, რომ ხალხი სახლში დარჩეს, ბელორუსში კი ქუჩებში დასეირნობენ, ყველა სტადიონზეა, თავად ლუკაშენკო კი ჰოკეის თამაშობს. უკვე რამდენიმე ათეული ადამიანია დაინფიცირებული, შემდეგ ასეულობით იქნება, მერე _ ათასობით... ასე არ შეიძლება. ისე გამოდის, თითქოს მთელი პლანეტი სულელია და მხოლოდ თქვენ ბრძანდებით ჭკვიანი...“ 

ბელორუსის საფეხბურთო ჩემპიონატი ევროპაში ერთადერთია, რომელიც არ შეჩერებულა, სრული სვლით მიმდინარეობს და ეს, იმის მიუხედავად, რომ კვირის მონაცემებით, ბელორუსში, ოფიციალურად 94 ადამიანია ვირუსით ინფიცირებული. ქვეყნის პრეზიდენტმა კი უპრეცედენტო გადაწყვეტილება მიიღო და... ვირუსი გააუქმა. ჰო, სწორედ ასე თქვა, ბელორუსში ვირუსს ვაუქმებ და ის აღარავის შეხვდებაო. 

ისე არ გეგონოთ, ქვეყნის პირველი პირი თავად იმალებოდეს და ხალხს ქუჩაში გამოსვლისკენ უბიძგებდეს. არა, ლუკაშენკო არ ერიდება ხალხმრავალ ადგილებს, ჰოკეიც ითამაშა პროფესიონალებთან ერთად და არ აპირებს, ან საკუთარ თავს, ან ქვეყნის მოსახლეობას რაიმე სახის შეზღუდვა დაუწესოს. 

სხვათა შორის, რუსეთის საფეხბურთო კავშირის საპატიო პრეზიდენტმა, ვიაჩესლავ კოლოსკოვმა განაცხადა, ლუკაშენკო ფეხბურთელებს სასაკლაოზე უშვებსო, მერე კი დააყოლა, საერთოდ, ტელევიზიით ბელორუსის ჩემპიონატს რატომ აჩვენებენ, პორნოგრაფიააო?! 

მოკლედ, ქვეყნის პრეზიდენტს აფრთხილებს და აკრიტიკებს ყველა, მაგრამ მას მხოლოდ საკუთარი თავის სჯერა. 

* * * 

მადრიდის „რეალის“ ყოფილმა და ფრანგული „პარი სენ ჟერმენის“ მოქმედმა მეკარემ, კეილორ ნავასმა საფრანგეთი მას შემდეგ დატოვა, რაც კორონავირუსის შემთხვევები გახშირდა. მართალია, ნავასი სახლში იმყოფებოდა და გარეთ ცხვირს არ ჰყოფდა, მაგრამ საბოლოო ჯამში, საფრანგეთის დატოვება და სამშობლოში გაფრენა გადაწყვიტა. 

მოკლედ, კეილორმა თვითმფრინავი იქირავა და ცოლსა და სამ შვილთან ერთად სამშობლოში გაფრინდა. საფრანგეთი-კოსტა რიკას ჩარტერი, მეკარეს „სულ რაღაც“ 200 ათასი ევრო დაუჯდა. 

* * * 

ყველა საზომით, NBA-ს კლუბი, ლოს ანჯელესის „კლიპერსი“ ერთ-ერთი უმდიდრესი და წელში გამართულია. მისი მფლობელი, მილიარდერი სტივ ბალმერი გახლავთ. ჰოდა, იმის მიუხედავად, რომ საკალათბურთო სეზონი შეჩერებულია და იგივე ბალმერი, ამის გამო, დღეში ასეულ ათასობით დოლარს კარგავს, მან გადაწყვიტა, კორონავირუსის წინააღმდეგ ბრძოლაში საკუთარი წვლილი შეიტანოს და ამ საქმისთვის საკმაოდ სოლიდური თანხა _ 25 მილიონი დოლარი გამოყო. 

„აღნიშნული თანხიდან 15 მილიონი _ ლოს ანჯელესის, სიეტლისა და მიჩიგანის კლინიკებს, ხოლო 10 მილიონი _ ვაშინგტონის სამედიცინო უნივერსიტეტის სწრაფი რეაგირების ფონდში ჩაირიცხება და კორონავირუსული ინფექციის საწინააღმეგო ვაქცინაზე მუშაობის ტემპის დაჩქარებას მოხმარდება“, _ განაცხადა ბალმერმა. 

* * * 

რადგან სპორტის სამყარო დაპაუზებულია და სუპერვარსკვლავებსა თუ რიგით მოთამაშეებს ხელფასების 30% ჩამოეჭრათ, იმასაც გეტყვით, ვინ რამდენი გამოიმუშავა გასულ წელს და შემდეგ, თავად განსაზღვრეთ, როგორ იზარალეს, მაგალითად, ფეხბურთელებმა. 2019 წელს, ხელფასს პლუს სარეკლამო შემოსავლის ოდენობით, პირველ ადგილზე ლიონელ მესია, რომელმაც 131 მილიონი დოლარი იშოვა. მესიზე გვარიანად ნაკლები აქვს, მეორე ადგილზე მყოფ, კრიშტიანუ რონალდუს. პორტუგალიელმა შარშან ჯიბეში 118 მილიონი ჩაიდო. რაც შეეხება საპატიო მესამე ადგილს, ის ბრაზილიელ ნეიმარს _ 98 მილიონი დოლარით ერგო. 

 

რაც შეეხებათ მწვრთნელებს, გასული წელი ყველაზე ხვავი „ატლეტიკოს“ თავკაცისთვის, დიეგო სიმეონესთვის აღმოჩნდა. სიმეონე უფულობას ნამდვილად არ უნდა უჩიოდეს, რადგან გასულ სეზონში, 40 მილიონი დოლარი გამოიმუშავა. მეორე ადგილზე, 30 მილიონით, იტალიელი ანტონიო კონტე გავიდა, მესამე პოზიცია კი, 27 მილიონით, „მანჩესტერ სიტის“ თავკაცმა, პეპ გვარდიოლამ დაიკავა. 

ცნობისთვის, ჩემპიონთა ლიგის მომგები იურგენ კლობის შარშანდელი შემოსავალი, „სულ რაღაც“, 24 მილიონი გახლდათ. 

* * * 

დასასრულ, იმის მიუხედავად, რომ სპორტის, პრაქტიკულად, ყველა სახეობა შეჩერებულია, მაინც აქტიურად განიხილება ოლიმპიადის წელს ჩატარების შესაძლებლობა. იაპონიის ხელისუფლება აცხადებს, რომ ოლიმპიადის 2021 წელს გადატანა მას ზუსტად 213 მილიარდი დოლარით აზარალებს, რაც იაპონიის ეკონომიკას ძალიან მძიმე ტვირთად დააწვება. მით უმეტეს, ახლა, როცა ძნელია იმის პროგნოზი, როგორი იქნება პოსტვირუსული პერიოდი ქვეყნებისთვის. 

ჰოდა, ნუ გაგიკვირდებათ, თუ ოლიმპიადა შემოდგომაზე ჩატარდება.

ბათო ჯაფარიძე

 

]]>
versiaprinti@yahoo.com (super admin) საზოგადოება Wed, 01 Apr 2020 01:08:45 +0400
ეპიდემიები, რომლებიც საქართველომ კორონავირუსამდე გადაიტანა http://versia.ge/2013-07-31-11-23-15/item/6625-ეპიდემიები,-რომლებიც-საქართველომ-კორონავირუსამდე-გადაიტანა.html http://versia.ge/2013-07-31-11-23-15/item/6625-ეპიდემიები,-რომლებიც-საქართველომ-კორონავირუსამდე-გადაიტანა.html

როგორ ებრძოდნენ ჩვენი წინაპრები "შავ ჭირს", ქოლერასა და „ისპანკას“

არცთუ შორეულ წარსულში, როცა „ისპანკასა“ თუ ე.წ. შავ ჭირზე ამბებს ვისმენდით, ვკითხულობდით თუ ფილმებში ვუყურებდით, ყველაფერი ეს ცალკეული ადამიანის გადამეტებული ფანტაზია, ან ისტორიის დრამატიზება გვეგონა და ვერ წარმოვიდგენდით, რომ ამ კოშმარის თვითმხილველნი გავხდებოდით, მაგრამ ხომ იცით, არასოდეს არ უნდა ვთქვათ „არასოდეს“. ჰოდა, დღეს ყველაფერი ზემოთქმული უკვე რეალობაა, რეალობა, რომელიც პრაქტიკულად, კოშმარის ტოლფასია. ამ კოშმარს კი ისიც ამძაფრებს, რომ არავინ ვიცით, უხილავი მტერი, რომელსაც ახალი კორონავირუსი ჰქვია, თავს როდის დაგვანებებს ანუ როდის განიარაღდება. სხვათა შორის, ისიც ნათქვამია, გამოუვალი მდგომარეობა არ არსებობს და ადამიანი ყველაფერს ეჩვევაო. შესაბამისად, ჩვენც ვეჩვევით კორონასთან თანაცხოვრებას და იმასაც ვსწავლობთ, ამ „პაწაწინა მტერს“ ბოლო როგორ მოვუღოთ, თუმცა ბრძოლის არსენალში ბევრი არაფერი გვაქვს, გარდა იმისა, რომ სოციალური დისტანცია დავიცვათ და ხელები საპნით, წყლითა თუ ანტისეპტიკური ხსნარებით ხშირად და საგულდაგულოდ დავიბანოთ. ერთი სიტყვით, ყველაფერ აქედან გამომდინარე, ზოგი თვლის, რომ ვითარება უიმედოა, მაგრამ მოცემულ შემთხვევაში, ყველაზე ცუდი, სწორედ იმედის დაკარგვაა, თან ხომ იცით, იმედი ბოლოს კვდებაო. იმისთვის, რომ იმედი არ „მოკვდეს“, მოდით, ერთად გადავავლოთ თვალი და გავიხსენოთ, დედამიწას ამა თუ იმ ეპიდემიამ როდის გადაუარა და ჩვენმა წინაპრებმა ყველაფერ ამას თავი როგორ დააღწიეს.

ისე, შორეული წარსულიც რომ არ გავიხსენოთ, საკმარისია, რამდენიმე წლით უკან ანუ იმ პერიოდში დავბრუნდეთ, როცა მსოფლიოს რამდენიმე ინფექციური დაავადების ეპიდემია-პანდემიასთან მოუწია გამკლავება. 

დავიწყოთ იმით, რომ გრიპის ვირუსი, მუდმივ მუტაცია-მოდიფიკაციას განიცდის. აქედან გამომდინარე, ალბათ, გასაკვირი არ იყო, რომ 2002 წლის ნოემბერში, სამხრეთ ჩინეთის პროვინცია გუანდუნში, ატიპურმა პნევმონიამ იფეთქა, რომელიც ჩინეთის სხვა რაიონებში, ასევე, ვიეტნამში, ახალ ზელანდიაში, ინდონეზიაში, ტაილანდსა და ფილიპინებზე, ჩრდილოეთ ამერიკისა და ევროპის გარკვეულ ნაწილშიც გავრცელდა. შესაბამისად, როგორც ჯანდაცვის მსოფლიო ორგანიზაცია იუწყება, 2002-2003 წლებში, ატიპიურმა პნევმონიამ მსოფლიოს 37 ქვეყანაში 8437 ადამიანი დააავადა, საიდანაც 813 გარდაიცვალა. 

გამოხდა ხანი და, ზუსტად 10 წლის შემდეგ, ესე იგი, 2013 წლის თებერვალში, სამხრეთ და აღმოსავლეთ აზიაში ფრინველის გრიპის პირველი შემთხვევები დაფიქსირდა. უფრო ზუსტად, H5N1 და H7N9 ვირუსებით გამოწვეული დაავადება შინაური ფრინველიდან ადამიანს გადაეცა. 

მანამდე კი, 2009 წელს, მსოფლიო H1N1-მა ანუ ე.წ. ღორის გრიპმა დააპანიკა. ზოგადად, ღორის გრიპი ადამიანს მხოლოდ ცხოველიდან კი არა, ასევე, ადამიანიდანაც გადაეცემა. ღორის გრიპის პირველი შემთხვევები მეხიკოში გამოვლინდა, საიდანაც მთელ მექსიკასა და აშშ-ს მოედო. 

ღორის გრიპით დაინფიცირებული ადამიანები ევროპაში, 2009 წლის აპრილში გამოჩნდნენ, შემდეგ კი ვირუსის ეს სახეობა დასავლეთის თითქმის ყველა ქვეყანას მოედო. 2009 წლის ივნისში, ჯანდაცვის მსოფლიო ორგანიზაციამ, ბოლო 41 წლის განმავლობაში პირველად, გრიპის ახალი ვირუსის პანდემია გამოაცხადა. 

სხვათა შორის, ადამიანები, რომლებსაც ჩაკირკიტება უყვართ, ამბობენ, რომ მსოფლიოს ამა თუ იმ ინფექციის ეპიდემია, ყოველ 40 წელში ერთხელ მოიცავს ხოლმე. მართალია, ამის თაობაზე სპეციალისტები კონკრეტულად არაფერს ამბობენ, მაგრამ თუ ერთი ეპიდემიიდან მეორემდე ინტერვალია, მაშინ გამოდის, ყველაფერ ამაში გარკვეული კანონზომიერება არსებობს, თუმცა სამედიცინო ლიტერატურას თუ მოვიშველიებთ, მივხვდებით, რომ ეს 40-წლიანი ინტერვალი არცთუ „სარწმუნოა“. ყოველ შემთხვევაში, ქათმისა და ღორის გრიპები დავიწყებული არ გვქონდა, როცა 2014 წლის თებერვალში, მსოფლიო ახალი პანდემიის საშიშროების წინაშე დადგა. ამჯერად, ეპიდემიის კერა გვინეა გახლდათ, სადაც ებოლას პირველი შემთხვევები დაფიქსირდა და ციებ-ცხელება მალე მეზობელ სახელმწიფოებშიც _ ლიბიაში, ნიგერიაში, სიერა-ლეონესა და სენეგალშიც გავრცელდა. 

ჯანდაცვის მსოფლიო ორგანიზაციის მონაცემებით, ებოლას ვირუსის სიკვდილიანობა 90%-ს აღწევს და ამის მიზეზი ისაა, რომ მისი საწინააღმდეგო ეფექტიანი პრეპარატი არ არ არსებობს. შესაბამისად, ებოლას ეპიდემია ჯერ კიდევ არაა დაძლეული. ყოველ შემთხვევაში, იმ ქვეყნებშიც ვრცელდება, სადაც თავდაპირველად არ დაფიქსირდა. 

საბედნიეროდ, საქართველოში ებოლა არ „აფეთქებულა“, მაგრამ სხვა ეპიდემიებს ჩვენი ქვეყანა ვერ გადაურჩა, რასაც იგივე კორონავირუსის სწრაფი გავრცელებაც მოწმობს. სპეციალისტების განმარტებით, საქართველოში „კორონას“ პიკი მომავალ ორ-სამ კვირაში იქნება და კულუარებში იმასაც პროგნოზირებენ, რომ ამ ინფექციით შესაძლოა, რამდენიმე ასეული ადამიანი დაავადდეს. იქიდან გამომდინარე, რომ ახალი კორონავირუსის ბუნება ბოლომდე არააა შესწავლილი, ზუსტი პროგნოზის გაკეთება ყველას უჭირს, თუმცა იგვივე სეზონური გრიპებისა და სხვა პანდემიების გამოცდილება სპეციალისტებს იმის თქმის საფუძველს აძლევს, რომ „კორონათი“ საქართველოში არავინ გარდაიცვლება, ან მსხვერპლი ძალიან მინიმალური იქნება. ღმერთმა ქნას, ასე იყოს, თუმცა იმის იმედიც არ დავკარგოთ, რომ სანამ ახალი უხილავი მტერი ყველას დაგვერევა, მსოფლიო მეცნიერები მისი გაუვნებელყოფის მეთოდს მიაგნებენ და ყველაფერი, ამერიკული ფილმებისა არ იყოს, „ჰეფი ენდით“ დამთავრდება. 

ისე, სიტყვამ მოიტანა და, 2011 წელს, ჰოლივუდში ფილმი „ინფიცირება“ გადაიღეს, რომელშიც დღევანდელი მდგომარეობა, თითქმის ასპროცენტიანი სიზუსტითაა აღწერილი. ეს და სხვა დეტალი ბევრს აძლევს საფუძველს, იეჭვოს, რომ ახალი კორონავირუსი ხელოვნურად შექმნილი ინფექციაა. მართალია, ამის მტკიცებულებები არ არსებობს, მაგრამ არსებობის უფლება ნებისმიერ ეჭვს და ვერსიას აქვს, მით უმეტეს, ამ ფონზე, როცა საზოგადოება, ლამის შეშლილობის ზღვარზეა. 

არადა, თუ იგივე ქრონიკებს გადავხედავთ, ამაზე უარესისთვის გაგვიძლია და ცხადია, „კორონასაც“ „გადავაგორებთ“, მით უმეტეს ახლა, ბირთვულ საუკუნეში, როცა შეუძლებელი არაფერია. აბა, ჩვენ რომ დავპანიკდეთ, მაშინ რაღა უნდა ექნათ ჩვენს წინაპრებს, რომლებიც შავ ჭირსა, თუ „ისპანკას“ ებრძოდნენ და არც პირბადეები ჰქონდათ, არც _ ანტისეპტიკური ხსნარები და ტერმინ „სოციალური დისტანციაზეც“, ალბათ, არაფერი სმენოდათ? 

ნათქვამია, წარსული ყველაზე კარგი გაკვეთილიაო. ამიტომაც, არსებულ რეალობაზე მსჯელობისგან თავს აღარ შეგაწყენთ და „რადიო თავისუფლებაზე“, ცალკეულ ადამიანთა მოგონებებს, სახელმწიფო უწყებების დოკუმენტებსა, თუ საგაზეთო პუბლიკაციებზე დაყრდნობით, ისტორიას გაგახსენებთ: 

„1811 წელი მძიმე იყო ქართლ-კახეთისათვის რამდენიმე მიზეზის გამო. რუსეთის იმპერატორმა ალექსანდრე I-მა გააუქმა საქართველოს ეკლესიის ავტოკეფალია, რომელიც 14 საუკუნეს ითვლიდა. 1811 წელსვე, მთავარმართებლად დაინიშნა მარკიზი პაულიჩი _ „კაცი ელამი, რაგვარათაც თვალითა, ეგრეთვე სულითაცა და მოქმედებითა. მაშინ იყო შემჭირვებაი დიდი ქართველთა ზედან მარკიზისაგან“, რომლის მოქმედებასაც 1812 წელს, კახეთსა და ქართლში დიდი ამბოხება მოჰყვა. არ დარჩა კახეთში სოფელი, რომელსაც რუსული ეგზეკუცია არ შეხებია. ამას დაერთო შავი ჭირის გავრცელებაც, რასაც ცნობილი მწერალი და საზოგადო მოღვაწე, ალექსანდრე ორბელიანი თავის მოგონებებში აღწერს: 

„...იძახდნენ, აქ გაჩნდა, იქ გაჩნდა; აქ მოკვდა, იქ მოკვდა; ეს აიყარა, ის წავიდა; ეს დაიხიზნა, ის გაეშურა. სულ ეს ხმები იყო ზევით-ქვევით ქართლ-კახეთში და ეს ხმები ამ ქალაქ ტფილისში მოდიოდა, სადაც აქაც იყო გაჩენილი ჭირი. ტფილისის ხალხი ბევრნი იყრებოდნენ, მიდიოდნენ იქა, სადაც სოფლებში ჯერ კიდევ არ გაჩენილიყო: ეგება იქ არ გაჩნდეს და სიცოცხლე იქ გადავირჩინოთო“. 

ალექსანდრე ორბელიანის ოჯახიც აიყარა „სულერთიან სახლეულობითა და გაეშურნენ სოფელ მარტყოფისკენ, ტფილისის სახლში კი ორი მოსამსახურე დატოვა, თან დაარიგა: 

„ალაყაფის კარი დაკეტილი გქონდესთ, არავინ არ შემოუშოთ თქვენთან და არც თქვენ გახვიდეთ სადმე, სულ შინ იყავით. ფქვილი ბევრი გაქვთ, ფიჩხი ბევრი და როდესაც დაგჭირდეთ, პური გამოაცხვეთ. ერბო, ხახვი და ყველი ბევრი გექნებათ, ხან ყველ-პურზე გადაიარეთ და ხან ხარშო გააკეთეთ. დასალევი წყალიც შუაღამის დროს მოიტანეთ, იმ დროს ფეხი მოწყვეტილი არის, არავინ არ შეგხვდებათ და თუ შეგხვდესთ ვინმე, ხმას ნუ გასცემთ, ასე მოერიდენით ყველას“. 

ერთი სიტყვით, მარტყოფი თბილისიდან გახიზნულებით ავსებულა, თუმცა შავი ჭირი იქაც მალე გაჩენილა და ხალხი იძულებული გამხდარა, ტყეში გახიზნულიყო. ორბელიანებმა გეზი პატარძეულისკენ, ალექსანდრეს მამიდის, ეკატერინეს ოჯახისკენ აიღეს, მაგრამ ადგილზე ჩასულები იგებენ, რომ ეკატერინეს ორი მოსამსახურე შავ ჭირს უმსხვერპლია და იქვე დაუმარხავთ. 

„...შემატყეს, რომ იმ სნეულებისა იყო, ძლიერი სიცხე მომცა. იმ ღამეს რიგიანი გონება აღარ მქონდა, იმის მეტი აღარ მახსომს რა, რომ ერთი ჩონგურიანი კაცი შემოვიდა, უკან რამდენიმე მორთული ქალები შემოჰყვნენ, მოვიდნენ და მდაბლა თავი დამიკრეს, მე ამაზედ მაღლა გამეცინა, ჩემი გამდელი მოიჭრა, მკითხა: რას იცინიო? - მე იმათი ამბავი უთხარ, აგერ ახლაც იქა სხედან-მეთქი. მაშინვე წყალი მოარბენინა, რომ დავლიე, ვეღარავინ ვერ ვნახე, მაგრამ იმ ღამეს სრულიად გონება მიმეხადა და გარინდებული ვიყავ თურმე... შორიახლოს დამაწვინეს ერთ დარბაზში, ჩემი გამდელი მომიჩინეს ერთი მოსამსახურით და სხვა არვინ მომაკარეს... დილას და საღამოს მოგვიტანდნენ სასმელ-საჭმელს და სანთელს მოსამსახურენი, იქვე კარეფში ჩასდგამდნენ“, _ ვკითხულობთ ალექსანდრე ორბელიანის მოგონებებში. ამავე მოგონებებიდან ვიგებთ, რომ რამდენიმე დღეში, მას ნიკაპზე „ვეება მუწუკი“ გასჩენია. 

„ორმოც დღეს უკან, ყველანი ჩემთან შემოვიდნენ, მოლოცვით და სიხარულით, ჭირს გადურჩი... ხანი აღარ გამოვიდა, ავიყარენით, ჯერ ყარაბულახში გადავედით და იქიდგან ტფილისში ჩამოვედით, სადაც ყოვლის მხრიდან მცხოვრებნიც მოიკრიფნენ და ქალაქი ისევ ქალაქად იქცა, როგორც ადრე იყო ხოლმე. ჩვენი მოსამსახურენიც მშვიდობით კარგად დაგვიხვდნენ“, _ წერს ორბელიანი. 

ასე იყო თუ ისე, საქართველომ შავ ჭირს თავი დააღწია, თუმცა რამდენიმე ათეული წლის შემდეგ, ჩვენს ქვეყანას თავს ახალი უბედურება დაატყდა _ ქოლერა. 

„თბილისის თვითმმართველობამ დაინახა, რომ ხოლერა სრულებითაც არ ხუმრობსო და საშინელის მრისხანებით უპირებს განადგურებას მთელს კაცობრიობასო, რაც კი რამ მოეძებნებოდა, ყველაფერს მოუყარა ქალაქმა თავი- თავს და იარაღად აქცია, რამდენიმე ათასი თუმანი ფული დასდო მცხოვრებთა დასახსნელად. დაიქირავა თითქმის ოცამდე ექიმი და დაავალა, რომ საცა კი ხოლერამ იჩინოს თავი, გაქანდით, მუქთად უშველეთ გაჭირვებულს და ხოლერიანი ადგილები ისე გაასუფთავეთ, რომ იქ ბაცილებს აღარ შეეძლოთ გაძლებაო. რაც კი საეჭვო საცმელები ჰნახოთ, ქვეშსაგები, ყველაფერი გადაწვით და გადაბუგეთ _მე ვზღავ ერთი-ორადაო. ამისთანა თადარიგის დაჭერამ, თქვენცა ჰხედამთ, რაცა ჰქნა“, _ იუწყებოდა 1892 წლის 22 ივლისს, გაზეთი „ივერია“. 

1892 წლის 4 სექტემბრს კი, იგივე „ივერიაში“ ქვეყნდება ვრცელი სტატია ქოლერაზე _ „ქოლერის საწინააღმდეგო ვაქცინის (ჩირქის) აცრა“: 

„ზღვის გოჭებსა, ბაჭიებსა და მტრედებზედ ცდამ გვიჩვენა, რომ ჩვენ მიერ მოგონილს ხოლერის საწინააღმდეგო ვაქცინას (ჩირქი) იგივე ზედმოქმედება აქვს სხვა უფრო ღონიერის აგებულების ცხოველებზედაც. ამ გარემოებამ წაგვაქეზა და გადავწყვიტეთ ადამიანისთვისაც აგვეცრა“. 

ერთი წლის შემდეგ, კერძოდ, 1893 წლის 11 აგვისტოს, ასევე, „ივერია“ იუწყება, რომ აიკრძალა ეკლესიების გალავნებში „საღმრთოს დაკვლა, მტკვარში ბანაობა და მტკვრის წყლის ხმარება. ბაზარში უვარგისი ხილის გაყიდვა“. 

ყველაფერმა ამან შედეგი მოიტანა და ქოლერას შემთხვევებმა იკლო. 

სხვათა შორის, ქოლერასთან ბრძოლაში ერის სულიერი მამა და უგვირგვინო მეფე, ილია ჭავჭავაძეც გახლდათ ჩართული.

„თბილისში ქოლერის შემთხვევებთან დაკავშირებით, დიდი კაცთმოყვარეობის გრძნობით განმსჭვალული სათავადაზნაურო საადგილმამულო ბანკის ხელმძღვანელობა სწირავს თბილისის გუბერნიის უღარიბესი მოსახლეობის სასარგებლოდ საგრძნობ დიდ თანხას _ 20 ათას მანეთს. ეს შემოწირულობა ქოლერის საწინააღმდეგო ბრძოლისთვისაა იმ ღონისძიებათა მისახმარებლად, რომელსაც მთავრობა უკვე ეწევა“, _ ნათქვამია კავკასიის მთავარმმართებლის სამოქალაქო შინაგან საქმეთა სამინისტროს საგუბერნიო სამმართველოს 1892 წლის 1-2 ივლისის ოქმში. 

იმავე წლის 12 ივლისს კი, ილია ჭავჭავაძე საგურამოდან გუბერნატორს დეპეშას უგზავნის, რომელშიც ვკითხულობთ: 

„9 აპრილს, შუადღისას ავად გახდა მუშა ზევნორე თვარაძე და საღამოთი იგი ცოცხალმკვდარი მოიყვანეს მინდვრიდან საგურამოში. შემთხვევა საეჭვოა, ადგილობრივი მამასახლისი უმოქმედობს. ამბობენ, მაზრის ექიმიც ასევე... გთხოვთ, მოავლინოთ ექიმი“. 

ვაჟა ფშაველა კი ქოლერას შაჰ-აბასის შემოსევას ადარებდა და წერდა: 

„ვგონებ, შაჰ-აბასის შემოსევამაც არ ააყაყანა ისე საქართველო, როგორც ხოლერის გაჩენამ: ხოლერა სიკვდილის მომასწავებელია და ჩვენ ხომ სიცოცხლის მეტის-მეტად მოყვარულნი ვართ და ანკი რას არ აგვაყაყანებდა... 

 

აბა, გადავავლოთ ჩვენს მხარეს თვალი, აბა, კარგად დავუკვირდეთ ჩვენს გარემოებას, ჩვენს წამხდარს საქმეს, თუ მართლა უარესის ხოლერით არ ვიყოთ ავად. ამ ხოლერას ვერ უპოვნეთ ვერსაიდამ წამალი, იმაზედ არც სისუფთავე სჭრის, არც დეზინფექცია. აბა, ხოლერა, ნამდვილი ხოლერა ეს გახლავსთ. ეს ისეთი ხოლერაა, რომ განა 2 ათასში ათასს მოჰკლავს და ათასი გადაჰრჩება?! არა, ყველას იმსხვერპლებს, მთელს ერს მუსრს გაავლებს... გაზეთებმაც დროა პირველს თავი დაანებონ და მეორეს მიაპყრონ თვალი, იმ ჩუმად მძრომელს, რომელიც სისხლს არ აჩენს, მაგრამ მკვდრებს კი ამრავლებს. ეგები ესეც მოვიშოროთ თავიდან... აქაც საჭიროა ყაყანი და იგივე ყაყანი; მასთან ერთად ხელებისა და ტვინის ფათურიც, თორემ მარტო ცარიელს ყაყანში არაფერი მოიხვეტება, როგორც კალიისგან განადგურებულს მიწაზე“. 

„შავი ჭირიც“ წარსულს ჩაბარდა, თუმცა გასული საუკუნის დასაწყისში, კერძოდ, ზუსტად მაშინ, როცა საქართველომ რუსეთის იმპერიისგან დამოუკიდებლობა მოიპოვა, მსოფლიოს ესპანური გრიპის ანუ „ისპანკას“ ეპიდემია მოედო და საქართველოს ახალგაზრდა სახელმწიფოც, ნებსით თუ უნებლიედ, ამ „მტერთან“ ბრძოლაში ჩაერთო. 

„ერობებმა დაიწყეს საექიმო პერსონალის მობილიზება და კოორდინირება. პერიოდულად ეწყობოდა სამაზრო ექიმთა ყრილობები, სადაც ხდებოდა გამოცდილების შეჯერება და სამოქმედო პროგრამის განსაზღვრა. მალევე კანონით განისაზღვრა საერობო მედიცინის ძირითადი პრინციპები, რომლებიც საყოველთაო ჯანდაცვის მოდელს დაეფუძნა. მაზრები დაიყო სამედიცინო უბნებად, მოეწყო კლინიკები და ამბულატორიები. დაკომპლექტდა სამაზრო ექიმთა შტატი, რომელიც მაზრის მოსახლეობას უფასოდ ემსახურებოდა და ხელფასს ერობის ბიუჯეტიდან იღებდა. მოსახლეობას მხოლოდ მედიკამენტების ხარჯის გაღება უწევდა, თუმცა რეალობიდან გამომდინარე, რადგან უმეტესობა ეკონომიკური კრიზისის, ეპიდემიების მასშტაბისა და ფარმაცევტული ბაზრის შეზღუდულობის გამო ვერ ახერხებდა წამლების შეძენას, ერობათა დიდმა ნაწილმა თავადვე დაიწყო მედიკამენტებით მომარაგების საქმის მოწყობა“, _ ციტირებს ისტორიკოს ირაკლი ხვადაგიანის სიტყვებს რადიო თავისუფლება“ და დასძენს, რომ საქართველოში, მეზობელი ქვეყნებისგან განსხვავებით, „ისპანკას“ მსხვერპლთა რიცხვი გაცილებით დაბალი იყო, თუმცა „ისპანკას“ გარდა, პირველ რესპუბლიკას ქოლერა, ტიფი, დეზინტერია და სხვა ათასი სახადი უტევდა. ყველაფერ ამის მიზეზი კი ქალაქის სანიტარულ-ჰიგიენური მდგომარეობა გახლდათ. 

„ქალაქი სხვადასხვა საშუალებებით უზრუნველყოფდა სანიტარულ-ჰიგიენური პირობების დაცვას: გააძლიერა ზედამხედველობა აბანოებზე და მეორადი ტანსაცმლით ვაჭრობაზე, ღარიბ მოსახლეობას სანიტარული ექიმების მეშვეობით გადასცემდა აბანოს ბილეთებს, ყოველდღიურად წმენდა და დეზინფექციას ახდენდა ტრამვაის ვაგონებისას, აკრძალა ტრამვაის ვაგონების გადატვირთვა, გამგეობის მეშვეობით გააძლიერა მოსახლეობისათვის წყლის მიწოდება, გახსნა საზოგადოებრივი სამრეცხაო, გააძლიერა ზედამხედველობა საპარიკმახეროებზე და საზოგადოებრივ სამრეცხაოებზე. თვალყურს ადევნებდა მოსახლეობის თავშეყრის ადგილებს (ბაზრებს). ქალაქში ოთხ ენაზე გამოაკრა ინფექციების გავრცელების პრევენციის ინსტრუქცია, გააძლიერა ქალაქის სადეზინფექციო კამერის მუშაობა, გააფართოვა ქალაქის კლინიკებში ინფექციური განყოფილებები, სამედიცინო დაწესებულებები შეძლებისდაგვარად აღჭურვა მედიკამენტებით და სადეზინფექციო საშუალებებით, საავადმყოფოების პერსონალი მოამარაგა შესაბამისი ტანსაცმლით და აღჭურვილობით. საავადმყოფოებს სპეციალური ინსტრუქცია მიაწოდა ინფექციის შემთხვევაში მოქმედების შესახებ და სხვა“, _ ვკითხულობთ 1917-1921 წლებით დათარიღებულ „თბილისის ადგილობრივი თვითმმართველობის პრაქტიკულ მოღვაწეობაში“. 

როგორც რადიო „თავისუფლება“ იუწყება, 1919 წლის 10 თებერვალს, თბილისის საბჭომ გადამდებ სენით საავადმყოფოს მოსამსახურეთა მოთხოვნათა განხილვისა და დასკვნისათვის საგანგებო კომისია აირჩია, რომლის წევრიც ცნობილი ექიმი და სახელმწიფო მოღვაწე ივანე გომართელიც გახლდათ. ამასთან, ხელისუფლებამ, იმისთვის, რომ ეპიდემია დაემარცხებინა, უმნიშნელოვანესი გადაწყვეტილება მიიღო _ უფასო აბანო გახსნა, სადაც ტანსაცმლის დეზინფექციაც ხდებოდა. ამას გარდა, ქალაქის ღარიბ მოსახლეობას ნახევარი გირვანქა საპონი უფასოდ დაურიგეს. 

ამასთან, ალექსანდროვის საავადმყოფოში სახადიან ავადმყოფებისთვის, 120 საწოლი მოაწყვეს. 

„სამედიცინო დაწესებულებების უპირველეს საზრუნავს წარმოადგენდა, რაც შეიძლება მალე აღმოჩენილიყო შემთხვევა გადამდები სენით ავადმყოფობის შესახებ, რასაც ასრულებდნენ უბნის ექიმები და ამბულატორიები. აღმოჩენისთანავე უნდა მომხდარიყო ავადმყოფთა იზოლირება და ინფორმაციის გადაცემა სადეზინფექციო კამერისათვის და სათანადო სანიტარული ექიმისათვის. კამერას გადაჰყავდა ავადმყოფი ბარაკებში და ბინაზე ახდენდა დეზინფექციას. სანიტარული ექიმი კი იმ ბინას და მიმდებარე ტერიტორიას იღებდა თავის მხედველობის ქვეშ. ანგარიშის წარდგენისას, არ დაიმალა ის ფაქტი, რომ სადეზინფექციო კამერის მუშაობა ამ დიდი ეპიდემიის დროს, არ იყო დამაკმაყოფილებელი, რაზეც ნათლად საუბრობდნენ ციფრებიც. მაგალითად, პარტახიანი ტიფით ავადმყოფი დაფიქსირდა 6013 ადამიანი, დეზინფექცია კი 1646 ადგილას გაკეთებულა. ეს არა მხოლოდ უპასუხისმგებლობით იყო გამოწვეული, არამედ აიხსნებოდა საჭირო მასალების, წამლების უქონლობით და ავადმყოფთა გადასაზიდი საშუალებების არქონით. ყველაფერს ამას, 1919 წლის დასაწყისში, მოსამსახურეთა გაფიცვა დაერთო. 

1920 წლისათვის, საექიმო-სასანიტარო განყოფილება აღჭურვილი იყო ორი ავტომობილ _ „სანიტარკით“ და ორი ეტლით _ ავადმყოფთა გადასაყვანად. აგრეთვე, შედარებით უზრუნველყოფილი იყო სადეზინფექციო წამლებით. 

ეპიდემიის წინააღმდეგ გადატარებულ ღონისძიებებთან დაკავშირებით აღნიშნული იყო, რომ ცუდი შედეგი მოსდევდა ასევე იმ ფაქტს, რომ ავადმყოფები თავსდებოდნენ ბარაკებში და არა საავადმყოფოში, უარყოფითი შედეგი მოჰყვებოდა მცხოვრებთა შეხედულებას, ვითომც დაავადებული უკვე განწირული და დაღუპული იყო. ეს შეხედულება აძნელებდა ავადმყოფთა იზოლაციის საქმეს. ბევრი უარს აცხადებდა ბარაკებში გადასვლაზე, ბევრი მალავდა ავადმყოფობას, რაც თავისთავად, ეპიდემიის გავრცელების მიზეზი ხდებოდა. გამგეობის მედიკოსანიტარული განყოფილება ითხოვდა შესაფერის კრედიტს, რათა პირველ საავადმყოფოსთან გახსნილიყო განყოფილება გადამდებ სენით ავადმყოფთათვის. აგრეთვე დიდ მნიშვნელობას ანიჭებდა ზემოთ ხსენებული საკითხების: ქალაქში წყლის, სისუფთავისა და კანალიზაციის მოწყობის ღონისძიებების გატარებას“, _ იუწყება „რადიო თავისუფლება“, 1917-1921 წლების „თბილისის ადგილობრივი თვითმმართველობის პრაქტიკულ მოღვაწეობაზე“ დაყრდნობით. 

„კორონასი“ არ იყოს, ქოლერას მეორე ეპიდემიამ საქართველოში ავტონომიურად კი არ იფეთქა, არამედ, გარედან შემოვიდა, კერძოდ, უცხოელებისგან გარცელდა ანუ 1919 წელს, თბილისში სულ 90 უცხო ქვეყნის მოქალაქე ცხოვრობდა და დაავადება ადგილობრივ მოსახლეობას, სწორედ მათგან გადაედო. 

„ქოლერას დროს, ძალიან უფრთხოდნენ მწერებს, განსაკუთრებით კი _ ბუზებს. 

ქოლერა ორთაჭალის ციხეშიც გავრცელდა _ პატიმრებს გადაედოთ. ამიტომ ისინი იზოლაციაში გადაიყვანეს და ხშირი ბანაობა „მიუსაჯეს“. ამას გარდა, აეკრძალათ უმი საკვები, ხილი და ბოსტნეული. უნდა დაელიათ მხოლოდ გადადუღებული წყალი. ასევე, ციხის ადმინისტრაციას დაევალა, რომ პატიმრების თეთრეული და ტანსაცმელი ყოფილიყო მაქსიმალურად სუფთა“, _ ამბობენ ეპიდემილოგები და დასძენენ, რომ ქოლერას მეორე აფეთქების ერთ-ერთი საბაბი, შესაძლოა, მტკვრის დაბინძურებული წყალი ყოფილიყო. 

სხვათა შორის, ქოლერას ეპიდემიამ იმსხვერპლა სრულიად საქართველოს კათოლიკოს-პატრიარქი ლეონიდე. ისტორიული ქრონიკების თანახმად, მორჩილებმა, იმის გამო, რომ დაავადებისგან დაეცვათ, მთიდან წყაროს წყალი ჩამოუტანეს, მაგრამ უწმინდესმა მის მიღებაზე უარი თქვა და განაცხადა, მეც ის წყალი უნდა დავლიო, რომელსაც ჩემი მრევლი სვამსო. 

უცნობია, უწმინდესს ქოლერა ვინმესგან გადაედო, თუ წყლით დაავადდა, მაგრამ ფაქტია: 1921 წლის 11 ივნისს, სრულიად საქართველოს კათოლიკოს-პატრიარქი ლეონიდე, საპატრიარქო რეზიდენციაში, სწორედ ამ დიაგნოზით გარდაიცვალა. 

რატომ გავიხსენეთ ისტორია? _ ამ კითხვას პასუხი, პრაქტიკულად, წერილის დასაწყისში გავეცით, მაგრამ კიდევ ერთხელ ვიტყვით: კორონავირუსის პანდემია, ადრე თუ გვიან, დასრულდება და მსოფლიო ამ უხილავ მტერს, რასაკვირველია, დაამარცხებს, მაგრამ ისიც ფაქტია, რომ პოსტკორონისეული დედამიწა, კორონამდელი დედამიწისგან განსხვავებული იქნება ანუ შეიცვლება, როგორც პოლიტიკური, ასევე, ეკონომიკური დღის წესრიგი და გარკვეულ ცვლილებებს ადამიანათა ქცევაც დაექვემდებარება. აი, მაგალითად, ისე შეიძლება მოხდეს, რომ მოგზაურობა წარსულს ჩაბარდეს და ადამიანები ერთი ქვეყნიდან მეორეში, მხოლოდ განსაკუთრებული შემთხვევების დროს გადაადგილდნენ. 

ამას გარდა, შეიცვლება ცხოვრების სხვა ის წესებიც, რომლებიც ჩვენ, ადამიანებს გლობალიზაციამ გვასწავლა და ვინ იცის, შეიძლება, ისეც მოხდეს, რომ ყველაფერ ამით, დედამიწა გაჯანსაღდეს კიდეც. აკი, ნათქვამია, ზოგი ჭირი მარგებელიაო. ჰოდა, კორონაჭირიც, შესაძლოა, მარგებელი აღმოჩნდეს! 

ასე რომ, ქალბატონებო და ბატონებო, ახლა პანიკის დრო არაა! 

ახლა ბრძოლის დროა! 

დიახ, თოთოეულმა ჩვენგანმა უნდა ვიბრძოლოთ და კორონა დავამარცხოთ! 

დიახ, ამ ომს ჩვენ, ადამიანები, მოვიგებთ! 

დიახ, ჩვენ, ადამიანები, აუცილებლად გავაზაფხულებთ! 

P.s. და კიდევ ერთი: არ დაგავიწყდეთ _ დაიბანეთ ხელები, დაიცავით სპეციალისტთა სხვა რეკომენდაციები და იმისთვის, რომ პლანეტა განსაცდელისგან ვიხსნათ, დარჩით სახლში!

ნინო დოლიძე

 

]]>
versiaprinti@yahoo.com (super admin) საზოგადოება Wed, 25 Mar 2020 13:07:32 +0400
როგორ დავიცვათ ბავშვები და მოზარდები კორონავირუსისგან http://versia.ge/2013-07-31-11-23-15/item/6620-როგორ-დავიცვათ-ბავშვები-და-მოზარდები-კორონავირუსისგან.html http://versia.ge/2013-07-31-11-23-15/item/6620-როგორ-დავიცვათ-ბავშვები-და-მოზარდები-კორონავირუსისგან.html

პედიატრის პრაქტიკული რჩევები, რომლებიც მშობლებმა აუცილებლად უნდა გაითვალისწინონ!

ამ დროის მონაცემებით, საქართველოში კორონავირუსის 60-ზე მეტი დადასტურებული შემთხვევაა, საიდანაც 8 პაციენტი უკვე გამოჯანმრთელდა. იქიდან გამომდინარე, რომ ვირუსის შეჩერების ეტაპიდან გავრცელების ეტაპზე გადავდივართ, ქვეყანაში ერთთვიანი საგანგებო მდგომარეობა მოქმედებს. მარნეული და ბოლნისი კი ე.წ. წითელ ზონადაა გამოცხადებული. 

სხვათა შორის, ჩვენს ქვეყანაში COVID 19-ით რამდენიმე მოზარდი დაინფიცირდა. ამიტომ, საინტერესოა, როგორ მოქმედებს ახალი კორონავირუსი ბავშვებზე და რამდენად საშიშია არასრულწლოვანებისთვის? _ ამ თემაზე „ვერსია“ ცნობილ პედიატრ თამარ ობგაიძეს ესაუბრა და გაარკვია, როგორ უნდა დავიცვათ ბავშვები ამ ვირუსისგან.

„კორონავირუსის გავრცელებას ერთი საინტერესო კანონზომიერება გამოუვლინდა _ სადღეისოდ არსებული სტატისტიკა მოწმობს, რომ ბავშვები კორნავირუსით უფრო იშვითად ავადობენ, ვიდრე _ მოზრდილები. ამავდროულად, მათ დაავადება მსუბუქი ან ზომიერად გამოხატული სიმპტომატიკით ემართებათ. ჯანდაცვის მსოფლიო ორგანიზაციის მონაცემებით, ჩინეთში დაავადებულების მხოლოდ 2.4% იყო ბავშვი და მათგან 0.2%-ს დაავადების მძიმე მიმდინარეობა ჰქონდა. სიკვდილობის შემთხვევები ბავშვებში, პრაქტიკულად, არ დაფიქსირებულა. არსებული მონაცემებით, მოზრდილებისგან განსხვავებით, ბავშვების ინფიცირებისას, პრაქტიკულად, არ განვითარებულა პნევმონია. 

სხვათა შორის, აქამდე არსებული სხვა ორი კორონავირუსული აფეთქების დროსაც (შAღშ, 2002; MEღშ 2012) ბავშვები იშვიათად ავადობდნენ. რა განაპირობებს ამ ფაქტს, ჯერ კიდევ უცნობია. ერთ-ერთი ვერსიით, ეს შესაძლოა, განპირობებული იყოს ბავშვის იმუნური სისტემის თავისებურებით და იმ რეცეპტორების სიმცირით ან არარსებობით, რაც აფიქსირებს ორგანიზმში კორონავირუსს. 

მეცნიერები განიხილავენ კიდევ ერთ თეორიას _ ეს შესაძლოა, უკავშირდებოდეს ბავშვთა ასაკში ჩატარებულ წითელას ვაქცინაციას, რომელსაც შესაძლოა, კორონავირუსისგან ჯვარედენი დაცვის უნარი აქვს. 

ბავშვთა ასაკში ინფექცია მიმდინარეობს ისეთივე ნიშნებით, როგორც მოზრდილებში _ ცხვირიდან გამონადენით, ხველით, ცხელებით, თუმცა შესაძლოა, ერთვოდეს დიარეა და ღებინება, მაგრამ მოზრდილებისგან განსხვავებით, იშვიათად ვითარდება პნევმონია და დაავადების მძიმე მიმდინარეობა“, _ აცხადებს ობგაიძე. 

პედიატრი ერთ საინტერესო დეტალსაც უსვამს ხაზს: 

„საინტერესოა, რომ COVID 19-ით ინფიცირებული ორსული ქალების ამნიონურ სითხეში კორონავირუსი არ აღმოჩენილა, რაც ნიშნავს იმას, რომ ნაყოფის ინფიცირება არ უნდა ხდებოდეს. 

დღემდე გვაქვს კორონავირუსული დაინფიცირებული ახალშობილის 1 შემთხვევა ლონდონში, დადასტურებულია, რომ ახალშობილის დედა ამ ინფექციით იყო ავად. როგორ მოხდა ახალშობილის ინფიცირება _ მუცლადყოფნისას, თუ დაბადების შემდეგ, ან მშობიარობის მომენტში, ამ ეტაპზე, უცნობია და კვლევის თემაა. 

ზოგადად, რა გავლენა შეიძლება მოახდინოს ორსული ქალის ინფიცირებამ ნაყოფზე, ამ ეტაპზე, დადგენილი არ არის. დღემდე არ ყოფილა ინფიცირებული ორსული ქალის სიკვდილობის არც ერთი შემთხვევა“, _ განმარტავს პედიატრი და დასძენს, რომ კორონავირუსული ინფექცია ვრცელდება სწრაფად და 16 მარტის მონაცემებით, ის მსოფლიოს 150 ქვეყანაშია უკვე გავრცელებული. შესაბამისად, ბუნებრივია შიში, რაც დაავადების გავრცელებას ახლავს: 

„ეს, ერთი მხრივ, გამოწვეულია მისი ფართო და სწრაფი გავრცელებით, მეორე მხრივ კი, იმ ფაქტით, რომ ცოტა რამ ვიცით თავად ვირუსის ბუნებაზე და მესამეც, არ არსებობს მედიკამენტი და ვაქცინა მის წინააღმდეგ. 

ამის მიუხედავად, ვფიქრობ, პანიკა არ არის კარგი მოკავშირე. ცნობილია, რომ სტრესს სერიოზული ზეგავლენის მოხდენა შეუძლია ჩვენი იმუნური დაცვის სისტემაზე. სწორია სიფრთხილე და დაფიქრება, რა შეგვიძლია გავაკეთოთ იმისთვის, რომ ავად არ გავხდეთ“. 

თამარ ობგაიძე კორონავირუსის თავიდან ასაცილებლად, მთავარ რეკომენდაციებსაც გვთავაზობს: 

„1. შეიკავეთ თავი არასაჭირო მოგზაურობებისაგან, როგორც ქვეყნის გარეთ, ასევე, მის შიგნით. 

2. მოერიდეთ მასობრივ თავშეყრის ადგილებში ყოფნას. 

3. მიირთვით მხოლოდ კარგად გარეცხილი საკვები. 

4. დაიბანეთ ხელები ხშირად, დასაბანად სჯობს, გამოიყენოთ თხევადი საპონი. ხელი უნდა დაიბანოთ, მინიმუმ, 20 წამის განმავლობაში. 

5. თუ ვერ ახერხებთ ხელების დაბანას, გაიწმინდეთ ის ალკოჰოლის შემცველი სადეზინფექციო ხსნარით. ის უნდა შეიცავდეს, მინიმუმ, 60% ალკოჰოლს. ხსნარი უნდა დაისხათ ხელზე, შეიზილოთ, მინიმუმ, 20 წამის განმავლობაში და გაიშროთ ჰაერზე. 

6. მოერიდეთ ქუჩაში სახეზე ხელების შეხებას. 

7. თუ ავად ხართ, მოერიდეთ კონტაქტებს და გამოიყენეთ დამცავი ნიღაბი. 

8. ნიღბის გამოყენებას თავისი წესები აქვს _ ის უნდა გაიკეთოთ სახეზე ისე, რომ არ შეეხოთ მის წინა ნაწილს. ნიღაბი სრულად უნდა ფარავდეს ცხვირსა და პირს. გამოყენებული ნიღაბი უნდა მოიხსნათ ისე, რომ არ შეეხეოთ მის წინა ნაწილს და ჩააგდოთ უახლოეს სანაგვე ყუთში. 

9. დაიცავით ხველისა და ცემინების ეტიკეტი _ ამ დროს უნდა აიფაროთ სუფთა ერთჯერდი ხელსახორცი ცხვირსა და პირზე, გამოყენების შემდეგ კი მაშინვე გადააგდოთ. თუ ვერ ასწრებთ ხელსახოცის მომარჯვებას, სახეზე მჭიდროდ აიფარეთ თქვენივე მოხრილი იდაყვი. 

10. თვითიზოლაცია სასჯელი არ არის. თუ ის გჭირდებათ, აუცილებლად უნდა დაემორჩილოთ წესებს და იზოლაციაში გაატაროთ ის ორი კვირა, რაც დაწესებულია. ამით შეამცირებთ დაავადების შიდა გავრცელების რისკს და დაიცავთ ინფიცირების მაღალი რისკის ადამიანებს გართულებებისაგან. 

და კიდევ, გახსოვდეთ, თქვენი პატარები, შეიძლება, წუხდნენ იმის გამო, რაც ეს დღეებია განუწყვეტლივ ესმით. მიეცით საშუალება, გამოხატონ თავიანთი წუხილი და შეშფოთება ვირუსის გავრცელების გამო. აუხსენით დაავადების შესახებ, დაუთმეთ მეტი დრო მათთან კომუნიკაციას და ასწავლეთ უსაფრთხოების წესები“. 

რაც შეეხება სწავლის განახლებას, თამარ ობგაიძე ამბობს, რომ ეს დამოკიდებულია არსებულ ეპიდემიურ სიტუაციაზე

თათია გოჩაძე

]]>
versiaprinti@yahoo.com (super admin) საზოგადოება Wed, 25 Mar 2020 13:07:02 +0400
COVID 19-ით ინფიცირებული სპორტის ვარსკვლავები http://versia.ge/2013-07-31-11-23-15/item/6617-covid-19-ით-ინფიცირებული-სპორტის-ვარსკვლავები.html http://versia.ge/2013-07-31-11-23-15/item/6617-covid-19-ით-ინფიცირებული-სპორტის-ვარსკვლავები.html

როგორ შეცვალა კორონავირუსმა მსოფლიო სპორტის დღის წესრიგი და გადაიდება თუ არა 2020 წლის ოლიმპიადა

მართალია, ევროპაში კორონავირუსის გავრცელების გამო, სპორტული ღონისძიებები კი არა, პრაქტიკულად, ყველაფერი შეჩერდა, მაგრამ ცნობილი სპორტსმენები მაინც ყურადღების ქვეშ არიან მოქცეულნი. საქმე ისაა, რომ სპორტის ვარსკვლავებს ათეული და ასეული მილიონობით დოლარი აქვთ ნაშოვნი, რაც წესით, იმას უნდა ნიშნავდეს, რომ მათ არც თვითიზოლაციის პრობლემა უნდა ჰქონდეთ და არც _ ექიმთა დანიშვნის, მაგრამ ყველაფერი ისე მარტივად არ ხდება, როგორც ერთი შეხედვით ჩანს.

მაგალითისთვის მადრიდის „რეალის“ პრეზიდენტის, ლორენცო სანსის დასახელებაც კმარა. ეს კაცი „სამეფო გუნდის“ პირველი პირი 1995-2000 წლებში იყო, შემდეგ კი არჩევნები მოქმედ პრეზიდენტთან, ფლორენტინო პერესთან წააგო. სანსი არამარტო ესპანეთის, არამედ, ევროპის მასშტაბით, ერთ-ერთ ყველაზე მდიდარ და გავლენიან პირად ითვლებოდა, მაგრამ რად გინდა _ ბატონი ლორენცო, 76 წლის ასაკში, სწორედ კორონავირუსმა იმსხვერპლა. 

*** 

გულშემატკივრებისთვის ნამდვილი შოკი იყო იმის გაგება, რომ ვირუსით დაავადდა NBA-ს ყველაზე მაღალანაზღაურებადი კალათბურთელი, მეფედ ცნობილი ლებრონ ჯეიმსი. ჯეიმსი ის კაცია, ვისაც ლეგენდარულ მაიკლ ჯორდანს ადარებენ და ბარემ ისიც ვთქვათ, რომ ლებრონმა ჯორდანის რამდენიმე მიღწევა გააუმჯობესა კიდეც. 

 

კარიერის განმავლობაში, ჯეიმსის მიერ ნაშოვნი ჰონორარი, თუ სარეკლამო კონტრაქტიდან მიღებული თანხა, ლამის მილიარდ დოლარად ფასდება, თუმცა ამ ფულმა მას ვერ უშველა და ვირუსს ვერ დაემალა. 

ამიტომ, სანამ სხვა მოვლენების შესახებ გამცნობთ, კიდევ ერთხელ შეგახსენებთ, რომ მთავარი, ამ შემთხვევაში, ფული კი არა, იმ რეკომენდაციების ზედმიწევნით დაცვაა, რომელსაც მსოფლიო, თუ საქართველოს ჯანდაცვის სისტემის წარმომადგენლები გვთავაზობენ. 

*** 

იაპონიაში ჰარუ ბაშო დასრულდა. დასრულდა ისევე უღიმღამოდ, როგორც დაიწყო. სიმართლე გითხრათ, ვერავინ მიხვდა, რატომ არ გადადეს მარტის სუპერტურნირი, რადგან ის გულშემატკივრების გარეშე ჩატარდა, არც დიდი გაშუქება ჰქონდა და არც _ სოლიდური ჰონორარები. 

ქართველმა ლევან გორგაძემ ტურნირი ისევ მტკივანი მუხლით ჩაატარა და უარყოფითი ბალანსი _ 6:9-ზე გაიფორმა. ეს იმას ნიშნავს, რომ ლევანი შემდეგ ტურნირსაც უძლიერესთა შორის ჩაატარებს ანუ ქვედა ლიგაში არ გავარდება, მაგრამ საკთხავი ის არის, აქვს აზრი ასე ჩატარებას?! 

ისე, ტურნირის მთავარი შეხვედრა ბოლო დღეს გაიმართა _ იოკუძუნა ჰაკუჰო, იოკუუნა კაკურიუს დაუპირისპირდა და დაძაბულ ბრძოლაში მოუგო. შესაბამისად, იმპერატორის თასი და ჩემპიონის ტიტული, სწორედ ლეგენდარულ ჰაკუჰოს ერგო. 

რადგან იაპონია ვახსენეთ, ისიც ვთქვათ, რომ ქვეყნის ხელისუფლება სერიოზულად განიხილავს 2020 წლის ოლიმპიადის ჩატარებას. დღეს არსებული გეგმის მიხედვით, ოლიმპიადა 24 ივლისს უნდა დაიწყოს და 9 აგვისტოს დამთავრდეს, მაგრამ პრაქტიკულად, მთელი ევროპა ამის წინააღდეგია და ამომავალი მზის ქვეყანაში, საკუთარი სპორტსმენები, გაშვებას არ აპირებს. არადა, იაპონიაში გახშირებული კორონავირუსის შემთხვევების გამო, ოლიმპიური ობიექტების მშენებლობა-განახლება შეჩერებულია და თუ დროზე არ აღდგა სამუშაოები, ოლიმპიადა ფიზიკურად ვერ ჩატარდება. 

პარალელურად, ოლიმპიადის ერთი წლით გადადება იაპონიის ხელისუფლებას რამდენიმე მილიარდით აზარალებს, რადგან ოლიმპიადის გასამართად, ქვეყანამ ბევრი გაიღო და ახლა, ერთი წლით რომ გადადოს, იგივე გზის გავლა, იგივე ღონისძიებების ჩატარება მოუწევს, რაც ორმაგ ხარჯთანაა დაკავშირებული. 

ოლიმპიადის ბედი კი გაირკვევა, მაგრამ გაურკვეველი ის რჩება, რა უნდა ქნან იმ სპორტსმენებმა, რომლებიც ოლიმპიური ლიცენზიებისთვის ბრძოლას, სწორედ მარტსა და აპრილში აპირებდნენ? 

*** 

ერთი რამის თქმა თამამად შეგვიძლია: თუ ოლიმპიადა 2020 ჩატარდება, ჩოგბურთში წარმომადგენელი აუცილებლად გვეყოლება _ ნიკოლოზ ბასილაშვილმა იქ თამაში მარტივი მიზეზის გამო გაინაღდა. 

ოლიმპიადაზე მონაწილეობას რეიტინგის პირველი 56 წევრი იღებს. 7 ივნისამდე, ყველა საჩოგბურთო ტურნირი გაჩერებულია, შესაბამისად, რეიტინგში ცვლილებები არ იქნება, ნიკა კი, დღეის მდგომარეობით, 26-ეა. აი, 7 ივნისს, საჩოგბურთო ტურნირებზე აკრძალვა თუ მოიხსნება, ნიკამ ერთიც რომ არ ითამაშოს, მისი ქულები 56-ში დასარჩენად, მაინც საკმარისი იქნება. 

*** 

მსოფლიო ფეხბურთის ვარსკვლავმა, კრიშტიანუ რონალდუმ განაცხადა, ჩემი ქალაქის, მადეირას საავადმყოფოს 200 ათასი ევროს ღირებულების პირბადეებსა და ხალათებს უსასყიდლოდ გადავცემო. არადა, „ბაიერნის“ ფორვარდმა, რობერტ ლევანდოვსკიმ ვირუსის საწინააღმდეგო ფონდში მილიონი ისე უხმაუროდ გადარიცხა, ჟურნალისტებს რომ არ დაეწერათ, ვერც ვერავინ გაიგებდა. 

სავარაუდოდ, პორტუგალიელის მომჭირნეობა იმით უნდა ავხსნათ, რომ ტურინის „იუვენტუსის“ შეფებმა უკვე გამოაცხადეს, ფეხბურთელებს გასამრჯელოს ვერ გადავუხდით და ამიტომ, წლიურ ხელფასებს 30%-ით ვამცირებთო. 

რონალდუ სეზონში 30 მილიონს იღებს, რაც იმას ნიშნავს, რომ ის დაახლოებით, ათი მილიონით იზარალებს. 

სხვათა შორის, გერმანიაში ფულის შეგროვების თემა ერთგვარ გამოწვევადაც იქცა. ყველა ცდილობს, რაღაცით დაეხმაროს იმ ფონდებს, რომლებიც კორონავირუსის წინააღმდეგ იბრძვიან. აგერ, ბუნდესნაკრების წევრებმა _ ლეონ გორეცკამ და იოზუა კიმიხმა სოციალურ ქსელში დაწერეს, ვისაც რამდენი გაქვთ, იმდენი შესწირეთ ფონდსო, თავადაც გაიღეს თანხა და მეორე დილით, ფონდის ანგარიშზე 2.7 მილიონი ევრო იდო. 

რონალდუს შემდეგ, „იუვეს“ მთავარი ვარსკვლავი არგენტინელი, პაულო დიბალაა. ჰოდა, მას და მის მეგობარ გოგონას ვირუსი ერთობლივად დაუდგინდათ. მართალია, ფეხბურთელი ოფიციალურ გვერდზე წერს, თავს კარგად ვგრძნობთო, მაგრამ იტალიაში შიშობენ, რომ ცნობილ ადამიანებზე რეალური ვითარება იმალება. 

კორონავირუსი აქვთ „მილანის“ ლეგენდარულ კაპიტანს, პაოლო მალდინისა და მის შვილს. ამის შესახებ თბილისის მერმა, კახა კალაძემაც ისაუბრა, რომელმაც აღნიშნა, რომ მალდინისთან კომუნიკაცია ჰქონდა და ის მხნედ არის. 

*** 

კატასტროფული ვითარებაა ყაზახურ კლუბებში. ყველა ყაზახურმა გუნდმა გამოაცხადა, რომ ფეხბურთელებთან გაფორმებულ კონტრაქტებში გარკვევით წერია, ფორს-მაჟორულ სიტუაციაში, კლუბი სიტუაციის შესაბამისად მოიქცევაო. ჰოდა, იქ მოთამაშე, აბსოლუტურად ყველა ფეხბურთელსა და მწვრთნელს, ხელფასები გაუნულეს და არცერთ ცენტს არ გადაუხდიან. 

ქართველთაგან ყაზახეთში, ნაკრების კაპიტანი, ჯაბა კანკავა, ნაკრების წევრები _ ნიკა კვეკვესკირი, ლუკა ზარანდია, გუჯა ლობჯანიძე, ლევან კუტალია, შოთა გრიგალაშვილი და თამაზ ცეცხლაძე თამაშობენ. ყაზახური „ორდაბასის“ მთავარი მწვრთნელი კახა ცხადაძეა, ხოლო მისი ასისტენტი _ გიორგი ჩიხრაძე, რაც იმას ნიშნავს, რომ ისინიც უხელფასოდ დარჩნენ. 

 

*** 

ისე ჩანს, კორონავირუსს გადაურჩა ლიონელ მესი. არგენტინელი სუპერვარსკვლავი საკუთარ სახლშია გამოკეტილი და ფორმა რომ შეინარჩუნოს, საკუთარ სპორტდარბაზშივე ვარჯიშობს. 

ვინც არ იცის, ვეტყვით, რომ ლეომ საკუთარი სპორტდარბაზის მოსაწყობად, თავის დროზე, სამი მილიონი დახარჯა და აქვს ყველაფერი _ მარტივი გირებით დაწყებული, სამედიცინო პუნქტით დასრულებული. 

რონალდუსი არ იყოს, 30% ხელფასიდან მესისაც დააკლდება ანუ ის სრულ ჯამაგირს მანამ ვერ აიღებს, სანამ სეზონი არ განახლდება. კატალონიური კლუბის წლიური ბიუჯეტის 53% ანუ 550 მილიონი ევრო, სწორედ პირველ გუნდზე იხარჯება და იმის გათვალისწინებით, რაც დღეს ხდება, კლუბს შემოსავლები შემოაკლდა. ხელმძღვანელობამ კი კრედიტების აღებასა და ვალებში წასვლას, ფეხბურელებისთვის ხელფასების ჩამოკლების გადაწყვეტილება მიიღო, რასაც მოთამაშეები გაგებით მოეკიდნენ და დასთანხმდნენ. 

*** 

იტალიაში არსებული სიტუაციის შემდეგ, ქვეყანა არაერთმა ცნობილმა სახემ დატოვა. ამ დროს კი, სხვა ქვეყანაში დასასვენებლად მყოფი ეროვნული ნაკრების მთავარი მწვრთნელი, რობერტო მანჩინი სამშობლოში დაბრუნდა. 

„მე ეროვნული ნაკრების მწვრთნელი ვარ და უფლება არ მაქვს, ასეთ დროს, ჩემი ქვეყნის გვერდით არ ვიყო. მე და ჩემი გუნდი ხომ, სწორედ ამ ქვეყნის ღირსებას ვიცავთ. ამიტომ, აქ ვარ და ნდობას ვუცხადებ იტალიელ ექიმებს“, _ განაცხადა მანჩინიმ.

ბათო ჯაფარიძე

]]>
versiaprinti@yahoo.com (super admin) საზოგადოება Wed, 25 Mar 2020 13:06:06 +0400
კორონაგეტოს ქრონიკები _ ვის და რატომ აწყობს საგანგებო მდგომარეობის გამოცხადება http://versia.ge/2013-07-31-11-23-15/item/6613-კორონაგეტოს-ქრონიკები-_-ვის-და-რატომ-აწყობს-საგანგებო-მდგომარეობის-გამოცხადება.html http://versia.ge/2013-07-31-11-23-15/item/6613-კორონაგეტოს-ქრონიკები-_-ვის-და-რატომ-აწყობს-საგანგებო-მდგომარეობის-გამოცხადება.html

„ჯოჯოხეთის მეცხრე შრე და კუპრის თუხთუხი“ ანუ რა პოლიტიკური ფასი აქვს COVID 19-ს

ხმა იმის შესახებ, რომ პლანეტა მალე მესამე მსოფლიო ომის წინაშე დადგებოდა, ბევრს მითი ეგონა. ვიღაცებმა ჩვენი პატრიარქის ქადაგებაც, მეორედ მოსვლა მოახლოებულიაო, რელიგიურ ფანატიზმად მონათლეს, მაგრამ იმ ვითარებიდან გამომდინარე, რაც ბოლო დროს შეიქმნა, თამამად შეგვიძლია ვთქვათ, რომ მესამე მსოფლიო ომიც დაწყებულია და მეორედ მოსვლაც. ეგაა ოღონდ: ანტიქრისტე ვირუსის სახით მოგვევლინა, ვირუსისა, რომელსაც მეცნიერებმა COVID 19 უწოდეს და რომელმაც თითოეული დედამიწელის ცხოვრების წესი რადიკალურად შეცვალა. ერთი სიტყვით, ყველა _ პოლიტიკურ-ეკონომიკური ექსპერტებით დაწყებული, სოციოლოგებითა თუ მარკეტოლოგებით დამთავრებული თანხმდება, რომ მას შემდეგ, რაც კორონაპანდემია ჩაცხრება, დედამიწა ახალ რეალობაში „გაიღვიძებს“. როგორი იქნება ეს რეალობა? _ ამის თქმა დანამდვილებით არავის შეუძლია, თუმცა უკვე ჩანს იმის ნიშნები, რომ პოსტპანდემიურ ეპოქაში მსოფლიოს ახალი გადანაწილება დაიწყოს. იმის თქმა, რომ ამ ახალ გადანაწილებაში საქართველოს განსაკუთრებული ფუნქცია ექნება, ცხადია, არ შეიძლება და ვერც იმის მტკიცებას დავიწყებთ, რომ წილხვედრობის გამო, სამყაროს ღერძი და ჭიპი გავხდებით, მაგრამ ის კი შეიძლება მოხდეს, რომ ახალი კორონავირუსის ბრძოლის ქრონიკებში, საქართველო იმ ქვეყნების რიცხვში აღმოჩნდეს, რომელი ქვეყნებიც 21-ე საუკუნის ჭირს, „ზარბაზნებითა და მეზარბაზნეებით“ შეიარაღებულნი დახვდნენ!

დიახ, ვინმეს მოსწონს თუ არა, ფაქტია: პირველი ინფიცირებულის გამოვლენის დღიდან, ქართული სახელმწიფოს მესვეურები ჩვენი გენიალური ეპიდემიოლოგების მითითებებს ზედმიწევნით იცავენ და, შესაბამისად, „კოვიდ 19“-თან ბრძოლაც ამ დრომდე ეფექტურად მიმდინარეობს ანუ ის, რაც ვერ მოახერხეს განვითარებულმა და დემოკრატიულმა ქვეყნებმა, მაგალითად, იტალიამ, საფრანგეთმა ან დიდმა ბრიტანეთმა, მოახერხა და შეძლო საქართველომ _ 17 მარტის მდგომარეობით, ახალი კორონავირუსის შიდა, ესე იგი, მეოთხეული გავრცელების ერთი შემთხვევაც არ არის დაფიქსირებული. 

ამას გარდა, საქართველო არც იმ ქვეყნებს მიეკუთვნება, სადაც კორონათი ინფიცირებულებს პირდაპირ ხვრეტენ. ამ მხრივ კი მსოფლიო, კიდევ ერთხელ, ჩრდილოეთ კორეის ბელადმა გააოცა. 

„ჩრდილოეთ კორეის ლიდერმა, კიმ ჩენ ინმა კორონავირუსთან საბრძოლველად საკმაოდ რადიკალური და სასტიკი გადაწყვეტილება მიიღო. მისი ბრძანებით, უნდა ესროლონ ყველას, ვისაც „კოვიდ 19“-ის ტესტზე დადებითი პასუხი ექნება“, _ იუწყება მსოფლიო მედია. 

სხვათა შორის, გარკვეული სადამსჯელო ღონისძიებები საქართველოშიც მოქმედებს ანუ პირი, რომელიც თვითიზოლაციის წესს დაარღვევს, პატიმრობით დაისჯება. 

„კარანტინის დამრღვევი მოქალაქეებისთვის, შესაძლოა, გარკვეული სანქციები, მათ შორის, პატიმრობაც დაწესდეს. პარლამენტის თავმჯდომარემ, არჩილ თალაკვაძემ, უმრავლესობის ლიდერს დაავალა, კარანტინის წესების დამრღვევი ადამიანებისთვის სპეციალური კანონპროექტი შემუშავდეს. 

უმრავლესობის ლიდერის, მამუკა მდინარაძის განცხადებით კი, მალე გახდება ცნობილი, კონკრეტულად რა სანქციებზე იქნება საუბარი. 

მდინარაძემ არ გამორიცხა, რომ შესაძლოა, ცვლილებები ადმინისტრაციულ ნაწილშიც შევიდეს. 

მამუკა მდინარაძის თქმით, შესაძლოა, ცვლილებები გულისხმობდეს პატიმრობასაც. 

ამ მკაცრი მექანიზმების მიღება აუცილებელი იმიტომაა, რომ თავიდან იყოს აცილებული კორონავირუსის გავრცელების ყველა გზა“, _ ეს ინფორმაცია, 17 მარტს, საინფორმაციო სააგენტო „ჰოთნიუსმა“ გაავრცელა. 

ყველაფერ ზემოთქმულიდან გამომდინარე, რასაკვირველია, პოლიტიკური დღის წესრიგიც შეიცვალა და შესაბამისად, იგივე 8 მარტის მემორანდუმიც, რომლითაც ხელისუფლება და ოპოზიცია არჩევნების 120/30-ზე ჩატარების სისტემაზე შეთანხმდა, პრაქტიკულად, აღარავის ახსოვს ანუ პოლიტიკური ელიტის მთავარი სალაპარაკო კორონავირუსია და ყველა, ვისაც არ ეზარება, ამ თემაზე საკუთარ აზრებს „აფრქვევს“. 

აი, მაგალითად, ოპოზიციონერმა და იაპონიაში საქართველოს ყოფილმა ელჩმა, მამუკა გამყრელიძემ სოციალურ ქსელში დაწერა: 

„არავის დაფრთხობას ვცდილობ, მხოლოდ ხმამაღლა ვფიქრობ ჩემის მოკლე ჭკუითა: რამდენ ხანს შეიძლება გაგრძელდეს ეს საყოველთაო კარანტინი, მიმოსვლის აკრძალვა და ნაჭუჭში ჩაკეტვა? 

წარმოიდგინეთ, რა რაოდენობის წვრილი და საშუალო ბიზნესი შეიძლება ყველაფერ ამას შეეწიროს. მსხვილსაც არ დაადგება კარგი დღე. 

ხალხს და, განსაკუთრებით საქართველოში, არ აქვს დაგროვილი ფული, რომ დიდხანს გაუძლოს ამ უძრაობას. 

ღარიბებში, უბრალოდ, შიმშილი დაიწყება. შიმშილს კი კრიმინალის ზრდა მოჰყვება. მზად არის ქვეყანა ასეთი გამოწვევისთვის? 

საერთოდ, არის ექსტრიმისთვის მზად? 

ტრანსპორტის გაჩერება, ბიზნესის დახურვა და სახლში ჩაკეტვა გამოსავალი არ არის. პირადი ჰიგიენის, დისტანციის დაცვა და რისკჯგუფების იზოლირება არის გამოსავალი. 

ვირუსი მოგკლავს, შიმშილი თუ ყაჩაღის ტყვია, რა მნიშვნელობა აქვს? 

გავიმეორებ: არავის შეშინებას არ ვცდილობ, მაგრამ ბიზნესის, განსაკუთრებით წვრილი და საშუალოს კოლაფსმა, შეიძლება, კატასტროფის წინაშე დაგვაყენოს“. 

ძნელია, ბატონ გამყრელიძეს არ დაეთანხმო: მართლაც, რა მნიშვნელობა აქვს, ბოლოს კორონავირუსი მოგვიღებს თუ შიმშილი? 

აი, ამ დრამატული მოცემულობის ფონზე კი ზოგიერთი ოპოზიციური დაჯგუფება დაჟინებით ითხოვს, უფრო სწორად, სვამს კითხვას, თუ რატომ არ აცხადებს ხელისუფლება საგანგებო მდგომარეობას? 

მოდი, ჯერ ის გავარკვიოთ, თუ რა არის და რა შემთხვევაში ცხადდება საგანგებო მდგომარეობა, ესე იგი, ერთგვარად, კომენდანტის საათი. 

„გვექნება თუ არა ქუჩაში გასვლის უფლება და სხვა რა შეზღუდვები დაგვიწესდება საგანგებოს გამოცხადების შემთხვევაში?“ _ ამ კითხვებით „ჰოთნიუსმა“ ახალგაზრდა იურისტთა ასოციაციის წარმომადგენელს, მერაბ ქართველიშვილს მიმართა, რომელმაც სააგენტოსთან საუბრისას განაცხადა: 

„საგანგებო მდგომარეობის გამოცხადებას არეგულირებს შესაბამისი კანონმდებლობა, საგანგებო მდგომარეობის შესახებ კანონი, რომელიც მიუთითებს საგანგებო მდგომარეობის გამოცხადების მიზნებზე -რა შემთხვევაში შეიძლება იყოს გამოცხადებული ასეთი მდგომარეობა. 

ერთ-ერთი ასეთი მიზანი, შეიარაღებული ამბოხების, ტერორისტული აქტის და ა.შ. გარდა, არის ეპიდემია, როდესაც სახელმწიფოს ეძლევა უფლებამოსილება, გამოაცხადოს საგანგებო მდგომარეობა. ასეთ დროს, საქართველოს პრეზიდენტი, პრემიერ-მინისტრის წარდგინებით, აცხადებს საგანგებო მდგომარეობას საქართველოს მთელ ტერიტორიაზე ან რომელიმე ნაწილზე. პრეზიდენტის მიერ გამოცხადებას, პრემიერის თანახელმოწერა სჭირდება და ამის შემდეგ ამოქმედებულად ითვლება, თუმცა პირველივე შესაძლებლობისთანავე, პარლამენტში უნდა შეიტანონ დასამტკიცებლად. თუ პარლამენტმა არ დაამტკიცა, წყდება საგანგებო მდგომარეობა. 

კანონში პირდაპირ არის ჩამონათვალი, რა შეუძლია გააკეთოს მოსახლეობამ. საქართველოს პრეზიდენტის მიერ გამოიცემა დეკრეტი, სადაც შეუძლიათ საქართველოს კონსტიტუციით გაწერილი უფლებების შეზღუდვა. სავარაუდოდ, ეპიდემიის საფრთხის გამო გამოცხადებული საგანგებო მდგომარეობის დროს, შეიზღუდება ისეთი უფლებები, როგორიცაა მიმოსვლის, თავისუფლად გადაადგილების უფლება; აქციის გამართვის, საზოგადოებრივი თავშეყრის უფლება. თავისუფლების შეზღუდვა სასამართლოს გარეშე დაუშვებელია, მაგრამ თუ გამოცხადდა დეკრეტი, ასეთ მიდგომებზე შეიძლება პირის იზოლაციის ან კარანტინში მოთავსების მიზნით, სასამართლოს გარეშეც მოხდეს ეს. შს და თავდაცვის სამინისტროები იქნებიან პასუხისმგებელნი ამ აქტების აღსრულებაზე, სავარაუდოდ, თუ პრემიერი ან პრეზიდენტი ჩათვლის საჭიროდ, ასეთ დროს, თავდაცვის ძალების დახმარებაც ხდება ხოლმე საჭირო. 

შესაძლებელია, დეკრეტში ჩაიწეროს, რომ სახლიდან გასვლა დაუშვებელია, გარდა სამსახურეობრივი მოვალეობისა, რომელზეც კონკრეტული დოკუმენტი უნდა იყოს გაცემული და ამის გამო ქუჩაში გასვლის უფლება მოგვეცეს. რას ჩაწერენ დეკრეტში, ეს ჯერ არ ვიცით. შეზღუდვები საგანგებო მდგომარეობის დროს უნდა მოერგოს კონკრეტულ ვითარებას. 

იტალიის გარდა, საგანგებო ვითარება გამოაცხადა დანიამ, მიუხედავად იმისა, რომ დანიაში იტალიის მსგავსი ვითარება არაა, პრევენციის მიზნით, მაინც გააკეთა ეს. 

არ მგონია, პანდემიის გამო გამოცხადდეს საგანგებო მდგომარეობა, ეპიდემიური აფეთქების საფრთხის დროს კი, ეს შესაძლებელია მოხდეს“. 

17 მარტს, პრემიერმა გახარიამ, პრინციპში, არ დამალა, რომ საქართველო კორონავირუსის ეპიდაფეთქების ზღვარზე დგას, თუმცა იქვე განმარტა, რომ ამის მიუხედავად, საგანგებო მდგომარეობის გამოცხადება ამ ეტაპზე არ განიხილება. ისე, მსოფლიოს არაერთმა დემოკრატიულმა ქვეყანამ, ვირუსთან საბრძოლველად ერთ-ერთ ყველაზე ეფექტურ გზად, სწორედ საგანგებო ვითარების გამოცხადება მიიჩნია. ამ ფონზე, გასაკვირი არ იქნება, რომ ჩვენი მთავრობაც ზუსტად ანალოგიურ გზას დაადგეს, თუმცა აქვე, ისიც უნდა ვთქვათ, რომ მოვლენების ამ სცენარით განვითარების შემთხვევაში, ისედაც დამფრთხალი მოსახლეობა, კიდევ უფრო დაფრთხება ანუ ხალხს ტერმინი _ „საგანგებო მდგომარეობა“ აშინებს, რისი მიზეზიც, ალბათ, ჩვენს კომუნისტურ წარსულში უნდა ვეძებოთ. 

კერძოდ, ყველას კარგად გვახსოვს 1989 წლის სისხლიანი 9 აპრილი _ მას შემდეგ, რაც რუსმა ჯარისკაცებმა თავისუფლებისთვის მებრძოლი უიარაღო ქართველი გოგო-ბიჭები ამოხოცეს და რუსთაველის გამზირზე სისხლის გუბეები დააყენეს, ქვეყნის ბოლშევიკურმა მმართველობამ თბილისში კომენდანტის საათი გამოაცხადა, რის გამოც ადამიანებს ქუჩაში თავისუფლად გადაადგილება ეკრძალებოდათ და თუნდაც პროდუქტის საყიდლად რომ გასულიყვნენ, ლამის სპეცსაშვები იყო საჭირო. 

სხვათა შორის, საგანგებო მდგომარეობა, როგორც წესრიგის დამყარების უმაღლესი ფორმა, ჩვენს ქვეყანაში უახლოეს წარსულში ორჯერ კიდევ გამოცხადდა: ერთხელ, 2003 წლის ნოემბრის მოვლენების შემდეგ, მეორედ კი, 2007 წლის ასევე, სისხლიანი 7 ნოემბრის კვალდაკვალ. 

„...22 ნოემბერს, ახალი პარლამენტის პირველ სხდომაზე, როცა ედუარდ შევარდნაძე მისასალმებელ სიტყვას კითხულობდა, სხდომათა დარბაზში მომიტინგეები შეიჭრნენ მიხეილ სააკაშვილის მეთაურობით. 

შევარდნაძემ დაცვის თანხლებით დატოვა დარბაზი. დარბაზი დატოვეს სხდომაზე გამოცხადებულმა დეპუტატებმა, ასევე, პარლამენტის მიმდებარე ტერიტორიიდან წავიდნენ ხელისუფლების მომხრე მომიტინგეები. 

საქართველოს პარლამენტის შენობა ოპოზიციის მომხრეებმა დაიკავეს. მოგვიანებით, მათ დაიკავეს ასევე, სახელმწიფო კანცელარიის შენობა. პოლიციას ხელი არ შეუშლია მომიტინგეებისთვის, დაეკავებინათ პარლამენტისა და კანცელარიის შენობები. შევარდნაძემ, რომელიც კრწანისის რეზიდენციაში იმყოფებოდა, საგანგებო მდგომარეობა გამოაცხადა.

მიხეილ სააკაშვილმა მოუწოდა მომიტინგეებს, დაეკავებინათ შინაგან საქმეთა სამინისტროსა და სახელმწიფო ტელევიზიის შენობები. 

იმავდროულად, სააკაშვილმა კვლავ მოითხოვა შევარდნაძის გადადგომა, წინააღმდეგ შემთხვევაში, კრწანისისის რეზიდენციასთან აქციების გაგრძელებით დაიმუქრა. 

23 ნოემბერს, 20:00 საათზე, გაიმართა შევარდნაძისა და ოპოზიციის ლიდერების შეხვედრა რუსეთის საგარეო საქმეთა მინისტრის, იგორ ივანოვის შუამავლობით. შეხვედრის შემდეგ შევარდნაძემ გადადგომის შესახებ განაცხადა. 

პრეზიდენტის გადადგომას სხვა თანამდებობის პირების, მათ შორის, შინაგან საქმეთა მინისტრის გადადგომა მოჰყვა. 

24 ნოემბერს, მიხეილ სააკაშვილმა სამოქალაქო დაუმორჩილებლობის კამპანიის შეწყვეტის შესახებ გამოაცხადა, ხოლო პრეზიდენტის მოვალეობის შემსრულებელმა, ნინო ბურჯანაძემ გააუქმა 22 ნოემბერს შემოღებული საგანგებო მდგომარეობა“, _ ესაა ამონარიდი 2003 წლის „ვარდების რევოლუციის“ ქრონიკებიდან. 

რაც შეეხება 2007 წლის 7 ნოემბრის შემდეგ გამოცხადებულ საგანგებო მდგომარეობას, ამის შესახებ ინტერნეტარქივში წერია: 

„7 ნოემბერს, დილით, საგანგებო ბრიფინგზე, თბილისის მერმა, გიგი უგულავამ განაცხადა, რომ ხელისუფლება არ დაუშვებდა დედაქალაქი კარვების ქალაქად გადაქცეულიყო. მისი თქმით, აუცილებელი იყო რუსთაველის გამზირზე მოძრაობის აღდგენა და ტერიტორიის გაწმენდა. 

„დიახ, ჩვენ ამას ხელი შევუშალეთ, რომ თბილისი არ გადაქცეულიყო კარვების ქალაქად, პირველ რიგში, იმიტომ, რომ ეს არის კანონის მოთხოვნა. 2 ნოემბრის შემდეგ არანაირი ლეგალური საფუძველი იმისა, რომ ტრანსპორტი რუსთაველის გამზირზე არ მოძრაობდეს, არ არსებობდა“, _ განაცხადა უგულავამ. 

იმ დროს, სახალხო დამცველმა, სოზარ სუბარმა დაგმო დილით, რუსთაველის გამზირზე საპროტესტო აქციის, მათ შორის, მოშიმშილეების დარბევის ფაქტი. ოპოზიციამ საპროტესტო აქცია განაახლა. 

პარლამენტის წინ შეკრებილმა საპროტესტო აქციის მონაწილეებმა რუსთაველის გამზირი პოლიციასთან დაპირისპირების ფონზე დაიკავეს. 

იყო ფიზიკური შეხლა-შემოხლა. პოლიცია ხელკეტებით უსწორდებოდა მომიტინგეებს, რომლებიც სამანქანო გზის დაკავებას ცდილობდნენ. ადგილზე მობილიზებული იყო ასობით პოლიციელი, რომლებმაც მოგვიანებით დატოვეს ტერიტორია. 

დეპუტატმა, გიგა ბოკერიამ მმართველი პარტიიდან განაცხადა, რომ პოლიცია კანონის ფარგლებში მოიქცა. 

„ეს იყო ქუჩის უკანონოდ გადაკეტვის მცდელობა. მათ აქვთ შესაძლებლობა, განაგრძონ აქცია ქუჩის გადაკეტვის გარეშე“, _ განაცხადა მან. 

პოლიციამ აქციის დასაშლელად, პარლამენტის წინ, ცრემლსადენი აირი, ხელკეტები, რეზინის ტყვიები, აკუსტიკური თოფები და წყლის ჭავლი გამოიყენა. 

პრემიერ-მინისტრმა, ზურაბ ნოღაიდელმა განაცხადა, რომ აუცილებელი იყო რუსთაველის გამზირის მომიტინგეებისაგან განთავისუფლება და ქვეყანა აგრძელებდა „ჩვეულებრივად და ნორმალურად ფუნქციონირებას“. 

„ძალის გამოყენებით გადაიკეტა რუსთაველის ქუჩა, შესაბამისად, იქნა მიღებული სპეციალური ზომები რუსთაველის ქუჩის გასახსნელად. გამოყენებული იყო წყლის ჭავლი, დასავლური ცრემლსადენი გაზი, რომელი გამოიყენება ხოლმე მშვიდობიანი დემონტრაციების დასაშლელად, ის, რაც მოხდა დღეს“, _ განაცხადა ნოღაიდელმა. 

250-მდე ადამიანმა მიმართა საავადმყოფოებს მას შემდეგ, რაც სამართალდამცავებმა რუსთაველის გამზირზე საპროტესტო აქციის მონაწილეები დაშალეს. 

ოპოზიციის ლიდერებმა საპროტესტო აქციების განახლებისკენ მოუწოდეს ასობით მომიტინგეს, რომლებიც რიყეზე შეიკრიბნენ. მომიტინგეებმა რიყეზე გადაინაცვლეს მას შემდეგ, რაც სპეცრაზმმა მათი აქცია პარლამენტის წინ დაშალა. სამართალდამცავებმა რიყეზე შეკრებილი მომიტინგეებიც დაშალეს. 

ათასობით მომიტინგე მტკვრის სანაპიროსკენ და მეტეხის ტაძრისკენ მიმავალი ტერიტორიებისაკენ მასობრივად გაიფანტა. მათ სპეცდანიშნულების რაზმის წევრები სდევნიდნენ; იყო მათ წინააღმდეგ ქვების სროლის შემთხვევებიც. მომიტინგეებს გზა არ გადაუკეტავთ, თუმცა მათი დაშლა მაინც დაიწყო. ჯანდაცვის სამინისტროს ბოლო ინფორმაციით, არეულობის დროს, 508 ადამიანი დაშავდა. 

აქციის ძალისმიერად დაშლის შემდეგ, შინაგან საქმეთა სამინისტრომ აუდიოჩანაწერი და ვიდეომასალა გამოაქვეყნა, რომელიც საშუალებას აძლევდა ხელისუფლებას განეცხადებინა, რომ ოპოზიციის ზოგიერთი ლიდერი რუსეთის კონტრდაზვერვის სამსახურთან თანამშრომლობდა... 

მიხეილ სააკაშვილმა, ჩანაწერების გავრცელების შემდეგ, საგანგებო განცხადება გააკეთა. მისი თქმით, დაზვერვის სამსახურის ინფორმაციით, საქართველოში არეულობა იგეგმებოდა. 

„ჩვენ ვიცით, რომ ალტერნატიული მთავრობა უკვე ჩამოყალიბდა მოსკოვში. ბოლო დროს, რუსეთის კონტრდაზვერვამ საქართველოში საქმიანობა გააძლიერა. რუსული კონტრდაზვერვა ცდილობს, ფეხი მოიკიდოს ზოგიერთ რადიკალურ ოპოზიციურ პარტიას შორის. საქართველო უზარმაზარი ზეწოლის ქვეშ იმყოფება. ერთ-ერთმა რუსმა ოლიგარქმა, ბადრი პატარკაციშვილმა ღიად მოუწოდა მთავრობის დამხობისკენ. ბოლო დროს განვითარებული მოვლენების ფონზე, როდესაც პოლიციასა და მომიტინგეებს შორის შეტაკებები მოხდა, ჩვენ მივიღებთ ყველა ზომებს, რათა აღდგეს წესრიგი თბილისის ქუჩებში და ყველაფერი კონსტიტუციურ ფარგლებში დაბრუნდეს“, _ განაცხადა სააკაშვილმა. 

მისივე თქმით, რამდენიმე დიპლომატი რუსეთის საელჩოში არასასურველ პერსონად გამოცხადდა და ისინი მალე დატოვებდნენ საქართველოს. 

7 ნოემბერს, ღამით, ნიღბიანმა პირებმა ტელეკომპანია „იმედის“ სტუდიები დაარბიეს, ჟურნალისტებს შენობა დაატოვებინეს და აპარატურა გაანადგურეს. მოგვიანებით ტელეკომპანია „იმედს“, იმავე დღეს, ტელეკომპანია „კავკასიასაც“ შეუწყვიტეს მაუწყებლობა. 

პრეზიდენტმა იმავე დღეს გამოსცა დეკრეტი თბილისში 15-დღიანი საგანგებო მდგომარეობის გამოცხადების შესახებ. პრემიერ-მინისტრის, ზურაბ ნოღაიდელის თქმით, დროებითი შეზღუდვები დაწესდა დემონსტრაციებსა და მანიფესტაციებზე, ასევე, მასობრივი ინფორმაციის საშუალებებში არეულობის, ძალადობის და ხელისუფლების წინააღმდეგ ძალის გამოყენებით დამხობის მოწოდებებზე. 

„მხოლოდ ეს შეზღუდვები წესდება, სხვა მხრივ, სიტყვის თავისუფლება არ იზღუდება“, _ განაცხადა ნოღაიდელმა მაშინ, როცა საგანგებო მდგომარეობის დროს, მხოლოდ საზოგადოებრივ მაუწყებელს შეეძლო მაუწყებლობა“. 

მართალია, დღეს ხელისუფლება საკუთარ მოსახლეობას კი არ არბევს, არამედ, „მომაკვდინებელი“ ვირუსისგან იცავს, მაგრამ მოტივაციას, თუ რა საბაბით გამოცხადდება საგანგებო, მნიშვნელობა არ ექნება, რადგან საგანგებოს შემთხვევაში, ადამიანების გარკვეული უფლებები და თავისუფლებები შეიზღუდება. ეს ვირუსის გავრცელების პრევენციის მიზნით, შესაძლოა, მართლაც, ეფექტური ნაბიჯი იყოს, მაგრამ იქიდან გამომდინარე, რომ არჩევნები კარსაა მომდგარი, ოპოზიციას სალაპარაკო მიეცემა, საარჩევნო კამპანიის ნორმალურად ჩატარების საშუალება არ მაქვსო. 

კულუარებში ხმა დადის, რომ საგანგებოს გამოცხადება, სწორედ ოპოზიციას აწყობს, რადგან ზემოხსენებული შეთანხმება-მემორანდუმის მიუხედავად, როგორც ექსპერტები ამბობენ, მოგებული მაინც „ოცნებაა“ ანუ ძალიანაც რომ მოინდომოს, ოპოზიცია არჩევნებში წარმატებას ვერ მიაღწევს და აქედან გამომდინარე, ალბათ, შეეცდება, რომ იგივე კორონაპანდემიაც პირადი მიზნებისთვის გამოიყენოს, თუმცა „ვერსიის“ წყაროს თქმით, ხელისუფლება ოპოზიციის ანკესს არ წამოეგება და საგანგებო მდგომარეობას არ გამოაცხადებს. 

იმ ეჭვს, რომ საგანგებო ოპოზიციის ინტერესშია, ერთი გარემოებაც აძლიერებს: ოპოზიციასთან აფილირებული პირები საგანგებოს რაღაცნაირად ლობირებენ. აი, მაგალითად, რამდენიმე დღის წინ, „მთავარი არხის“ დამფუძნებელმა და გენერალურმა დირექტორმა, ნიკა გვარამიამ სოციალურ ქსელში დაწერა: 

„ხალხო, ნუ ქმნით საგანგებო მდგომარეობისგან მეორედ მოსვლას და ნუ ხატავთ, ლამის ბოსხის ტილოებს და ქუჩაში ეგზეკუციებს! 

დემოკრატიული მმართველობის საგანგებო რეჟიმია მკაცრად აწონილი და ადრესირებული! აბა, ავტორიტარულ სისტემებს სულ არ სჭირდება საგანგებო მდგომარეობები, ისედაც ეგრეა სულ! 

ხვალ, შესაძლოა, საჭირო გახდეს და წინასწარ ნუ ზაფრავთ ხალხს, ვინც გარკვეული არაა! კი ბატონო, ვიდაოთ საჭიროებაზე, ხანგრძლივობაზე, შეზღუდვების ლეგიტიმურობაზე და პროპორციულობაზე, მაგრამ ჯოჯოხეთის მეცხრე შრედ წარმოსახვა და ლამის კუპრის თუხთუხის ხმა სტატუსებში, უპასუხისმგებლობა და არცოდნაა, სულ მცირე!“ 

ისე, ჩვენთვის რომ ვთქვათ, საგანგებო მდგომარეობაში საგანგაშო მართლაც, არაფერია. ყველაფერს თავი რომ დავანებოთ, იგივე აშშ-მ, რომელიც დემოკრატიის ოაზისად ითვლება, საგანგებო სიტუაცია ოთხი დღის წინ გამოაცხადა. 

13 მარტით დათარიღებულ, ტრამპის ხელმოწერილ დოკუმენტში სიტყვა-სიტყვით წერია: 

„1. საგანგებო სიტუაციების ფონდიდან გამოიყოფა 50 მილიარდი დოლარი და ყველა საავადმყოფო გაააქტიურებს საგანგებო სიტუაციების გეგმას. 

2. აშშ-ს ჯანდაცვის დეპარტამენტისა და მის ხელმძღვანელის უფლებამოსილება გაფართოვდება და მას ექნება უფლება, გადახედოს სამედიცინო მომსახურების წესებს და შეამსუბუქოს რეგულაციები. 

3. გადაიხედება ექიმების ლიცენზირების კანონმდებლობა, რაც ყველა ექიმს მისცემს საშუალებას, იმუშაოს ყველა შტატში. ამავე დროს, კანონი შემსუბუქდება საავადმყოფოებისთვისაც და მათ ექნებათ საშუალება, თავად განსაზღვრონ, როგორ და სად გაუწევენ სამედიცინო დახმარებას პაციენტებს. 

4. უფრო მეტ მოქალაქეს შეეძლება, ექიმთან კონსულტაცია დისტანციურად გაიაროს. 

5. ხელმისაწვდომი იქნება კორონავირუსის 500 000 ტესტი. 

6. ერთ თვეში კი ხელმისაწვდომი გახდება ხუთი მილიონი ტესტი. ასევე, გაიხსნება ექსპრეს-ლაბორატორიები, სადაც მოქალაქეებს მანქანიდან გადმოსვლის გარეშე შეეძლებათ ტესტის გაკეთება. 

ამასთან, მთავრობა არ ურჩევს ტესტის გაკეთებას მათ, ვისაც კორონავირუსის სიმპტომები არ აღენიშნება. 

7. მთავრობა თანამშრომლობს კომპანია „გუგლთან“, რომელიც შექმნის ვებპლატფორმას, სადაც მოქალაქეებს შეეძლებათ, მიიღონ ინფორმაცია, თუ სად შეიძლება ვირუსზე ტესტის გაკეთება. 

8. მოხუცთა თავშესაფრებში მნახველების მიღება იკრძალება. 

9. სტუდენტურ სესხებზე პროცენტები დროებით გაუქმდება, რადგან აშშ-ში უნივერსიტეტებისა და კოლეჯების ნაწილი დახურულია. 

10. აშშ ისარგებლებს ნავთობის გაუფასურებით და შეისყიდის მარაგისთვის“. 

ერთი სიტყვით, მოვლენები ელვისებური სიწრაფით ვითარდება და არავინ იცის, ხვალ როგორი რეალობის წინაშე ვიდგებით, მით უმეტეს, იმ ფონზე, როცა სპეციალისტები საქართველოში კორონავრუსით დაინფიცირებულთა ზრდას ელოდებიან. ამ ფონზე, გარკვეული ვარაუდების გამოთქმა, ალბათ, არ შეიძლება, მაგრამ მას შემდეგ, რაც ეს პანიკა ჩაწყნარდება და ჩვენ, ადამიანები, ახალ კორონავირუსთან ერთად ცხოვრებას ვისწავლით, ცხადია, გავიგებთ, 2020 წლის „შავი გაზაფხული“ ვის ინტერესში შედიოდა და იგივე საქართველოში, ყველაფერ ამით რომელმა პოლიტიკურმა ჯგუფმა იხეირა! 

ისე, ჩვენ ვიკითხოთ, ამ კორონაგეტოს თავი როგორ დავაღწიოთ, თორემ პოლიტიკური ელიტის წარმომადგენლები მაინცდამაინც არ დაზარალდებიან! აკი, ხუმრობაც კი გაჩნდა, ეს „კორონა“ „ძაან სვეცკი“ ხალხს ემართებაო. 

ჰოდა, ჯანმრთელობას გისურვებთ და კორონაგეტოში გასაძლებად, აწგანსვენებული სახალხო პოეტის, ჯანსუღ ჩრკვიანის სიტყვებს დაგიტოვებთ: 

„ოღონდაც ფრთხილად, ძვირფასებო, 

ფრთხილად ოღონდაც, 

ეს დედამიწა ალმაცერად გვიმზერს, 

ბებერი, 

რადგან ჩვენს შემდეგ დაიწყება 

თქვენი გოლგოთა 

და აღარავინ არ იქნება 

მიმტევებელი!“

ნინო დოლიძე

 

]]>
versiaprinti@yahoo.com (super admin) საზოგადოება Wed, 18 Mar 2020 12:06:12 +0400
რამდენი მილიარდი დააკარგვინა „კოვიდ 19“-მა მსოფლიო სპორტს http://versia.ge/2013-07-31-11-23-15/item/6610-რამდენი-მილიარდი-დააკარგვინა-„კოვიდ-19“-მა-მსოფლიო-სპორტს.html http://versia.ge/2013-07-31-11-23-15/item/6610-რამდენი-მილიარდი-დააკარგვინა-„კოვიდ-19“-მა-მსოფლიო-სპორტს.html

კარანტინში მყოფი ცნობილი სპორტსმენები და ბურვაკით დაჯილდოებული რონალდინიო

შეიძლება თამამად ითქვას, რომ თუ ვინმე და რამე დაზარალდა კორონავირუსით, ერთ-ერთი პირველი სპორტის სამყაროა. ყველაფერს რომ თავი დავანებოთ, შეჩერდა ჩემპიონთა და ევროპის ლიგა, შეჩერდა ყველა საფეხბურთო ჩემპიონატი აზიის, ლათინური ამერიკისა და ავსტრალიის გარდა, დღის წესრიგში დგას ევროპის 2020 წლის საფეხბურთო ჩემპიონატის გადადება და მთავარი სპორტული მოვლენის _ ოლიმპიადის არჩატარება. უფრო გასაგებად რომ აგიხსნათ, მაგალითად, მხოლოდ გერმანიის ბუნდესლიგამ, რომელმაც საფეხბურთო პირველობა, პირობითად, 2 აპრილამდე შეაჩერა, უკვე გამოაცხადა, რომ მხოლოდ ამ სამი კვირის განმავლობაში, საერთო ზარალი 770 მილიონი ევრო იქნება. რა თქმა უნდა, მთავარი ზარალი პირველი და მეორე ბუნდესლიგის კლუბებზე მოდის და მათი მესვეურები შეღავათებს ითხოვენ. ჯერჯერობით, შეღავათად მხოლოდ გადასახადების გადავადება სახელდება, მაგრამ საიდან უნდა მოიტანონ კლუბებმა ფული, უცნობია. ამიტომ, ისინი ამ პერიოდისთვის გადასახადების მოხსნას ითხოვენ, რაც უკვე ქვეყნის ეკონომიკას დაარტყამს.

ზუსტად ასეთ დღეში არიან დანარჩენი საფეხბურთო ლიგები და ყველაზე მეტად, ალბათ, ინგლისის პრემიერლიგა დაზარალდება. ჯერ ერთი, ინგლისში ყველაზე მეტი კლუბია და მეორეც, ყველაზე ძვირი, სწორედ პრემიერლიგის ტრანსლირება ღირს. 

* * * 

განგაში ტყუილად არ არის გამოცხადებული: არაერთი ცნობილი ფეხბურთელი ვირუსით, თუ ვირუსზე ეჭვით, საავადმყოფოშია გადაყვანილი. მათ შორისაა კრიშტიანუ რონალდუც, რომელიც ოჯახთან ერთად, კარანტინში კი გააქანეს, მაგრამ პორტუგალიელმა ნაშოვნი მილიონები დახარჯა, იქირავა კუნძული, სამედიცინო შტაბი, ახლა, მთელ ოჯახთან ერთად, კუნძულზეა განმარტოებული და იქ მკურნალობს. 

საავადმყოფოში არიან გადაყვანილნი NBA-ს ვარსკლავთა ნაწილიც, რომელთაც ვირუსი დაუდგინდათ. 

კორონავირუსით გარდაიცვალა ცნობილი მებრძოლის, კონორ მაკგრეგორის დეიდა. მოკლედ, ვირუსმა სამყარო შეცვალა, მთელი სპორტული სამყარო. 

* * * 

რა თქმა უნდა, გამონაკლისი არც საქართველოა. 14 მარტს, საქართველო-რუსეთს შორის გასამართი რაგბის შეხვედრა გადაიდო. ასევე, 26 მარტს, არ ჩატარდება ევროპის ერთა ლიგის ნახევარფინალური შეხვედრა, რომელშიც საქართველოს ბელორუსისთვის უნდა ემასპინძლა. ზოგადად, საქართველოში, ყველა სპორტული ღონისძიება შეწყდა, რომლებიც საერთაშორისო რეკომენდაციების გათვალისწინებით განახლდება. 

საინტერესოა, რომ წამყვანი საფეხბურთო ლიგების მესვეურები განიხილავენ ვარიანტს, რომლის მიხედვითაც ჩემპიონატებს დასრულებულად გამოაცხადებენ, ჩემპიონი არ დასახელდება და მომავალ სეზონში, ჩემპიონთა ლიგაზე ის გუნდები ითამაშებენ, რომლებსაც შესაბამისი პოზიცია დღეის მდგომარეობით უკავიათ. 

იმავე ლოგიკით, ქვედა ლიგებშიც ის გუნდები დაქვეითდებიან, რომლებიც ბოლო სამ ადგილზე არიან, მაგრამ ეს არავის აწყობს. ასეთ შემთხვევაში, ზარალი ასტრონომიული იქნება და თანაც, აუტსაიდერი კლუბების შეფები ამბობენ, რომ მათ გუნდებს გადარჩენის შანსი აქვთ და ეს შანსი უნდა გამოიყენონ. 

საქართველოში კი ჩემპიონატის ახლა დასრულება არანაირად არ გამოვა, რადგან პირველობამ მარტის დასასწყისში აიღო სტარტი და ახლა დასრულება, უბრალოდ, აბსურდი იქნება. 

სხვათა შორის, კარანტინშია საქართველოს წყალბურთელთა ნაკრების სრული შემადგენლობა, რომელიც საერთაშორისო ტურნირიდან დაბრუნდა და აეროპორტიდან, პირდაპირ საავადმყოფოში გადაიყვანეს. 

არსებობდა ვარაუდი, რომ ქართული და ბელორუსული მხარის შეთანხმების შემთხვევაში, საქართველო-ბელორუსის მატჩი, შესაძლოა, მაინც ჩატარებულიყო, ოღონდ მაყურებლების გარეშე, მაგრამ ჯერ ჩვენმა ხელისუფლებამ თქვა უარი, რადგან ევროპიდან ჩამოსულ ლეგიონერებს ორ-კვირიანი კარანტინის გავლა მოუწევდათ, შემდეგ კი უკვე უეფამ ოფიციალურად აკრძალა ყველა თამაში და რაღა თქმა უნდა, აღნიშნული მატჩიც. 

ისე, უეფა იმასაც ფიქრობს, რომ ჩემპიონთა ლიგის 1/4 და ½ დაპირისპირებების მატჩები, ორი რაუნდის ნაცვლად, ერთ შეხვედრაში გათამაშდეს (ეს ერთჯერადი აქცია იქნება და არა მუდმივი) და ჩემპიონთა ლიგა რაც შეიძლება მალე დასრულდეს. რა თქმა უნდა, აღნიშნული გადაწყვეტილება კლუბებს არაერთ ათეულ მილიონ დოლარს დააკარგვინებს, მაგრამ ადამიანების სიცოცხლე და უსაფრთხოება მილიონებზე მაღლა დგას. 

* * * 

მიუხედავად აკრძალვებისა, მოხერხდა და შვეიცარიაში დაწყებული მოჭადრაკეთა ტურნირი ბოლომდე გათამაშდა. პრინციპში, რაღა ტურნირი, ლოზანაში უძლიერესი მოჭადრაკეები შეიკრიბნენ და მსოფლიო გრან-პრისთვის იბრძოლეს. ჩემპიონი ნანა ძაგნიძე გახდა,რომელმაც გამარჯვების შემდეგ, საკუთარ გვერდზე, შემდეგი შინაარსის განცხადება გააკეთა: 

„გრან-პრის გამარჯვებას ვუძღვნი ექიმებს, რომლებიც მსოფლიო პრობლემას ებრძვიან ჩვენს ქვეყანაში და განსაკუთრებით, ადამიანს ადამიანთა შორის, ბატონ ამირან გამყრელიძეს, რომელიც ყოველთვის გვერდით მედგა, ჩემთვის მძიმე წუთებში. სამი კვირის წინ, ჩემმა ჩინელმა კოლეგებმა მთხოვეს, ჩამეწერა მათთვის გასამხნევებელი ვიდეო. მათ მიაღწიეს წარმატებას და იმედია, ჩვენც ერთად გავიმარჯვებთ“. 

* * * 

კვლავ მაყურებლების გარეშე მიმდინარეობს სუმოისტთა მორიგი სუპერტურნირი. ჰარუ ბაშოზე უჩვეულო სიმშვიდეა, რადგან სუმოისტებს ცარიელი ტრიბუნების წინაშე უწევთ გამოსვლა და დარბაზში მხოლოდ გოლიათების შეძახილები ისმის. 

სამწუხაროდ, კვლავ უარყოფითი ბალანსი აქვს ლევან გორგაძეს. ტოჩინოშინი 2:5-ზე აგებს და თუ ტურნირის დადებითი ბალანსით დასრულება და რანგში დაქვეითება არ სურს, დარჩენილი რვა შეხვედრიდან, მინიმუმ, ექვსი უნდა მოიგოს, რაც მისი ქრონიკული ტრავმის გათვალისწინებით, ძალიან ძნელი იქნება. 

* * * 

„მანჩესტერ იუნაიტედის“ ფრანგმა ნახევარმცველმა, პოლ პოგბამ ადამიანებს მოუწოდა დახველების ან დაცემინების დროს, „დები“ გააკეთონ. „დები“ საცეკვაო მოძრაობაა, რომელიც 2014 წელს გამოიგონეს და ფრანგს ისე მოეწონა, რომ გოლების აღნიშვნის დროს, სწორედ მისი გამოყენება დაიწყო. გაგიკვირდებათ და, მსოფლიო ჯანდაცვის ორგანიზაციამ პოგბას რეკომენდაცია აიტაცა და ისიც კი თქვა, კარგი იქნება, თუ ფრანგს დაუჯერებთ და დაცემინების ან დახველების დროს, სწორედ ასეთ პოზას მიიღებთო. მოკლედ, პოგბას რეკომენდაციას სურათით გთავაზობთ და დანარჩენი თქვენზეა. 

* * * 

ცნობილმა სპორტსმენებმა უკვე დაიწყეს ასეულ ათასობით დოლარის გადარიცხვა კორონავირუსით დაავადებულთა დასახმარებლად, თუმცა არაერთი ადამიანი ამ პროცესს სკეპტიკურად უყურებს. მათ მიაჩნიათ, რომ ვიდრე ვირუსის ვაქცინას არ გამოიგონებენ, ფულის გადარიცხვასა და ხარჯვას აზრი არ აქვს. ამის მიუხედავად, იტალიაში მოთამაშე, პრაქტიკულად, ყველა ფეხბურთელმა, სპეციალურ ფონდში მინიმუმ, 50 ათასი ევრო გადარიცხა, რაც იტალიის ხელისუფლებას ძალიანაც წაადგა. ჰო, არიან ადამიანები, რომლებიც პრემიას იმ ადამიანს დაპირდნენ, ვინც ვირუსის საწინააღმდეგო ვაქცინას მოიგონებს და თუ, მაგალითად, ჯეკი ჩანი ამის გამკეთებელს მილიონი დოლარით დაასაჩუქრებს, ამერიკელი კალათბურთის ლეგენდა ლებრონ ჯეიმსი, ყველაზე თამამი ოცნების ასრულებას ჰპირდება, რა ოცნებაც უნდა იყოს ის. ჯეიმსის ქონება, ლამის მილიარდად არის შეფასებული და დიდი ალბათობით, დანაპირების შესრულება არ გაუჭირდება. 

* * * 

ნეპალის ხელისუფლებამ შეწყვიტა ტურისტული ვიზების გაცემა და განაცხადა, რომ ნეპალის მთებში მოგზაურობის მსურველებს, ჩანაფიქრის გადადება მოუწევთ. რაც მთავარია, გაუქმდა ყველა საერთაშორისო ექსპედიცია, რომელიც ევერესტის დასაპყრობად იყო გამიზნული. ალპინისტებს ნეპალში ჩასვლა კანონის ძალით აეკრძალათ. 

* * * 

მიმდინარე მოვლენების ფონზე, რამდენიმე დღის წინ, პარაგვაიში დაპატიმრებული რონალდინიო ვის გაახსენდებოდა, მაგრამ რონიმ გულშემატკივრებს თავადვე შეახსენა თავი. ბრაზილიელი ვარსკვლავი, ძმასთან ერთად, ყალბი პასპორტის გამო დააპატიმრეს. რაც მთავარია, პარაგვაის სასამართლომ არ გაითვალისწინა მისი ვარსკვლავური სტატუსი და წინასწარი 6-თვიანი პატიმრობაც მიუსაჯა. ჰოდა, იმ საპატიმროში, სადაც რონალდინიო იხდის სასჯელს, ტრადიციული საფეხბურთო ტურნირი ჩატარდა. ისე როგორ იქნებოდა, ტურნირში რონალდინიოს არ ეთამაშა. მისმა გუნდმა 11:2 მოიგო, უშუალოდ რონალდინიოს ანგარიშზე, 5 გოლი და 6 საგოლე გადაცემაა და... გამარჯვებულს პრიზად 16-კილოგრამიანი ბურვაკი ერგო. მართალია, ბურვაკის სამომავლო ბედზე ლათინო-ამერიკელი ჟურნალისტები არაფერს წერენ, მაგრამ სანუკვარი პრიზი უკვე შეჭმული რომ იქნება, ადვილი მისახვედრია. ისე, რონალდინიოს მოგებული აქვს პრიმერა დივიზიონი, ჩემპიონთა ლიგა, ოქროს ბურთი და... ბურვაკი მის კარიერაში, პირველი პრიზია. 

* * * 

ვერ გეტყვით, როდემდე გასტანს ყველაფერი ეს, მაგრამ ფაქტია, რომ სპორტმა მინიმუმ, რამდენიმე მილიარდით იზარალა და არ არის გამორიცხული, უკვე მომავალ წელს, ეს ზარალი კონკრეტულ სახეობებსა, თუ კლუბებზე ნეგატიურად აისახოს. აი, ოლიმპიადის გადადების ალბათობა კი, რომელიც ასევე, დიდია, სპორტის სამყაროსთვის სრული კატასტროფა იქნება.

ბათო ჯაფარიძე

]]>
versiaprinti@yahoo.com (super admin) საზოგადოება Wed, 18 Mar 2020 12:05:35 +0400
"ქართუ” ვირუსის გავრცელებისგან დასაცავად სახელმწიფოს ფინანსურ რესურსს გამოუყოფს http://versia.ge/2013-07-31-11-23-15/item/6604-qartu-koronavirusi.html http://versia.ge/2013-07-31-11-23-15/item/6604-qartu-koronavirusi.html

“ქართუ” ფონდი, ნებისმიერი შესაძლო ფინანსური თუ სხვა სახის დანაკლისის შემთხვევაში მზადაა საკუთარი სახსრებით შეავსოს ეს დანაკლისი და სახელმწიფოს გამოუყოს იმ მოცულობის ფინანსური რესურსი, რაც საჭირო იქნება ვირუსის გავრცელების საფრთხისგან საზოგადოების მაქსიმალურად დასაცავად.

„დღეს, ჩვენი ქვეყანა, მთელ მსოფლიოსთან ერთად, დგას გამოწვევის წინაშე, კორონა ვირუსის გავრცელების საფრთხე ააცილოს საკუთარ მოსახლეობას.
საქართველოს მთავრობა, ყველა შესაბამისი უწყება, მთელი სახელმწიფო აპარატი, პირველივე დღიდან აქტიურადაა ჩართული ვირუსის გავრცელების პრევენციის საქმეში და ძალიან ეფექტიანად ართმევს თავს საზოგადოებისთვის საფრთხის არიდების პროცესს.
საქართველოს ხელისუფლების მხრიდან პროცესების კვალიფიცურ და ეფექტიან მართვას ხაზგასმით აღნიშნავენ ჯანდაცვის მსოფლიო ირგანიზაცია და ჩვენი საერთაშორისო პარტნიორები, რისთვისაც მადლობას ვუხდით ყველა შესაბამის უწყებას, პირველ რიგში, საქართველოს ჯანდაცვის სამინისტროს, იმუნოლოგიისა და ეპიდმიოლოგიის ცენტრს, ინფექციურ საავადმყოფის, ყველა პროფილურ კლინიკას, ამ საქმეში ჩართულ თითოეულ ექიმს, თითოეულ სპეციალისტს და თითოეულ ადამიანს.

“ქართუ” ფონდი, თავის მხრივ, გამოთქვამს მზადყოფნას, ნებისმიერი საჭიროების, ნებისმიერი შესაძლო ფინანსური თუ სხვა სახის დანაკლისის შემთხვევაში, საკუთარი სახსრებით შეავსოს ეს დანაკლისი და სახელმწიფოს გამოუყოს იმ მოცულობის ფინანსური რესურსი, რაც საჭირო იქნება ვირუსის გავრცელების საფრთხისგან საზოგადოების მაქსიმალურად დასაცავად.
ჩვენ ქვეყანას, ჩვენ ხალხს, ბევრი გამოწვევა დაუძლევია და დარწმუნებულები ვართ, ცივილიზებულ მსოფლიოს კვალდაკვალ, ერთმანეთის თანადგომით, ამ გამოწვევასაც წარმატებით გავუმკლავდებით“ - აღნიშნულია ფონდი „ქართუს“ განცხადებაში

]]>
versiaprinti@yahoo.com (super admin) საზოგადოება Fri, 13 Mar 2020 13:53:31 +0400